Kurdî  ■  كوردی  ■  عربي
WED, 24 MAY 2017 18:37 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

نێچیرڤان بارزانی: مامۆستا هێدی نموونەیەك بوو لە جوامێری و شۆڕشگێڕی و وەفاداری
| KDP.info


هەولێر-KDP.info-    ئێوارەی ئەمڕۆ چوارشەممە ١١-١-٢٠١٧ بە ئامادەبوونی (نێچیرڤان  بارزانی) سەرۆكوەزیرانی هەرێمی كوردستان و وەزیر و پەرلەمانتارانی هەرێمی كوردستان و نوێنەرانی لایەنە سیاسییەكانی كوردستان و ژمارەیەكی زۆر لە نووسەر و بیرمەند و شاعیر و مامۆستایانی زانكۆ و ڕۆشنبیران و كەسوكار و دۆست و هاوەڵ و هۆگرانی، ڕێوڕەسمی یادی نووسەر و شاعیر و خەباتكاری گەورەی كۆچكردووی كورد مامۆستا خالید حوسامی ناسراو بە (هێدی) شاعیر بەڕێوەچوو.


لە مەراسیمەكەدا دوای پێشكەشكردنی چەند وتەیەك، سەرۆكوەزیرانی هەرێمی كوردستان وتەیەكی پێشكەش كرد و تیایدا جیا لە بەخێرهێنانی میوانانی ڕێوڕەسمەكە، ئاماژەی بەوە دا كە مامۆستا هێدی لای ئەوان یادگارێكی كۆماری كوردستان و پێشەوای شەهید قازی محەممەد و شۆڕشی ئەیلوول و بارزانیی نەمر بوو و نموونەی پێشمەرگەیەكی بە بیروباوەڕ، شاعیرێكی گەورە و نووسەرێكی زانا و وەفادار بوو، بۆیە هەمیشە شانازی پێوە دەكەن و پەیوەندیشیان لەگەڵ خزمان و بنەماڵەی مامۆستا هێدی، پەیوەندییەكی زۆر فراوان بوو. ئەوەش لە خۆشەویستیی هاوبەشی هەردوولاوە سەرچاوەی گرتبوو.

ئاشكراشی كرد كە مامۆستا هێدی لای بنەماڵەكەیان و خۆی و هاوتەمەنەكانی و ئەوانەی كەمێك لەو گەورەتر و بچووكتر بوون، شوێنێكی تایبەتی هەبوو و دوای نسكۆی شۆڕشی ئەیلوول و ئاوارەبوونیان بۆ ئێران هەوڵ و ئاسانكاریی زۆری بۆ كردن بچنە قوتابخانە و بەردەوام بن لە خوێندن و هەروەها كاروباری پەناهندەكانی هەڵدەسووڕاند و زۆر لە نامە گرنگەكانی بارزانیی نەمری دەنووسین بۆ دەزگاكانی حكوومەتی ئێران و شای ئێران لەو كاتەدا و ئەو نامانەی ئەو دەینووسین، بارزانی ئەوەندە متمانەی پێ هەبوو، بەبێ خوێندنەوە، ئیمزای دەكردن. ڕاشیگەیاند كە پەیوەندیی ئەو لەگەڵ مامۆستا هێدی و مامۆستا هەژاری موكریانی، پەیوەندییەكی زۆر بەهێز بوو و زۆرێك لە شعرەكانی ئەوانی لەبەر بوون ئەو پەیوەندییەش بەشێكن لە یادگارییە شیرینەكانی ژیانی.

