Seredana her du şandan di demekê da ne, hem li Rojavayê Kurdistanê û hem jî li Bakurê Kurdistanê du pirsên girîng hene. Yekem; paşeroja Kurdan e li Rojavayê Kurdistanê piştî rûxana rejîma Beşar Esed. Duyem; ya din jî pirsa aştiyê ye li Bakurê Kurdistanê. Li ba me hemiyan veşartî nîne ku pirsa Kurd di vê demê da li ber metirsiyê û hem jî li ber guherînên bingehîn û girîng e.

Li her cihekî Kurdistanê Kurdek hewceyî alîkariyê be û bixwaze di warê siyasî da rol hebe, ji destpêka şoreşa Kurdî heta îro, baregayê Barzanî navendeke girîng a civîna pirsên niştimanî û neteweyî ye, navendek e bo pirsên girîng û têgihiştina li ser pirsa gel û pirsa aştiyê digel gelên din ên navçeyê, navendek e bo qeziya Kurdî; lewma baregayê Barzanî girîngiyeke mezin li navçeyê heye.

Piştî yanzdeh salan ji destpêşxeriya cenabê Serok Barzanî, bo proseya aştiyê li Bakurê Kurdistanê û herdu rêkeftinên (Dihok-Hewlêr) navbera hêzên Kurdî li Rojavayê Kurdistanê, eger asteng li ber destpêşxeriyên Serok Barzanî nebûya, pirsa Kurd li Tirkiye û Sûriyayê di qonaxeke din da dibû. Tu car jî Serok Barzanî, ji destpêşxeriya aştiyê westiyayî nebûye.

Ji bo rewşa Sûriyayê cenabê Serok hewl û têkoşîneke zêde hebûye ku hemû aliyên Kurdî yekbixe û bi yekdengî bişîne Şamê, ev jî di pêxema bidestxistina mafên Kurdan da bûye. Eger ev yekrêzî pêk were bi plêya yekem Kurd sûdmend dibe û dawî Sûriya qazanc ji aramiyê dike. Dewletên navçeyê baş ji wê têgihiştine ; Serok Barzanî dikare hêzeke karîger be ji bo ku li Rojhilata Navîn û bi taybetî ew dewletên ku netewa Kurdî tê da hene rola xêr û aştiyê bibîne.

Dema birêz Ocalan bi xwe daxwaz dike peyama wî bigihîje cenabê Serok, ev yek dupatkrne ku hemûyan guman l ser wê çendê nîne ku dihête ser behsa doza kurd, Serok Barzanî parêzerê wê ye. Eger her carê jî mijarek berjewendiya Kurdan bûbe, dîsan Serok Barzanî înkar û nakokî û dijayetiya borî ya aliyê beranber piştguh dixe û şevnexwîniyê dike ji bo armanca mezin, ku aramî û aştî ye ji bo hemû Kurdan û gelan û netewe û pêkhateyên vê cografyayê.

Herêma Kurdistanê bi taybetî Serî Bilind, hêvîbexş e ji bo dawîanîna bi tundûtijiya neteweyan li vê navçeyê, bi taybetî Kurd digel neteweyên din.