هەولێر-KDP.info/ وەها چاوەڕوان دەکرێت شەشەمین کۆنگرەی بەرەنگاربوونەوەی سزای لەداردان لە هەولێری پایتەخت ببەسترێت و، کەسایەتیی هەرێمی و نێودەوڵەتییش تێیدا بەشدار دەبن.
هەماهەنگیکاری هاوپەیمانیی کوردستانی بۆ بەرەنگاربوونەوەی لەداردان، پارێزەر شوان سابیر، بە شەرقولئەوسەتی ڕاگەیاندووە، "هەڵبژاردنی هەولێر بۆ تێدا سازدانی وەها کۆنگرەیەک، پێوەندیی بەو سەقامگیرییە ئەمنی و سیاسییەوە هەیە کە شارەکە و هەرێمی کوردستان بە گشتی هەیەتی، هاوکات پێوەندی بە تۆمارکردنی کەمترین سزای لەداردانەوە هەیە، بەراورد بە عێراق و وڵاتانی ناوچەکە کە زۆرترین تۆماریان هەیە.
سابیر ڕوونی کردەوە کە عێراق لە دەیەمینی ئەو وڵاتانەیە کە هێشتا بە بەرفراوانی سزای لەداردان تێیدا جێەبەجێ دەکرێت. زیاتر ڕوونی کردەوە، لە ساڵی 2012 عێراق لە پێشەوەی 10 وڵاتانی یەکەم بوو لە نێوان وڵاتانی عەرەبی و ئیسلامیدا کە سزای لەداردانیان جێبەجێ کردووە.
ئەو نەیشاردەوە کە، عێراق هێشتا بۆ کەمکردنەوە و دانانی سنوورێک بۆ سەپاندنی سزای لەداردان گوێ بە داواکارییە نێودەوڵەتییەکان نادات، ئەمە سەرباری ئەوەی کە لە لایەن ڕێکخراوە نێودەوڵەتییەکانەوە گوشاری زۆری لەسەرە.
ئەو پارێزەرە هاروەها گوتی، دواسزای لەداردان لە هەرێمی کوردستان لە ساڵی 2008 بوو، ئەمەیش بە واتای تێپەڕبوونی 5 ساڵ بەسەر جێبەجێکردنی سزای لەداردان دێت، ئەمە سەرباری ئەوەی کە زیاتر لە 159 بڕیاری دادوەری بۆ سزای لەداردان هەن، کە بڕیاری هەندێکیان بۆ 15 ساڵ پێشتر دەگەڕێنەوە و هەڵبەت ئەمە دەیسەلمێنێت کە هەرێمی کوردستان سزای لەداردانی وەستاندووە.
ئەو پارێزەرە هاوکات جەختی کردەوە، زۆرێک لە وڵاتانی نێودەوڵەتی کە بەشدارییان لە کۆنگرەکانی عەجلون و مەدرید و جەزایردا کردووە، ڕۆڵی هەرێمی کوردستانیان لە بەرەنگاربوونەوەی سزای لەدارداندا بەرز نرخاندووە، هاوکات هاندەر بوون بە ئەوەی شەشەمین کۆنگرەی نێودەوڵەتی بەرەنگاربوونەوەی سزای لەداردان لە هەولێر ببەسترێت و بەشداربووانیش پێشوازییان لێی کردووە.
ئاماژەیشی دا، هاوپەیمانیی کوردستانی بە هەماهەنگیی دەستەی سەربەخۆی مافەکانی مرۆڤ لە هەرێمی کوردستان، هێشتا دانوستانیان لەگەڵ ڕێکخراوی UNDP، بۆ سەرپەرشتیکردن و پشتیوانیکردنی کۆنگرەکە و بەستنی لە هەولێر بەردەوامە و بە شێوەیەکی مەبدەئیش رەزامەندییان نیشان داوە.