لە بەشێكی دیكەی وتەكەیدا ئاماژەی بەوە دا كە مامۆستا هێدی لەگەڵ هەردوو ڕۆشنبیر و شاعیری گەورە هێمن و هەژاری موكریانى، سێكوچكەی ڕۆشنبیری و ئەدەبیاتی موكریانیان پێكهێنا و بوونە كۆڵەگەیەكی بەرچاوی ڕۆشنبیری و ئەدەبی كوردی كە بەرهەم و ناویان هەمیشە و بۆ هەتا هەتایە شوێنێكی پڕشنگداریان لە مێژووی ئەدەبی كوردیدا دەبێت. دووپاتیشی كردەوە كە مامۆستا هێدی خۆشەویستییەكی زۆر گەورەی بۆ بارزانی هەبوو و ئەو خۆشەویستییە هۆكارێك بوو كە بۆ بیرەوریی ساڵانەی بارزانیی نەمر و دواتریش بۆ بیرەوریی بارزانیی نەمر و ئیدریس بارزانیی شیعری زۆر بەرز و پڕ هەست بنووسێت كە لە ڕێوڕەسمی بیروەرییەكاندا ئەو شیعرانەی دەخوێندنەوە. بۆ ئەمەش نموونەیەكی لە شیعری مامۆستا هێدی خوێندەوە كە بۆ بیرەوەری بارزانی نەمر نووسیوییەتی.

هەر لەسەر خۆشەویستیی شاعیری گەورە هێدی بۆ بارزانی نەمر،  سەرۆك وەزیران ئاشكرای كرد كە خۆشەویستی مامۆستا هێدی بۆ بارزانی بێ سنوور بوو و ئەو باوەڕەی كە وەك نووسەر و پێشمەرگەیەك لەلایەن مامۆستا هێدی بۆ بارزانیی نەمر دروست ببوو، لە كۆماری كوردستان لە مەهاباد و لە شۆڕشی ئەیلوولدا، ببووە بنچینەی باوەڕی تەواوی بە سەركەوتن و بەدیهێنانی ئامانجەكانی شۆڕشی كوردستان لەسەر ڕێبازی بارزانی و شەهیدانی كوردستان، هەروەها ئاماژەی بەوەش دا پێش دامەزراندنی كۆماری كوردستان لە مەهاباد، مامۆستا هێدی بە نهێنی چۆتە لای پێشەوا قازی محەممەد بۆ ئەوەی ببێتە ئەندامی "ژێ كاف"، كاتێك پێشەوا نەخشەی گەورەی كوردستانی پیشان داوە و پێی گوتووە دەزانێت ئەوە نەخشەی كوێیە؟! یەكسەر وەڵامی دەداتەوە كە ئەوە نەخشەی كوردستانی گەورەیە. ئینجا لەسەر دەستی پێشەوا و بە قورئان سوێند دەخوات كە تاوەكو لەژیاندا مابێت دەست و زمان و قەڵەمی بۆ خزمەتی كورد بەكار دەهێنێت و هەر واشی كرد.

