Kurdî  ■  كوردی  ■  عربي
MON, 10 DEC 2018 07:57 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

کونسووڵی کوێت پیرۆزبایی لە پارتی کرد
| KDP.info


هەولێر-KDP.info-  شاندێکی مەکتەبی پەیوەندییەکانی دەرەوەی پارتی دیموکراتی کوردستان سەردانی کونسووڵخانەی گشتیی میرنشینی کوێتی کرد و کونسووڵی کوێت، پیرۆزبایی لە سەرکەوتنەکانی پارتی دیموکراتی کوردستان کرد لە هەردوو هەڵبژاردنی پەرلەمانی کوردستان و ئەنجومەنی نوێنەرانی عێراق.

هۆشیار سیوەیلی، بەرپرسی مەکتەبی پەیوەندییەکانی دەرەوەی پارتی دیموکراتی کوردستان بە یاوەریی شاندێکی مەکتەب سەردانی کونسووڵخانەی گشتیی میرنشینی کوێتیان کرد و لە لایەن دکتۆر عومەر کەندەری پێشوازی کران.

بەرپرسی مەکتەبی پەیوەندییەکانی دەرەوەی پارتی سوپاسی ئەو پێشوازییەی کرد و پێزانینی سەرکردایەتیی پارتیشی بۆ دەوڵەت و خەڵکی میرنشینی کوێت خستە ڕوو کە لە ماوەی چەند ساڵی ڕابردوودا بەردەوام هاوکاریی مرۆییان پێشکەش کردووە و ڕۆڵێکی کاریگەر و گرنگییان هەبووە بە بەخشینی پێداویستی بە ئاوارەکان، ئەمەش هاوکارییەکی باش بووە بۆ حکوومەتی ھەرێمی کوردستان لە کاتێکدا کە زیاتر لە دوو ملیۆن پەنابەر ڕوویان لە هەرێمی کوردستان کرد و حکوومەتی فیدراڵیی عێراقیش نەک تەنیا هاوکاریی پێشکەش نەکردووە، بەڵکو بەشەبودجە و شایستە داراییەکانی هەرێمی کوردستانی بە بڕیارێکی سیاسی و نادەستووری بڕی، لە کاتێکدا کە هەرێمی كوردستان شەڕی تیرۆریستانی داعشی دەکرد، کە بەشێکی زۆری خاکی عێراقیان داگیر کردبوو.

کونسووڵی گشتیی کوێت، د. عومەر، پیرۆزبایی لە سەرکەوتنەکانی پارتی دیموکراتی کوردستان کرد لە هەردوو هەڵبژاردنی پەرلەمانی کوردستان و ئەنجومەنی نوێنەرانی عێراقدا. دکتۆر کەندەری باسی لە خەباتی پارتی دیموکراتی کوردستان و جەنابی سەرۆک بارزانی کرد لە قۆناغە جیاوازەکاندا و ئەو هەڵوێستە مێژووییانەی کە بەرامبەر کوێت هەیانبووە. لە درێژەی گفتوگۆگاندا سیوەیلی باسی لە بارودۆخی ئێستای عێراق و هەرێمی کوردستان کرد لە پاش هەڵبژاردنەکانی ئەنجومەنی نوێنەرانی عێراق و پەرلەمانی کوردستان و، دەربارەی عێراق سیوەیلی ئەوەی ڕاگەیاند کە پارتی دیموکراتی کوردستان لەسەرەتای خەبات و کاری سیاسیی خۆیەوە باوەڕی تەواوی بە گفتوگۆ و  لێکتێگەیشن هەبووە بۆ چارەسەری کێشەکان لەگەڵ حکوومەتە یەک لە دوای یەکەکانی عیراق،  ئێستاش پارتی هەر لەو چوارچێوەیەدا کار دەکات. بەداخەوە لە عێراقدا لێکتێگەیشنی تەواو بۆ مافە ڕەواکانی گەلی کوردستان نییە، ئەمەش بووەتە هۆکاری سەرەکی بۆ گرفت و هەندێ جاریش گرژی بۆ کوتاییهێنان بەو بارودۆخە و بەدەستهێنانی سەقامگیری و ئایندەیەکی گەش بۆ عێراق و ناوچەکەش پێویستی بە لێکتێگەیشن و قبوڵکردنی یەکتر هەیە.

