Kurdî  ■  كوردی  ■  عربي
MON, 18 JUN 2018 10:43 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

ئه‌دی كه‌ی كاتی ریفراندۆم و سه‌ربه‌خۆییه‌؟!
| KDP.info


محه‌ممه‌د ئه‌حمه‌د

هه‌رچه‌نده‌ ئه‌مڕۆ ده‌رفه‌تێكی زێڕین و ده‌گمه‌ن بۆ گه‌لی كوردستان ره‌خساوه‌ كه‌ بڕیار له‌ چاره‌نووسی خۆی بدات و، هاوشێوه‌ی گه‌لانی دیكه‌ به‌ مافی ره‌وا و سرووشتیی خۆی كه‌ دامه‌زراندنی قه‌واره‌یه‌كی سیاسیی سه‌ربه‌خۆیه‌ شاد بێت، چونكه‌ له‌مڕۆدا هاوكێشه‌ی سیاسیی ناوچه‌كه‌ و جیهان گۆڕنكارییان به‌سه‌ردا هاتووه‌ و هاوكات زه‌مینه‌ی سیاسی، دیپلۆماسی، سه‌ربازی و ئابووریی ناوخۆ و ده‌ره‌وه‌ بۆ كورد له‌بار و گونجاوه‌.
كه‌چی ده‌نگێكی ناساز چ له‌ناوخۆ و چ له‌ ده‌ره‌وه‌ به‌رز ده‌بێته‌وه‌ و ده‌ڵێن ئێستا كاتی ریفراندۆم بۆ سه‌ربه‌خۆییی كوردستان نییه‌. جا ئەوانەی دەڵێن ئێستا کاتی نییە بۆ ریفراندۆم و سەربەخۆیی کوردستان، ده‌كرێ له‌ دوو بەرەدا پۆلێنیان بكه‌ین، به‌بێ له‌به‌رچاوگرتنی په‌یوه‌ندیی نێوان هه‌ردوو به‌ره‌كه‌: یەکەمیان، بەرەی داگیركه‌ران و نەیارانی کوردستانه‌، دووەمیشیان بەرەی ناوخۆیه‌، کە هاوزمان و هاونەتەوەی ئه‌وانه‌ن كه‌ هه‌نگاو بۆ ریفراندۆم و سەربەخۆییی کوردستان ده‌نێن.
سەبارەت بە بەرەی یەکەم، هیچ گلەیی و گازاندەیه‌كی ئه‌وتۆیان لێ ناکرێ، چونکە هەڵوێست و بۆچوونی ئەوان چاوەڕوانكراو و پێشبینیکراوە، به‌وپێیه‌ی پرسه‌كه‌، پرسی هه‌ڵوه‌شاندنه‌وه‌ی نه‌خشه‌ی كۆن و داڕشتنه‌وه‌ی نه‌خشه‌یه‌كی نوێیه‌ له‌ ناوچه‌ی رۆژهه‌ڵاتی ناوه‌ڕاستدا.
پرسیار ئه‌وه‌یه‌، ئایا بەرەی دووه‌م بۆچی هەمان هەڵوێست و بۆچوونی بەرەی یەکەمیان هەیە؟! ئایا پاساو و بیانووه‌كانی به‌ره‌ی یه‌كه‌م و دووه‌م له‌ دژایه‌تیكردنی ریفراندۆم، یان به‌ ده‌ربڕینێكی نه‌رمتر كه‌ ده‌ڵێن ئێستا كاتی نییه‌، هه‌مان شتن؟.
بێگومان ره‌نگه‌ له‌ هه‌ندێ خاڵدا پاساوه‌كانیان وه‌كو یه‌ك بن و په‌یوه‌ندیدار بن. هه‌رچه‌نده‌ ئه‌گه‌ر هه‌مان بیانوو و مه‌رامیان هه‌بێت یان نا، گرینگ نییه‌، ئه‌وه‌ی گرینگه‌ ئه‌وه‌یه‌ كه‌ هه‌ردوو تێڕوانین و هه‌ڵویسته‌كه‌ ده‌چنه‌ خانه‌ی دژایه‌تیكردنی ریفراندۆم و سه‌ربه‌خۆییی كوردستان و دژایه‌تیكردنی مافی ره‌وای خه‌ڵكی كوردستان.
ئه‌گه‌ر له‌ بیانووه‌كانی به‌ره‌ی دووه‌م كه‌ هه‌ندێ لایه‌نی كوردستانین ورد بینه‌وه‌، ده‌بینین لاواز و نالۆژیكین، به‌ تایبه‌ت كه‌ ده‌ڵێن هێشتا پایه‌كانی دامه‌زراندنی ده‌وڵه‌تی كوردستان درووست نه‌بوون، یان له‌به‌ر هۆكاری رێكنه‌بوونی ناوماڵی كورد، یانیش ده‌ڵێن وڵاتانی ده‌وروبه‌رمان رازی نابن و رێگه‌ ناده‌ن و ئه‌گه‌ر سه‌ربه‌خۆیی رابگه‌یه‌نین، ئه‌وا یان ده‌مانخۆن! یان سنووره‌كانمان له‌سه‌ر داده‌خه‌ن و له‌برسان ده‌مرین!.