(نێچیرڤان بارزانی) هەروەها ڕایگەیاند كە بارزانی نەمر خۆشەویستییەكی یەكجار زۆری بۆ مامۆستا هێدی هەبوو بە شێوەیەك كاتێك لە سەرەتای شۆڕشی ئەیلوولدا لەگەڵ براكەی ناچاربوو كوردستانی ئێران بەجێ بهێڵێت و بێتە كوردستانی عیراق، بارزانی لە شاری سلێمانییەوە لە ڕێگەی ڕێكخستنە نهێنییەكانی پارتییەوە، ئه‌وى هێنایە ناوچە ڕزگاركراوەكان لە دەڤەری پشدەر و بیتوێن و چەند جار داوای حكوومەتی شای ئێرانی ڕەتكردۆتەوە بۆ ڕاده‌ستكردنەوەی مامۆستا هێدی، كە شۆڕشی ئەیلوولیش تووشی نسكۆ بووە، ئەو ڕۆژەی بارزانی كوردستانی عیراقی بەجێ هێشتووە، شۆفێرەكەی خۆی بەدوایدا ناردووە و لەگەڵ خۆی بردوویەتی بۆ ئێران و لەلای خۆی پاراستوویەتی.
تیشكی خستە سەر ئەوەش كە دوای هاتنی مامۆستا هێدی بۆ ناو شۆڕشی ئەیلوول، هەر زوو بووەتە جێگەی متمانەی بارزانی و وەك هەڵسوڕێنەر و قایمقام لە قەلادزێ كاری پێ سپێردراوە. دوای ئەوەش لە ڕادیۆی شۆڕش لە ئێزگەی (دەنگی كوردستانی عیراق)، ڕۆڵێكی بەرچاوی پێدراوە و، ئینجا وەك بەرپرسی دارایی و پێشمەرگەیەك، ئەوسەر و ئەمسەری كوردستانی عیراقی كردووە، بۆ ڕێكخستنی كاروباری داراییی هێزەكانی پێشمەرگە و بەهۆیەوە زۆر ڕۆژی بە برسێتی بەڕێكردووە، بەڵام باوەڕی لەق نەبووە.
هەروەها لە بەشێكی دیكەی وتەكەیدا ئاماژەی بە پەرتووكی (كاروانی خەیاڵ)ی مامۆستا هێدی كرد كە وێنە زیندووەكانی ژیانی خۆی گێڕاوەتەوە لەگەڵ پێشمەرگە و خەڵكی كوردستاندا كە زۆر بە جوانی و بە زمانێكی پاراوی كوردی نووسیویەتی و داواشی لە گەنجانی كوردستان كرد ئەم پەرتووكە و هەموو بەرهەمەكانی مامۆستا هێدی بخوێننەوە كە توانایەكی زۆری ئەدەبی و غەزەلنووسیی ئەو شاعیرە گەورەیە نیشان دەدەن.

لە كۆتایی وتەكەیدا (نێچیرڤان بارزانی) بیرەوەرییەكی خۆی و مامۆستا هێدی شاعی گێڕایەوە كە جارێكیان لەسەر ئەنجامدانی كارێك لێی تۆراوە و بانگی كردووە و گوێچكەی گرتووە و زللەیەكی لێداوە و پێی گوتووە گەر لە مناڵییەوە ئاوەها گوێچكەم گرتبای و دوو زللەم لێدابای ئەمڕۆ ئەو كارەت نەدەكرد.


دەقی وتەی  سەرۆكوەزیرانی هەرێمی كوردستان لە ڕێوڕەسمی یادی مامۆستا هێدی شاعیر:


ئامادەبووانی بەڕێز،
نووسەران و ڕۆشنبیرانی هێژا،
بنەماڵە و ئاشنایانی نووسەر و شاعیری گەورەمان مامۆستا هێدی..

ڕۆژتان باش و بەخێربێن بۆ كۆڕی یادكردنەوەی مامۆستا خالیدی حوسامی، ناسراو بە مامۆستا هێدی. مامۆستا هێدی لەلای ئێمە یادگارێكی كۆماری كوردستان و پێشەوای شەهید قازی محەممەد و، شۆڕشی ئەیلوول و بارزانیی نەمر بوو.
مامۆستا هێدی لەلای ئێمە نموونەی پێشمەرگەیەكی بە بیروباوەڕ، شاعیرێكی گەورە و نووسەرێكی زانا بوو. مامۆستا هێدی نموونەیەكی بەرزی وەفاداری بوو، لەبەر ئەوەش هەمیشە شانازیمان بە مامۆستا هێدییەوە كردووە و هەمیشەش شانازی پێوە دەكەین.

مامۆستا، نموونەیەك بوو لە جوامێری و شۆڕشگێڕی و وەفاداریی خەڵكی خۆشەویستی بۆكان و مەهاباد لەگەڵ شۆڕش و بارزانیدا. پەیوەندیی ئێمە لەگەڵ خزمان و بنەماڵەی بەڕێزی، پەیوەندییەكی زۆر فراوان بوو. ئەوەش لە خۆشەویستیی هاوبەشی هەردوولاوە سەرچاوەی دەگرت‌.

