هەولێر-KDP.info- سەرۆكی هەرێمی كوردستان لەگەڵ نوێنەر و كونسووڵی وڵاتان لە هەولێر كۆبۆوە و رایگەیاند کە کەس مافی ئەوەی نییە لەبارەی یەکپارچەیی عێراق گلەیی لە ئێمە بکات، چونکە هەم لەپێش 2003 و لە دوای ئەوەیش، هەموو شتێکمان کرد بۆ چەسپاندنی شەراکەتی ڕاستەقینە و فرەیی و دیموکراسی و فیدڕاڵی. پێوەست بە ئۆپەراسیۆنی ئازادکردنی مووسڵیش، (سەرۆک بارزانی) رایگەیاند کە، ئەوانەی موسڵیان ڕادەستی داعش کرد حەزیان نەدەکرد ئۆپەراسیۆنەکە دەست پێ بکات و سەربگرێت، چونکە خۆیان شکابوون و نەیاندەویست سەرکەوتنی خەڵکی دی ببینن.
ڕۆژی پێنجشەممە 12ـی 1ـی 2017 لە سەلاحەدین (مەسعوود بارزانی) سەرۆكی هەرێمی كوردستان وەك نەریتێكی ساڵانە، بە مەبەستی گەیاندنی بیروبۆچوون و سیاسەتی گشتیی هەرێم بە نوێنەری وڵاتان و گەیاندنی بیروبۆچوون و سیاسەتی گشتیی هەرێم و شیكردنەوەی دوایین پێشهاتە سیاسیی و ئەمنییەکان و پرسە ناوخۆیی و هەرێمایەتییەکان، لەگەڵ سەرجەم كونسوڵ و سەرۆكی نوێنەرایەتیی وڵاتان لە هەولێر كۆبۆوە.
لە سەرەتای كۆبوونەوەکەدا (فەلاح مستەفا)، بەرپرسی پێوەندییەكانی دەرەوەی حكوومەتی هەرێمی کوردستان، وێڕای دەربڕینی سوپاس و پێزانین بۆ (سەرۆک بارزانی) لەمەڕ پشتیوانیکردنی فەرمانگەکەیان و ڕێکخستنی دیدارەکە، کورتەیەکی لەسەر بەرەوپێشچوونی ئاستی پەیوەندییەکانی هەرێم لەگەڵ وڵاتانی دەرەوە و زیادبوونی ژمارەی نوێنەرایەتییەکانی وڵاتان لە هەرێم پێشکەش کرد.
دواتر (سەرۆك بارزانی) گوتەیەكی بۆ ئامادەبووان پێشكەش كرد و تێیدا وێڕای بەخێرهێنانیان پیرۆزبایی ساڵی تازەی زایینی لە نوێنەری وڵاتان كرد و هیوای سەركەوتنی بۆ خواستن.
(سەرۆك بارزانی) باسی سەرەتای سەرهەڵدانی داعش و هۆکارەکانی بەهێزبوونیان و پەلاماردانی کوردستان لەلایەن ئەو ڕێکخراوە تیرۆریستییەی كرد و مەترسییەكانی تیرۆریستانی بۆ سەر ئاساییشی جیهانی و كۆی مرۆڤایەتی بۆ ئامادەبووان شی كردەوە و باسی لە قۆناغەكانی شەڕی پێشمەرگە و داعشی كرد كە تێیدا پێشمەرگە بە ئیمکانییەتێکی کەم و قوربانیدانێكی زۆر سەرەتا هەوڵی دا خەڵك و پێكهاتەكان ڕزگار بكات و بیانپارێزێت و دواتر ڕێگە لە پێشڕەویی تیرۆریستان بگرێت و دواجاریش بكەوێتە قۆناغی هێرشبردن و تێکشکاندنی تیرۆریستان. هەروەها ڕوونی کردەوە کە بە گیانفیدایی ڕۆڵەکانمان و خۆڕاگریی پێشمەرگە، ئەو تیرۆریستانەی ببوونە هەڕەشە لەسەر گەلەکەمان، ئێستا شەڕەکە چووەتە ناو جەرگەی مووسڵ کە تیرۆریستان کردبوویانە پایتەختی خیلافەتەکەیان.
