هەولێر-KDP.info- سكرتێری ڕێكخراوی نەتەوە یەكگرتووەكان وەڵامی نامەکەی سەرۆکی هەرێمی کوردستانی دایەوە و ڕایگەیاندووە، خۆی و ڕێكخراوی نەتەوە یەكگرتووەكان حەز دەكەن لەگەڵ (سەرۆك بارزانی) كار بكەن بۆ مسۆگەركردنی ئاشتی لە هەرێمی كوردستان و عێراق و ناوچەكە و جیهان.
لە وەڵامی نامەی پیرۆزباییی (مەسعوود بارزانی) سەرۆكی هەرێمی كوردستان بۆ سكرتێری تازەی ڕێكخراوی نەتەوە یەكگرتووەكان بەبۆنەی دەستبەكاربوونی وەك سكرتێری نوێی ڕێكخراوی نەتەوە یەكگرتووەكان، (ئەنتۆنیۆ گۆتیرس) سكرتێری گشتیی ڕێكخراوی نەتەوە یەكگرتووەكان، لە نامەیەكدا سوپاسی (سەرۆك بارزانی) و گەلی كوردستانی كردووە و هەروەها ڕێز و پێزانینی خۆی بۆ ڕۆڵی (سەرۆك بارزانی) و قارەمانێتیی هێزی پێشمەرگەی كوردستان لە شەڕی تیرۆریستانی داعش و ئۆپەراسیۆنی ئازادكردنی مووسڵ ڕاگەیاندووە.
هەروەها ئەوەیشی لە نامەكەیدا بۆ (سەرۆك بارزانی) خستووەتەڕوو، كە هەموو لایەك لە ڕووبەڕووبوونەوەیەكی سەخت و مێژووییی تەحەدییاتەكاندان و، تیرۆر و هزری توندڕۆیی بەنیازە وڵاتان لەیەكتر دوور بكاتەوە.
(ئەنتۆنیۆ گۆتیرس) ئەوەیشی ڕاگەیاندووە كە خۆی و ڕێكخراوی نەتەوە یەكگرتووەكان حەز دەكەن لەگەڵ (سەرۆك بارزانی) كار بكەن بۆ مسۆگەركردنی ئاشتی لە هەرێمی كوردستان و عێراق و ناوچەكە و جیهان.
هەر لە نامەكەیدا سكرتێری گشتیی نەتەوە یەكگرتووەكان دابینكردنی ئاشتی لە ڕۆژهەڵاتی ناوەڕاست، بە ئەركێكی مێژوویی لە قەڵەم داوە و، بۆ ئەو مەبەستەیش دەیەوێ لە نزیكەوە هاوكار و هەماهەنگ بێت لەگەڵ (سەرۆك بارزانی).