مامۆستا هێدی، كە ئێمە زۆر جار بە (خالیداغا) ناومان دەهێنا، لاى بنه‌ماڵه‌ى ئێمه‌ شوێنێكی تایبەتی هەبوو، شوێنێكی تایبەتی لای من هاوتەمەنەكانی من و ئەوانەی كەمێك لە من گەورەتر بوون یان بچووكتر بوون، جێگەی تایبەتی هەبوو. چونكە دوای نسكۆی شۆڕشی ئەیلوول و ئاوارەبوونمان و خەریكبوونی گەورەكانی ئێمە بە هەڵگیرساندنەوەی شۆڕشەوە، ئەو زۆر هەوڵی دا و ئاسانكاریی زۆری بۆ كردین بۆ ئەوەی بتوانین بچینە قوتابخانە و بەردەوام بین لە خوێندن، زۆریش بایەخی بە خوێندنی ئێمە دەدا. هەروەك چۆن كاروباری پەناهندەكانی هەڵدەسووڕاند و، هەر ئەویش زۆر لە نامە گرنگەكانی بارزانیی نەمری دەنووسین بۆ دەزگاكانی حكوومەتی ئێران و بۆ شای ئێران لەو كاتەدا. هەروەك خۆیشی دەیگوت، ئەو نامانەی ئەو دەینووسین، بارزانی ئەوەندە متمانەی پێ هەبوو، بەبێ خوێندنەوە، ئیمزای دەكردن.

هەروەها بەهۆی هۆگریی خۆمەوە بە ئەدەب، پەیوەندیی من لەگەڵ هەردوو ڕەوانشاد مامۆستا هێدی و مامۆستا هەژاری موكریانی، پەیوەندییەكی زۆر بەهێز بوو. بەهۆی ئەوەوە، زۆر شیعری هەندێك لەو شعرانەی ئەوم لەبەر بوون. ئینجا كە دەیانبینی شیعری هەندێك لەو شاعیرانەم لەبەرە، زۆریان پێخۆشبوو و خۆیان لەمنەوە نزیك دەبینی، بە هەمان ئەندازەی نزیكایەتی و خۆشەویستیی من بۆ ئەوان. پەیوەندیی من لەگەڵ مامۆستا هێدی و مامۆستا هەژار، بەشێكن لە یادگارییە شیرینەكانی ژیانی بەندە.
مامۆستا هێدی كە پێش ٩٠ ساڵ لە گوندی (شێخاڵی) نێوان هەردوو شاری بۆكان و مەهاباد لە بنەماڵەیەكی دیار لەدایك ببوو، لەگەڵ هەردوو ڕۆشنبیر و شاعیری گەورە هێمن و هەژاری موكریانى، سێكوچكەی ڕۆشنبیری و ئەدەبیاتی موكریانیان پێكهێنا و، بوونە كۆڵەگەیەكی بەرچاوی ڕۆشنبیری و ئەدەبی كوردی، كە بەرهەم و ناویان هەمیشە و بۆ هەتا هەتایە شوێنێكی پڕشنگداریان لە مێژووی ئەدەبی كوردیدا دەبێت.

لەناو دڵی مامۆستا هێدیدا، خۆشەویستییەكی زۆر گەورە هەبوو بۆ بارزانی، ئەو خۆشەویستییە وایكردبوو كە بۆ بیرەوریی ساڵانەی بارزانیی نەمر و دواتریش بۆ بیرەوریی بارزانیی نەمر و ئیدریس بارزانیی باوكم پێكەوە، شیعری زۆر بەرز و پڕ هەست بنووسێت. كە لە ڕێوڕەسمی بیروەرییەكاندا ئەو شیعرانەی دەخوێندنەوە، وشەكان لە ناخییەوە هەڵدەقوڵان، لەبەر ئەوەش زۆر زوو دەچوونە ناو دڵ و دەكەوتنە سەر زمانی دڵسۆزان و، وەك شاكاری شیعری؛ خۆیان دەنواند.
هەر بۆ نموونە تەماشای ئەو هەستەی مامۆستا هێدی بكەن كە لە شیعرێكیدا بۆ بیرەوەریی بارزانی نووسیویه‌تى و دەڵێ:

خەمێك كە خەو دەستێنێ  
كە دێ ئەو پەیامە دێنێ
مردن بۆ گەل ئەركی مەیە
هەركەس سپاردێكی هەیە
دەبینم گشت كاتێ لەنوێ
بارزانی یە بۆ من دەدوێ
هەست و هۆشم دادەگرێ
هێند بەرزە تەفسیر هەڵناگرێ
بە ڕابردوومدا دەچمەوە
جوان وەبیر خۆم دێنمەوە
خەیاڵ دێ دەورم دەتەنێ
ئەو بەهێز و من بەتەنێ
بەهێز و باریكتر لە موو
ئەو باڵ دەگرێ و منیش لەدوو

بەڕاستیش مامۆستا هێدی تاوەكو دوایین ساتی ژیانی، هەر لەسەر ڕێبازی بارزانی مایەوە. دڵسۆزی و وەفاداریی مامۆستا هێدی بۆ بارزانی لە هیچ كاتێك و لەناو هیچ كێشە و ئاڵۆزییەكی ناوخۆیی كوردیدا نەدەوەستا، بەڵكو ڕۆژ لە دوای ڕۆژ زیاتر دەبوو. ئەو باوەڕەی كە وەك نووسەر و پێشمەرگەیەك لەلایەن مامۆستا هێدی بۆ بارزانیی نەمر دروست ببوو، لە كۆماری كوردستان لە مەهاباد و لە شۆڕشی ئەیلوولدا، ببووە بنچینەی باوەڕی تەواوی بە سەركەوتن و بەدیهێنانی ئامانجەكانی شۆڕشی كوردستان لەسەر ڕێبازی بارزانی و شەهیدانی كوردستان.

مامۆستا هێدی بە پەروەردەی بنەماڵەكەی؛ خاوەن بیروباوەڕێكی كوردستانی بوو. پێش دامەزراندنی كۆماری كوردستان، ئەو ڕۆژەی لە مەهاباد بە نهێنی دەچێتە لای پێشەوا قازی محەممەد، بۆ ئەوەی ببێتە ئەندامی "ژێ كاف" كە پێشەوا نەخشەی گەورەی كوردستانی پیشان دەدات و پێی دەڵێ: دەزانی ئەوە نەخشەی كوێیە؟! یەكسەر وەڵامی دەداتەوە كە: بەڵێ دەزانێت ئەوە نەخشەی كوردستانی گەورەیە. ئینجا لەسەر دەستی پێشەوا و بە قورئان سوێند دەخوات كە تاوەكو لەژیاندا مابێت: دەست و زمان و قەڵەمی بۆ خزمەتی كورد بەكار دەهێنێت. بە ڕاستیش بە درێژاییی تەمەنی بە كردەوە، مامۆستا پابەندی ئەو سوێندەی بوو كە لە پێش پێشەوا قازی محەمەد خواردبووی.
مامۆستا هێدی، كە بە درێژاییی تەمەنی وەفادار و دڵسۆز مایەوە بۆ وڵاتەكەی، هەمیشە دەیگوت وەفاداری ئەگەر هەبێت لەلای بارزانییە، پشوودرێژیش لە هەموو كەس زیاتر هەر لەلای بارزانییە.