سەرۆك بارزانی پێزانینی هەبوو بۆ قوربانیدان و گیانفیدایی پێشمەرگە و خۆڕاگریی گەلی كوردستان و سوپاسی هاوكاری و پشتیوانیی وڵاتانی دۆست و هاوپەیمانیشی كرد كە بوونە هۆی ئەوەی سەركەوتنەكانی پێشمەرگە خێراتر ببن و ئاستی هەماهەنگی نێوان هێزی پێشمەرگە و هێزی هاوپەیمانان بە زۆر سەركەوتوو لەقەڵەم دا.
لەدرێژەی قسەكانیدا (سەرۆک بارزانی) بە وردی باسی ئۆپەراسیۆنی ئازادکردنی مووسڵی کرد و ڕایگەیاند ئەوانەی موسڵیان ڕادەستی داعش کرد حەزیان نەدەکرد ئۆپەراسیۆنەکە دەست پێ بکات و سەربگرێت، چونکە خۆیان شکابوون و نەیاندەویست سەرکەوتنی خەڵکی دی ببینن، بۆیە لە 29ـی ئەیلوولی ساڵی ڕابردوو سەردانی بەغدام کردووە و لەگەڵ سەرۆکوەزیرانی عێراق و لایەنە پەیوەندارەکان بناغەی ئەو هاوکارییەمان دانا کە لەنێوان پێشمەرگە و سوپای عێراق هاتە ئارا و ڕۆڵێ هەرلایەک دەستنیشان کرا و لەگەڵ دەسپێکردنی ئۆپەراسیۆنەکەیش پێشمەرگە توانی لەماوەیەکی کەمدا هێڵەکانی بەرگریی داعش تێکبشکێنێت و ڕێگە بۆ هێزە عێراقییەکان خۆش بوو کە بتوانن بەرەو ناو موسڵ پێشڕەوی بکەن. ڕوونیشی کردەوە کە بەبێ هاوکاریی پێشمەرگە و هەماهەنگیی نێوان پێشمەرگە و سوپای عێراق، ئۆپەراسیۆنەکە سەری نەدەگرت.
(سەرۆک بارزانی) ئاماژەی بەوەیش کرد کە ڕاستە ئێستا داعش تووشی شکستی زۆر بووە و بەرەو داڕووخان دەچن، بەڵام نەمانی ئەو ڕێکخراوە تیرۆریستییە لە موسڵ و شکستی سەربازیی تیرۆریستان، بەمانای کۆتاییهاتنی داعش و تیرۆر نایەت و ڕەنگە ئەو ڕێکخراوە تیرۆریستییە لەجیاتی شەڕی بەرەیی، بەناوی جیا یان شێوازی دیکە ببێتەوە هەڕەشە بۆسەر ئاسایشی جیهان و مرۆڤایەتی و دوور نییە دیاردەی مەترسیدارتر لە داعش سەر هەڵبدات، بۆیە دەبێ جگە لە شەڕی مەیدانی لەگەڵ داعش، ڕەگی توندوتیژی و تیرۆر لەڕووی فکری و ئابووری و سیاسی و کۆمەڵایەتی وشک بکرێن و ئەوەیش پێویستی بە هەوڵێکی نێودەوڵەتی و هەماهەنگیی هەمەلایەنە هەیە.
