هەولێر-KDP.info- سەرۆك بارزانی هەڵوێستەكانی ئیسماعیل بێشكچیی لەمەڕ دۆزی ڕەوای گەلی كوردستان بە گرینگ ناو برد. ڕاشیگەیاند "بێشكچی بۆ هەموومان جێگەی شانازییە و سیمبولە و بۆچوون و تێڕوانینەكانی لەبارەی گەلی كوردستان جێگەی بایەخدانێكی زۆرە."
ئەمڕۆ دووشەممە 15ـی 10ـی 2018، لە سەلاحەددین، سەرۆك مەسعوود بارزانی پێشوازی لە دۆستی گەلی كورد و ڕووناكبیر و مێژوونووسی تورك ئیسماعیل بێشكچی كرد.
لە دیدارەكەدا ئیسماعیل بێشكچی سەركەوتنی لیستی پارتی دیموكراتی كوردستانی لە هەڵبژاردنەكانی پارلەمانی كوردستان و مانگی پێنجی عێراق بە گرنگ و مانادار وەسف كرد و، وێڕای ئاماژەدان بە ڕیفراندۆمی گەلی كوردستان جەختی لەوە كردەوە كە ئەو سەركەوتنانەی لیستی پارتی ئاماژەیە بەوەی كە سەرۆك بارزانی خاوەندارێتیی دۆزی ڕەوای گەلی كوردستان دەكات.
لای خۆیەوە سەرۆك بارزانی سوپاسی هەڵوێستەكانی ئیسماعیل بێشكچی كرد لەمەڕ دۆزی ڕەوای گەلی كوردستان و پێزانینیشی هەبوو بۆ هەوڵ و چالاكی و نووسینەكانی بێشكچی لە پشتگیریكردنی گەلی كوردستان و ڕایگەیاند كە بێشكچی بۆ هەموومان جێگەی شانازییە و سیمبۆڵە و بۆچوون و تێڕوانینەكانی لەبارەی گەلی كوردستان جێگەی بایەخدانێكی زۆرە.
سەرۆك بارزانی لە درێژەی وتەكانیدا ڕۆشنایی خستەسەر ڕیفراندۆم و ڕووداوەكانی شازدەی ئۆكتۆبەر و هەروەها سەركەوتنەكانی پارتی دیموكراتی كوردستان لە هەڵبژاردنەكانی عێراق و هەرێمی كوردستان و، ئەوەی دووپات كردەوە كە گەلی كوردستان پارتی دیموكراتی كوردستانی بەهۆی پێداگری لە مافەكانی گەلی كوردستان و هەڵوێستە نیشتیمانییەكانی پاداشت كرد و سەركەوتنی پارتی بەهۆی بەرگریكردنی بووە لە ماف و ئیرادەی گەلی كوردستان.
خۆڕاگری و تێكۆشانی گەلی كوردستان و مێژووی خەباتی خانەوادەی بارزانی و دەڤەری بارزان تەوەرێكی دیكەی ئەو دیدارە بوو.