مامۆستا هێدی چەند جارێك بۆ ماوەی كورت و بۆ كار، لە سەردەمی كۆماری كوردستاندا لە مەهاباد جەنابی بارزانی بینیبوو، بەڵام كە لە ساڵانی سەرەتای شۆڕشی ئەیلوولدا لەگەڵ براكەیدا ناچاربوو كوردستانی ئێران بەجێ بهێڵێت و بێتە كوردستانی عیراق، بارزانی لە شاری سلێمانییەوە لە ڕێگەی ڕێكخستنە نهێنییەكانی پارتییەوە، ئه‌وى هێنایە ناوچە ڕزگاركراوەكان لە دەڤەری پشدەر و بیتوێن. بارزانی چەند جار داوای حكوومەتی شای ئێرانی ڕەتكردووەتەوە بۆ ڕاده‌ستكردنەوەی مامۆستا هێدی، كە شۆڕشی ئەیلوولیش تووشی نسكۆ بووە، ئەو ڕۆژەی بارزانی كوردستانی عیراقی بەجێ هێشت، شۆفێرەكەی خۆی بەدوایدا ناردووە و لەگەڵ خۆی بردوویەتی بۆ ئێران و لەلای خۆی پاراستوویەتی.

مامۆستا هێدی لەبەر ئەوەی كەسێكی خوێندەوار و لە بنەماڵەیەكی نیشتمانپەروەری ناسراو بوو، دوای ئەوەی هاتووەتە ناو شۆڕشی ئەیلوول، هەر زوو بووەتە جێگەی متمانەی بارزانی و، وەك هەڵسوڕێنەر و قایمقام لە قەلادزێ كاری پێ سپێردراوە. دوای ئەوەش لە ڕادیۆی شۆڕش لە ئێزگەی (دەنگی كوردستانی عیراق)، ڕۆڵێكی بەرچاوی پێدراوە و، ئینجا وەك بەرپرسی دارایی و پێشمەرگەیەك، ئەوسەر و ئەمسەری كوردستانی عیراقی كردووە، بۆ ڕێكخستنی كاروباری داراییی هێزەكانی پێشمەرگە.
مامۆستا هێدی لەناو شۆڕش و خزمەتی پێشمەرگایەتیدا زۆر ڕۆژان برسیبووە، بەڵام باوەڕی لەق نەبووە. ئەوەی گێڕاوەتەوە كە لە كاتی پێشمەرگایەتیدا ڕۆژی وا هەبووە چوار جار ئاگری كردۆتەوە لە شاخەكانی كوردستاندا، بۆ ئەوەی ژەمە خواردنێك بۆخۆی دروست بكات و بەردەوامیش لەو شوێنانە فڕۆكە هاتووە و نەیتوانیوە خواردنەكەی ئامادە بكات، ناچار بووە ئاگرەكە بكوژێنێتەوە، بەڵام لەگەڵ ئەوەشدا باوەڕی زیاتربووە كە تاوەكو سەركەوتنی نەتەوەكەی، نابێ كۆڵ بدات.
ئەگەر كتێبی (كاروانی خەیاڵ) بخوێننەوە، بە زمانێكی كوردیی ڕەوان و زمانێكی ئەدەبیی جوان، وێنە زیندووەكانی ژیانی خۆی گێڕاوەتەوە لەگەڵ پێشمەرگە و خەڵكی كوردستاندا، وەك فیلمێكی سینەمایی لە جواننووسیی مامۆستا هێدیدا دەبینن.

زۆرم پێخۆشە گەنجانی كوردستان كتێبی (كاروانی خەیاڵ) و هەموو نووسینەكانی مامۆستا هێدی بخوێننەوە، بۆ ئەوەی بزانن خەڵكانێك لە نەوەكانی پێش ئێمە چۆن بەدوای كتێبدا گەڕاون، لەو باوەڕەدام حەزێكی زۆر بۆ خوێندنەوە لەلایەن هەموو كەسێك دروست دەبێت.