(سەرۆک بارزانی) ئاماژەی بە ڕەوشی ئابووریی هەرێم کرد کە بەهۆی دابەزینی نرخی نەوت و شەڕی تیرۆریستان و هاتنی یەک ملیۆن و هەشتسەد هەزار ئاوارە بارگرانییەکی زۆر کەوتە سەرشانی هەرێم و لە دوای دەستپێکردنی ئۆپەراسیۆنی ئازادکردنی موسڵیشەوە نزیکەی سەدهەزار کەسی تر لەو ناوچانەوە پەنایان بۆ هەرێم هێناوە. سەرۆک بارزانی ئەوەشی ڕاگەیاند کە ئومێدمان وایە ئەمساڵ دوای تێکشکاندنی تیرۆرستان و فەراهەمبوونی کەشی گونجاو بۆ گەڕانەوەی بەشێک لە ئاوارەکان و بەرزبوونەوەی نرخی نەوت هاوشان لەگەڵ پڕۆسەی چاکسازی، ڕەوشی دارایی هەرێم باشتر بێت.
لەبارەی بارودۆخی ناوخۆی هەرێم سەرۆك بارزانی هێمای بەوەدا كە ئێستا لایەنەکان لە گفتوگۆدان و ئومێد هەیە گفتوگۆکان بگەنە ئەنجام.
باسكردنی پەیوەندیی نێوان هەرێم و بەغدا تەوەرێكی تری قسەكانی (سەرۆك بارزانی) بوو و تێیدا ئەوەی خستەڕوو کەس مافی ئەوەی نییە لەبارەی یەکپارچەیی عێراق گلەیی لە ئێمە بکات، چونکە هەم لەپێش 2003 و لە دوای ئەوەیش، هەموو شتێکمان کرد بۆ چەسپاندنی شەراکەتی ڕاستەقینە و فرەیی و دیموکراسی و فیدڕاڵی. ڕوونیشی کردەوە کە لە 29ـی ئەیلوولی ساڵی ڕابردوو کاتێک سەردانی بەغدای کردووە بەوردی و ڕاشکاویی تەواو لەگەڵ سەرۆکوەزیران و لایەنەکان گفتوگۆیان کردووە و بەخۆشحاڵییەوە ئەوانیش گوێیان لە سەرنجەکان گرت و لەسەر ئەوە ڕێککەوتین کە بکەوینە گفتوگۆ تا بگەینە چارەسەرێک کە کۆتایی بە تراژیدیا و کێشەکانی ڕابردوو بێت و دووبارە نەبنەوە. سەرۆک بارزانی جەختیشی کردەوە کە ئێستا هەرێمی كوردستان لەبواری سەربازییدا هەماهەنگییەکی زۆر باشی لەگەڵ حكوومەتی عێراقی هەیە، بەتایبەتی لە ئۆپەراسیۆنی ئازادکردنی مووسڵدا.
هەر لەم كۆبوونەوەیەدا نوێنەر و كونسووڵی وڵاتان لە هەولێر سوپاسی (سەرۆك بارزانیان) كرد بۆ ڕەخساندنی ئەو دیدارە و هیوای سەركەوتنیان بۆ گەلی كوردستان خواست و ستاییشی پێشمەرگە و سەركردایەتی هێزی پێشمەرگە كرد لە ڕووبەڕووبوونەوەی داعش و هەروەها پێزانینیان هەبوو بۆ خۆڕاگری گەلی كوردستان و فەرهەنگی پێكەوەژیان و لێبوردەی گەلی كوردستان. هەروەها سوپاسی فەرمانگەی پێوەندییەکانی دەرەوەی هەرێم و وەزارەتەکانی حکوومەتی هەرێمیان کرد بۆ ئاسانکاری و پشتیوانیکردنی چالاکییەکانیان. دواتریش لەبارەی شەڕی تیرۆر و بارودۆخی ئابووریی هەرێم و پەیوەندییەكانی نێوان هەرێم و بەغدا كۆمەڵێك پرسیاریان ئاراستەی (سەرۆك بارزانی) كرد و سەرۆك بارزانیش وەڵامی تێبینی و پرسیاری ئامادەبووانی كۆبوونەوەی دایەوە.