کونسووڵی گشتیی کوێت، بەردەوامبوونی هاوکاریی وڵاتەکەی بۆ هەرێمی کوردستان دووپات کردەوە و هیوای خواست کە لە کاتێکی نزیکدا هەردوو حکوومەتی نوێی هەرێمی کوردستان و عێراقی فیدراڵ پێک بهێندرێت و دەستووری هەمیشەییی عێراق و لێکتێگەیشن بکرێتە بنەمای کارنامەی کابینەی داهاتووی حکومەتی فیدراڵ و حکوومەتی هەرێم. سەبارەت بە حکوومەتی ھەرێم بەرپرسی پەیوەندییەکانی دەرەوەی پارتی ڕایگەیاند، گرنگە باردۆخی سیاسی و سەقامگیری و ئارامی و بەردەوامیی سەرکەوتنی ئابووری و پێشکەشکردنی خزمەتگوزاری ئامانج و کاری داهاتووی هەردوو حکوومەتی هەرێم و فیدراڵ بێت.

گۆڕانکارییە سیاسی و دیپلۆماسییەکان و بارودۆخی ناوچەکە بەشێکی دیکەی ئەو دیدارە بوو، هەردوولا جەختیان لە گرنگی و بەردەوامبوونی هەماهەنگی و ئەم جۆرە دیدار و گفتوگۆیانە کردەوە.




دوایین هەواڵەکان

نێچیرڤان بارزانی سه‌ره‌خۆشی له‌ قه‌داسه‌تی پاتریارك مار گۆرگیسی سێیه‌م سڵێوه‌ ده‌كات

SUNDAY, 09 DECEMBER 2018 22:12:41

هه‌ولێر-KDP.info-  نێچیرڤان بارزانی سه‌رۆكوه‌زیرانی هه‌رێمی كوردستان، له‌ په‌یامێكدا هاوخه‌میی خۆی به‌ كۆچی دوایی خوشكی قەداسەتی پاتریارک مار گۆرگیسی سێیەم سڵێوە، پارتیارکی کەنیسەی ئاشووریی ڕۆژهەڵات لە جیهان و خانه‌واده‌كه‌ی ڕاده‌گه‌یێنێ كه‌ ئه‌مه‌ ده‌قه‌كه‌یه‌تی:

 
د.نەجمەدین کەریم: خیانەتی ١٦ ئۆکتۆبەر وایکرد ٥٠% خاک لە دەستبدەین

SUNDAY, 09 DECEMBER 2018 18:12:59

مێرگەسۆر-KDP.info-  بەڕێوەبەرایەتیی ڕۆشنبیریی هونەریی مێرگەسۆر و سەنتەری ڕۆشنبیریی مێرگەسۆر بۆ ساڵی چوارەم دیداری مێرگەسۆریان بەڕێوە برد و باس لە پاراستنی دەستكەوتەكانی هەرێمی كوردستان و بەهێزكردنی هەستی نەتەوایەتی لای تاكی كورد كرا.

 
فرسەت سۆفی: پارتی لە کوردستان هەوڵ بۆ چاکسازییەکی سەرتاسەری دەدات

SUNDAY, 09 DECEMBER 2018 18:12:28

ھەولێر-KDP.info- فرسەت سۆفی، ئەندامی فراکسیۆنی پارتی لە خولی پێشووی پەرلەمانی کوردستان ئاشکرای کرد کە بۆ پێکھێنانی کابینەی نوێی حکوومەتی ھەرێمی کوردستان، پارتی ھەوڵی حکوومەتێکی نوێ و  بەھێز دەدات و چوار ساڵی داھاتووش چاکسازییەکی سەرتاسەری لە ھەرێمی کوردستان ئەنجام دەدەین.

 
261 پارچەزەوی لە دهۆک دابەش کران

SUNDAY, 09 DECEMBER 2018 18:12:26

دهۆک -KDP.info- سەرۆکی کۆمەڵەی زێندانیانی سیاسی لە دهۆک ڕایگەیاند، ئەمڕۆ لە ڕێگای تیروپشکەوە ٢٦١ پارچەزەوی بۆ زێندانیانی سیاسی دابەش کران.

 
بەغدا دەیەوێ لە کاتی بەڕێوەچوونی سەرژمێریدا پێکھاتەکان لەسەر کورد ھەژمار نەکرێن

SUNDAY, 09 DECEMBER 2018 18:12:34

ھەولێر-KDP.info-   بڕیارە لە ساڵی دابێت ئامادەکاریی تەواو بۆ بەڕێوەچوونی سەرژمێریی گشتیی دانیشتوانی عێراق بکرێت و ئەندامێکی لیژنەی سەرژمێریش دەڵێ، بەغدا پیلانی ھەیە پرسیاری نەتەوە ھەر بە یەکجاری لە سەرژمێریی گشتیدا لاببرێت.

 


 
© 2018 Kurdistan Democratic Party, KDP