ئایا ئه‌و پاساوانه‌ بۆچی لاواز و لاوه‌كین؟ چونكه‌ هیچ ره‌وایی و واقیعبینییه‌كی ئه‌وتۆی تێدا نییه‌ كه‌ بگوترێت هێشتا پایه‌كانی دامه‌زراندنی ده‌وڵه‌تمان نییه‌، به‌ڵكو به‌ به‌راورد به‌ زۆر هه‌رێم و وڵاتی دیكه‌ ،زۆرینه‌ی پایه‌كانی ده‌وڵه‌تی سه‌ربه‌خۆ له‌ كوردستان بوونیان هه‌یه‌، خاك و زمان و سوپا (پێشمه‌رگه‌)یه‌كی به‌هێز و پایه‌ی ئابووریمان هه‌یه‌. هه‌روه‌ها بۆ بیانووی رێكنه‌بوونی ناوماڵی كوردیش، ئه‌وا له‌وه‌ته‌ی كورد هه‌یه‌، ناوماڵی رێك نه‌بووه‌، هه‌روه‌ك زۆر گه‌ل و نه‌ته‌وه‌ی دیكه‌ش هه‌مان كێشه‌ی ئێمه‌یان هه‌بووه‌. سه‌باره‌ت به‌ بیانووی داخستنی سنووره‌كانیش له‌لایه‌ن دراوسێكانمانه‌وه‌، ته‌نها كارتێكه‌ و له‌سه‌ر ئه‌رزی واقیع ئیمكانی جێبه‌جێكردنی ئه‌سته‌مه‌، چونكه‌ دواجار كۆمه‌ڵێك به‌رژه‌وه‌ندیی هاوبه‌شی نێوان ئێمه‌ و دراوسێكانمان كۆكمان ده‌كات و كۆمان ده‌كاته‌وه‌.
ئه‌گه‌ر ئه‌و پاساوانه‌ بكرێنه‌ پێوه‌ر بۆ وازهێنانمان له‌ مافی سرووشتی و ره‌وای خۆمان كه‌ بریتییه‌ له‌ ژیانێكی شایسته‌ و سه‌ربه‌رزانه‌ و شه‌رافمه‌ندانه‌ له‌سه‌ر خاكی خۆمان، ئه‌وا کەواتە بەرەی دووەم دەبێ پشت بە یەکێک لەو پاساو و بۆچوونه‌ دوور له‌ واقیعه‌ ببەستن بۆ هەڵوێستەکەیان:
1-پێیان وایە دەبێت دەرفەتێک بدرێت بە داگیرکەران و نەیارانی کوردستان تا باشتر بیر لە بڕیاری ئەنجامدانی ریفراندۆمی کوردستان بکەنەوە، بەڵکو دڵیان نەرم بێت و بەزەییان پێماندا بێتەوە و، دواجار بڵێن فەرموون ریفراندۆمی سەربەخۆیی ئەنجام بدەن و پیرۆزتان بێت، چونکە مافێکی رەوا و سرووشتیی خۆتانە!، كه‌ ڕێی تێناچێت.
2-یان پێیان وایە دەبێ چاوەڕێ بکەین تا دەوڵەتەکانی چواردەورمان هەموویان لەناو دەچن و کۆتاییان پێدێت، ئەوکاتە ئێمەش ناوی خوای لێبێنین و دەست بکەین بە درووستکردنی دەوڵەتی خۆمان!
3-یان پێیان وابێت، هێشتا کورد نەتەوە نییە و تەنانەت رەنگە بڕوایان بەو پڕوپاگەندە خوڕافیانەی هەندێ لە رێبەرانی مەزهەبیی شیعە و سوننەی عەرەب کردبێت، کە لە سەردەمی کۆن و ئێستادا فەرموویانە کورد مرۆڤ نین بەڵکو لە رەگەزی جنۆکەن!
4-یانیش رەنگە باوه‌ڕیان وابێت دەبێ چاوەڕێ بکەین تا رۆژی قیامەت، ئەوکاتە نەتەوەکان لەبەر پەشۆکاوییان، ناپەڕژێنە سەر ئێمە و ئاگایان لە ئێمەی کورد نامێنێت، ئەوکاتە ئێمەش دەرفەت بهێنین و دەست لە دەست و قووەت لە خوا، جاڕی دەوڵەتی خۆمان بدەین!.

