دهۆک-KDP.info-سەرۆکێ حکومەتا هەرێما کوردستانێ د رێورسمێن دەرچوویێن گەرا ئێکی یا زانکۆیا ئەمریکی یا کوردستانێ ل دهۆکێ پەیڤەک پێشکێشکر.
سەرۆکێ حکومەتا هەرێما کوردستانێ مەسروور بارزانی گۆت:''ئەز گەلەک پێ بەختەوەرم وەک ئەز ژی وەک دەرچووییەکی زانکۆیا ئەمریکی ل ڤێرێ ئامادەمە، و ل گەل وەدا ب ڤێ هەلکەفتێ دا بەشدارم ، ئەز گەلەک شانازیێ دکەم کو زانکۆیا ئەمریکی ل دهۆکێ ل دەمێ ٥ ساڵێت بۆری دا سەرکەفتنەکا باش ب دەست خۆڤە دیتییە بوویە جهێ ئۆمیدی بۆ نەڤێین مە.
دیار ژی کر، ل ڤێرێ ئەز ب پێدڤی دبینم کو سوپاسییەکا تایبەتا ڕیبەڕێ مە جەنابێ سەرۆک مەسعوود بارزانی بکەم ژبۆ پاراستن و سەرکردایەتیا کوردستانێ بتایبەت ل رۆژێن دژووار دا ب سایا تێکۆشان و قوربانیدانا وی دا نەڤێین مە یێن پاشەرۆژێ پاشەرۆژەکا سەقامگیر یا هەی و سوپاس بۆ برایێ منێ بەرێز کاک نێچیرڤان بارزانی سەرۆکێ هەرێما کوردستانێ ل دەمێ سەرۆکایەتیا حکومەتا وی دا بایەخەکا باش ب پرۆسەیا خوێندنێ دایە و سوپاس بۆ پێشمەرگە و دەزگەهێن ئاسایشێ یێن قەهرەمان کو کوردستان پاراستیە، سوپاس بۆ سەرۆک و ڕاگر و مامۆستا تەڤایا ستافێ زانکۆیا ئەمریکی یا کوردستانێ ل دهۆکێ سوپاس بۆ مالبات و کەسوکارێن قوتابیان، سوپاس بۆ هەمووان و وان لایەنێن دی یێن هەڤکاری و هاریکاری بەرەڤ پێشڤەجۆن گەشەکرنا ڤێ زانکۆێی دایی کو ئەڤرۆ نێزیکی ٦٠٠ قوتابیان ١٣٥ ستاڤ و کارمەندان هەنە.
گۆتژی:'' ل کابینەیا ٩ یا حکومەتا هەرێما کوردستانێ ئێک ژ کارێن بەراهێی یێن کارنامەیا حکومەتی گرنگیدانە ب خوێندن و پەروەردێ و بایەخدانە ب خوێندنا بلند و ڤەکۆلینێن زانستی و پێشڤەبرنا ئاستێ زانستی یێن زانکۆێین مە، بێ گوومان ب جیهئینانا ئەڤان ئەرکان ژی هەڤبەندە ب باشبوونا ڕەوشا ئابووری کو هیڤیدارم کێشەیێن مە ب ل گەل حکومەتا عیراقێ ل سەر بنەمایێ جێبەجێکرنا بنەمایێن دەستووری چارەسەر ببن، داکوو حکومەتا هەرێما کوردستانێ بشێت ب رەنگەکی باشتر خزمەتگووزاریان پێشکێش بکەت بۆ هەڤوەلاتێین هەرێما کوردستانێ، ل دوماهێی من دڤێت پەیڤا خۆ ئاراستەیی قوتابیێت دەرچوویێت ئەڤرۆ بکەم پیدڤیە بزانن ئەڤ زانکۆیە بۆ هەوە یا هاتیە دامەزراندن، دا کو ببنە سەرکردەیێن پاشەرۆژا کوردستانێ ل بوارین جودایێن ژیانێ دا، هیڤیدارم ئەم بەشدار بین د ئاڤەدانکرنا کوردستانەکا بهێز دا.
کــاروان بــاعەدری