دڵنیام كاتێك چیرۆكی كڕینی نامیلكەی (پەندنامەی عەتار) دەخوێننەوە، كه‌ لەلایەن مامۆستا هێدییەوە لە مەلا ساڵحی سلێمانی لە گوندەكانی بانەی خۆشەویست كڕاوه‌ و، چۆن پارەی بۆ پەیدا كردووە؟، چەند خۆشحاڵ بووە بەوەی كە توانیویەتی ئەو نامیلكەیە بكڕێت؟، ئه‌وسا دەزانن كە دەبێ بەردەوام بخوێنینەوە!.

كە دەبینن دەزگاكانی ڕاگەیاندن لە شاخ چۆن كاریان كردووە، زیاتر ڕێز لە ماندووبوونی ڕۆژنامەنووسان و نووسەرانی ئەو سەردەمی گەلەكەمان دەگرن، كە ژیاننامەی ئەو پێشمەرگەیە دەخوێننەوە، دەزانن لە كوێوە و بە چ موسیبەتێك ئێمە گەیشتووینەتە ئەمڕۆ.

لەناو ئەو هەموو دەردەسەریەی ژیان و ڕۆژگارە سەختەكانی پێشمەرگایەتیدا، دیوان و شیعرەكانی مامۆستا هێدی توانای ئەدەبی و غەزەلنووسیی ئەو شاعیرە گەورەیەی گەلەكەمان نیشان دەدەن. مامۆستا هێدی حەزی لە ژیانێكی خۆش بووە، لەبەر ئەوە بۆ ژیان تێكۆشاوە و، هەستی ڕەنگینی خۆیشی بۆ ژیان زۆر داهێنەرانە ڕژاندووەتە ناو شیعرەكانییەوە. لەبەر ئەوەی خۆی وەك پێشمەرگەیه‌ك، سەختییەكانی ژیانی پێشمەرگایەتی بینیوە، شاكاری بۆ پێشمەرگە نووسیوە لە شعرەكانیدا.
بارزانیی نەمر، مامۆستا هێدی زۆر خۆشدەویست، ئەو خۆشەویستی و ڕێزگرتنە لەلای باوكم و جەنابی سه‌رۆك مەسعوود بارزانیش بۆ مامۆستا هێدی بە هەمان ئەندازە مایەوە و، مامۆستا هێدیش تاوەكو دوایین ساتی ژیانی، بە خۆشەویستی بۆ بارزانی و وەفاداری بۆ ئامانجەكانی گەلەكەمان ژیا.

مامۆستا هێدی بە خەبات و بەرهەمەكانی؛ هه‌میشه‌ زیندوو و بە زیندوویی دەمێنێتەوە، یادی ئەو گەورەیە بەخێر بێت و گۆڕی پڕ لە نوور بێت هەتا هەتا و ئێوەش هەموو لایەكتان بەخێربێن سەرچاوان.

لە نێوان من و مامۆستا پێش ئەوەی كۆتایی پێ بهێنم با ئەوەشتان بۆ بگێڕمەوە. جارێكیان بابەتێك هەبوو و مامۆستاش هەندێك جار وەك كاك ناسریش دەزانێت پێكەوەبووین، هەندێك جار تووڕە دەبوو و منیش نازانم شتێكم كردبوو بەدڵی نەبوو توڕە ببوو، هات گوتی پێی بڵێن با بێت ئیشم پێیە، چووم بە هەموو هێزی گوێی گرتم و ڕایكێشا و گوتی ئەگەر كاتێك منداڵ بووی و دەرسم پیشان دەدای ئاوەها گوێم بگرتبای و ڕابمبكێشابا و دوو زللەشم لێدابای، ئێستا ئەوەت نەدەكرد. ئیمە ئاوابووین لەگەڵ مامۆستا، هەم گوێی ڕاكێشام و هەم زللەكەشی لێدام ئەو وەختە. ئێمە لێمان قبوڵ دەكرد چونكە وەكو ماممان وابوو و زۆر كاریگەریی لەسەر ئێمە هەبوو. خوای گەورە بە بەهەشتی بەرینی شاد بكات و گۆڕی پڕ لە نوور بێت و سەبر و ئارامیش بداتە خانەوادەكەی، یادی ئەو خۆشەویستەش هەمیشە بەخێر بێت و بەخێر بێن سەرچاو.
 