 




دوایین هەواڵەکان

ئەنجیلینا جولی پشتگیرییه‌كانی حکوومەتی ھەرێم لە پەنابەرانی سوریا به‌رز ده‌نرخێنێت

SUNDAY, 17 JUNE 2018 21:06:09

هه‌ولێر-KDP.info-  ئەنجیلینا جولی، نێردەی تایبەتیی کۆمسیۆنی باڵای پەنابەرانی سه‌ر به‌ نەتەوە یەکگرتووەکان و شاندێكی یاوه‌ری، سەردانی ھەولێری کرد و لەلایەن سەفین دزەیی وتەبێژێ فەرمیی حکوومەتی ھەرێمی کوردستان و بەرپرسی نووسینگەی تایبەتیی سەرۆکوه‌زیرانی هه‌رێمی كوردستانه‌وه‌ پێشوازی لێ کرا.

 
"لە عەفرین خەڵک ئازار دەدرێ"

SUNDAY, 17 JUNE 2018 16:06:01

عەفرین-KDP.info- چاودێرێکی سیاسی دەڵێ، گروپەچەکدارەکان لە  عەفرین خەڵکی بەتوندترین شێوە ئازار دەدەن، رێکخراوی هیومان وۆچ ئاشکرای کردووە کە چەکدارەکان لەگەڵ ئەوەی خەڵکی ئازار دەدەن، شوێنەکانیش خاپوور دەکەن تا خەڵکی نەگەڕێنەوە.

داعش له خانه‌قین سه‌رۆكهۆزی هه‌مه‌وه‌ند و خێزانه‌كه‌یان تیرۆر کرد

SUNDAY, 17 JUNE 2018 15:06:11

خانەقین-KDP.info-  تیرۆریستانی داعش لە سنووری خانەقین سەرۆکهۆزی هەمەوەند و خێزانەکەیان تیرۆر کرد.

سه‌رۆك بارزانی سه‌ردانی میحوه‌ری پردێ ده‌كات

SATURDAY, 16 JUNE 2018 17:06:20

میحوەری پردێ-KDP.info-  سەرۆك مه‌سعوود بارزانی، له‌ دووه‌م رۆژی جه‌ژندا، سەردانی بەرەكانی هێزی پێشمەرگەی كوردستان لە میحوەری پردێ كرد.

"مەسیحییەکان دەڵێن بەغدا فەرامۆشی کردووین"

SATURDAY, 16 JUNE 2018 17:06:51

هەولێر-KDP.info-  رۆمیۆ هەکاری سکرتێری حزبی بەیتنەهرێن دەڵێ، وەک پێکهاتەکان هیچ هەست ناکەین کە ئێمە لە لایەن بەغداوە لە پرسە چارەنوسسازەکاندا بەشداریمان پێدەکرێ، بەغدا پێکهاتەکانی فەرامۆش کردووە.



 
© 2018 Kurdistan Democratic Party, KDP