سەلام عەبدوڵڵا
پارتی دیموكراتی كوردستان لە چلەكانی سەدەی پێشوودا وەك زەروورەتێكی مێژوویی چاوی هەڵهێنا و جڵەوی هزری نەتەوەیی خەبات و تێكۆشانی لە پێناو ئامانجە دێرینەكانی گەلەكەمان ــ بۆ سەرفرازی ئازادی و دیموكراسی ــ كردە ئامانجی بەرخودان و ستراتیژی كارو تێكۆشانی، ئەم ئەركە مێژووییەش، بە دەستپێشكەری و هەوڵی بارزانیی نەمر كە دوای راپەرینەكانی بارزان و بەشداری قارەمانانەی لە پشتگیری كۆماری ساوای مەهابادا گەڵاڵە بوو، چونكە بە ئەزموونی دوورودرێژی خۆی، گەیشتبووە ئەو باوەڕەی كە بەبێ پارتێكی دیموكراتی و نەتەوەیی و مۆدێرن كە ئەركی هۆشیاركردنەوەی گەل و زیندووكردنەوەی ئیرادە و متمانە بەخۆبوون مەحاڵە بەبێ پارتێكی دیموكراتی نەتەوەیی هاوچەرخ بهێنرێتە دی كە سەركردایەتی و رابەرایەتی گەلەكەمان بكات و هەستانەوە و خۆڕێكخستنەوەو بڕوا بە خۆبوون و ئامادەسازی بۆ قۆناغەكانی داهاتوو دەستەبەر بكات، چونكە شكستی كۆمار و لاسەنگی هێزو باڵادەستی داگیركەرانی، باڵی بێ هیوایی بەسەر تەواوی گەلەكەماندا كێشابوو. بۆیە دامەزراندنی پ. د.ك لەو ئان و ساتەدا هیوا و ئاواتی گەلەكەمان بۆ سەرفرازی جارێكی تر گەشاندەوەو گڕوتینێكی بەهێز و وزەی بە جەماوەردا.
لەماوەی ئەم حەفتاو سێ ساڵەدا پارتی دیموكراتی كوردستان بە چەندین قۆناغی هەورازو نشێودا تێپەڕیوە، بەڵام نە لەسەركەوتنەكانیدا لە خۆبایی بووە، نە لە ساتە دژوارەكانیشدا ورەی بەرداوەو پشتی لە ئامانجەكانی كردووە، ئەمەش مێژوو دەیسەلمێنێ، چونكە دوای هەر كارەسات و دۆخێكی نەخوازراو، جارێكی تر بە گوڕوتینێكی زیاتر و بەورەیەكی بەرزەوە هاتۆتەوە مەیدان و بوونی خۆی سەلماندۆتەوە، ئەوەش سەرچاوەی لە داخوازی رەوای مافەكانی گەلەكەمان وەرگرتووە كە دەبێ ئەویش وەك هەموو گەلانی سەرزەمین، خاوەن ماف و سەروەری بەسەر خاكی خۆیدا هەبێت كە لەلایەن داگیركەرانەوە ئەو مافەی لێ زەوتكراوە.
لە شۆڕشی ئەیلوولدا كە پارتی جڵەوی سەركردایەتی گرتە دەست، توانی لە ماوەیەكی كورتدا پانتاییەكی زۆر لە خاكی كوردستان ئازاد بكات و دامودەزگای ئیدارەدان و بەڕێوەبردنی ناوچە ئازادكراوەكان بگرێتە ئەستۆ، خزمەتگوزارییەكانی وەك تەندروستی و خوێندن و هەموو سێكتەرەكانی دیكە، زۆر بەباشی بەڕێوەببات، هەر وەك هێزێكی تۆكمە لە پێشمەرگە رێكبخات و چالاكی دژی سوپای عێراق سەركەوتووانە ئەنجام بدات، بە ئەندازەیەك كە حكوومەتی عێراق، ناچار بكات كە رێككەوتننامەی 11ی ئازار ئیمزا بكات، لەگەڵ ئەوەشدا ئەم سەركەوتنە نەبووە هۆی ئەوەی كە مامەڵەی توند لەگەڵ نەیارانی بكات، بەڵكو توانی ئەو دەلاقە گەورەیەی كەوتبووە نێو بزووتنەوەی رزگاریخوازی كورد زۆر حەكیمانە چارەسەر بكات كە بووە سەرسوڕمانی دەسەڵاتدارانی بەغدا.
لە نسكۆی ئاداری 1975دا پارتی ورەی بەرنەداو لە ماوەی كەمتر لە ساڵێكدا، خۆی رێكخستەوەو خەباتی چەكداری دەست پێكردەوەو جارێكی تر سەلماندی كە حزبێكی زیندووە. لە راپەڕینیشەوە هەموو توانای خستۆتە گەڕ بۆ بنیاتنانی هەرێمی كوردستان و ڕۆڵی كارای گێڕاوە لە یەكەمین هەڵبژاردنی ئازاد لە هەرێمدا و پەرلەمان و حكوومەتی لەگەڵ حزبەكانی تری هەرێمی كوردستانی دامەزراندووەو لە هەموو ئەو هەڵبژاردنانەی لە هەرێمدا كراون، دەنگی بەرچاوی هێناوەو هەردەم لایەنگر و پشتگیری پەرەی سەندووە وەك لە دواین هەڵبژاردنی دا بووە خاوەنی زۆرینەی كورسیەكانی پەرلەمان كە ئەمەش هەر ئەوە دەسەلمێنێ كە پارتی جێی متمانەی زۆرینەی خەڵكی كوردستانە و تەنانەت لەسەر ئاستی هەموو عێراقیش وەكو تاكە حزب لە هەڵبژاردنی 2018/5/12دا زۆرینەی دەنگی بەدەستهێناوە، كە ئەمەش هەر زیندوویی و داینامیكیەتی پارتی دیموكراتی كوردستان بەئاشكرا دەسەلمێنێت.