دوایین هەواڵەکان

سەبری: هەولێر و ئانکارا بۆ کردنەوەی دەروازەی سەرزێڕێ دانوستانیان کردووە

WEDNESDAY, 24 MAY 2017 17:05:55

کانی ماسێ-KDP.info-  حکوومەتی ھەرێمی کوردستان لە ھەوڵدایە لەگەڵ تورکیا بگاتە ڕێککەوتن بۆ ئەوەی دەروازەیەکی دیکەی بازرگانی لە نێوانیاندا بکرێتەوە و بەڕێوەبەری ناحیەی کانی ماسیی پارێزگای دھۆکیش دەڵێت، لە ئایندەیەکی نیزیکدا دەروازەی سنووری سەرزێڕێ دەکرێتە دەروازەیەکی بازرگانیی نێوان ھەرێم و تورکیا.

پرۆفیسۆر خەلیل ئیسماعیل: دەبێ سنوورێک بۆ حەشدی شەعبی دابنرێت

WEDNESDAY, 24 MAY 2017 16:05:27

هەولێر-KDP.info-  پسپۆڕێکی جۆگرافیای سیاسی پێی وایە دەبێ سنوورێک بۆ حەشدی شەعبی دابنرێت و ڕێ نەدرێت مەرامی سیاسیی ھەندێ لایەن و وڵات لە ناوچە کوردستانییەکانی دەرەوەی ئیدارەی حکوومەتی ھەرێمدا جێبەجێ بکرێت و دەشڵێت، حەشد دەیەوێت سنووری نێوان سووریا و عێراق بکەوێتە ژێر دەستییەوە.

فەرمانگەیەکی چاکسازی بۆ جێبەجێکردنی پڕۆژەی ھەیکەلی نوێی وەزارەتی پێشمەرگە دروست دەکرێت

WEDNESDAY, 24 MAY 2017 12:05:59

ھەولێر-KDP.info- وەزارەتی پێشمەرگە رایدەگەیێنێت، بڕیارە فەرمانگەیەکی نوێ بە ناوی فەرمانگەی چاکسازییەوە دروست بکرێت، کە مەبەست لێی جێبەجێکردنی پڕۆژەی ھەیکەلی نوێی وەزارەتی پێشمەرگەیە.

 
"هەنگاوەکانی بارزانی بۆ سه‌ربه‌خۆییی كوردستان، زۆر ورد و كرده‌نین"

WEDNESDAY, 24 MAY 2017 12:05:19

هەولێر-KDP.info-  (سۆران سێوكانی) باوەڕی وایە کە هەنگاوەکانی (سه‌رۆك بارزانی) بۆ ڕاپرسی بۆ سه‌ربه‌خۆییی كوردستان، زۆر ورد و كرده‌نین. (د.عەرەفات کەرەم)ـیش دەڵی، لایەنە عێراقییەکان گەیشتوونەتە ئەو بڕوایە کە ھەرێم بڕیاری خۆی داوە و پەشیمان نابێتەوە.

 
بەڕێوەبەری دەزگای هەواڵگری و بەرگریی ئەمریکا: سەربەخۆیی کوردستان پەیوەستە بە کاتەوە

WEDNESDAY, 24 MAY 2017 10:05:20

هەولێر-KPD.info-   بەرێوەبەری دەزگای هەواڵگریی بەرگریی ئەمریکا ڕایگەیاند، پرسی سەربەخۆیی هەرێمی کوردستان تەنیا پەیوەستە بە کاتەوە و، لە مانگی ئۆکتۆبەری ئەمساڵێشدا ڕیفراندۆم لەسەر ئەو پرسە دەکرێت.



 
© 2017 Kurdistan Democratic Party, KDP