Kurdî  ■  كوردی  ■  عربي
TUE, 19 MAR 2019 13:50 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

پەکەکە بۆ لێرەیە!
| KDP.info


ئاریان فەرەج
پەكەكە ماوەیەكی دوورودرێژە سەدان گوندی هەرێمی كوردستانی داگیر كردووە و بەربەست بووە لەوەی خەڵكی ئەو ناوچانە بگەڕێنەوە سەر ژیان و ماڵی خۆیان و بگەڕێنەوە دۆخی سرووشتیی خۆیان. پەكەكە ڕێگر بووە ئەو گوندانە ئاوەدان بكرێن بۆیە خەڵك لە خێروبێری ئەو ناوچانە بێ بەش كراون. لە لایەكی تر تەعەداكردنی پەكەكە لە خەڵك و ڕفاندنی منداڵ و وەرگرتنی باج و سەرانە لە خەڵكیش هێندەی تر ژیانی بۆ خەڵكی ناوچە سنوورییەكانی هەرێمی كوردستان تووشی گرفت كردووە.

پرسیار ئەوەیە بۆ دەبێ پەكەكە ئەو ناوچانە داگیر بكات و خەڵكی كورد ئازار بدات؟ ئەگەر پەكەكە خەباتی چەكداری دەكات و خۆیان بە خەباتكار و ڕزگاركەر دەزانن بۆ ناچن گوندێكی كوردستانی توركیا ئازاد بكەن؟ بۆ لەجیاتی ئازادكردنی كوردستانی توركیا، هاتوونەتە باشوور و ژیانی خەڵكیان تاڵ كردووە و گوند و موڵكی هاووڵاتیانی هەرێم داگیر دەكەن؟
نابێ چیتر خەڵكی هەرێمی كوردستان ئەوە لە پەكەكە قبوڵ بكات و چیتریش ڕێگە نەدرێت لەناوخۆی كوردستان موزایەدەی كوردایەتی بە پەكەكە و بابەتی هاتنی سوپای تورك بكرێت. سوپای توركیا كە هاتووە و ناوچە سنوورییەكانی داگیركردووە ئەوە بە هۆی پەكەكەوە هاتووە، ئەوە پەكەكەیە دەستی سوپای توركی ڕاكێشاوە بۆ ناو هەرێم هەروەكچۆن لە عەفرین و ڕۆژئاوایش وایان كرد. خەڵكی هەرێم چ تاوانێكیان كردووە باجی داگیركاریی ئەو دوو هێزە بدات؟ پەكەكە بە هیچ شێوەیەك ڕاست ناكات و نیازیشی بەرانبەر هەرێمی كوردستان باش نەبووە، ئەگینا گۆڕەپانی شەڕ و چەكدارییان دەگواستەوە بۆ ناو توركیا و چیتر كەڵەگاییان لەسەر هاووڵاتیانی هەرێم نەدەكرد.

چەندین ساڵە حكوومەتی هەرێم و خەڵكی ناوچەكە داوا دەكەن پەكەكە ئەو گوندانە چۆڵ بكەن كەچی گوێیان بەو داوا ڕەوایەی خەڵك نەداوە، لە هەمانكاتدا دەبینین پەكەكە دوای بە كوشتدانی سەدان گەنجی كورد، زۆر شوێنی لە سووریا بە سەفەقە و بە قسەی خەڵكی تر چۆڵ كردووە. ئەو پرسیارە دەبێ لە موزایەدەچییەكانی ناوخۆ بكرێت كە بۆ پەكەكە بایەخ بە داوای هاووڵاتیانی هەرێم نادات و وا بە ئاسانیش مل بۆ سەفەقاتی تر شۆڕ دەكات؟
پەكەكە و ئەوانەی لە هەرێم بە جۆرێك سۆزیان بۆ پەكەكە هەیە و هەروەها لایەنەكانی ئۆپۆزیسیۆنی كوردستانی ئێرانیش پێویستە تێگەییشتنیان بۆ خەڵكی هەرێم هەبێت كە ئەگەر هەرێمی كوردستان وەك بنكەیەك بۆ چالاكی سەربازی لەدژی وڵاتان بەكار بهێندرێت ئەوە بیانوو دەدرێتە وڵاتان كە دەستدرێژیی بكەنە سەر خاكی هەرێمی كوردستان. ئێستا كاتی ئەوەیە دوور لە هەموو سۆز و موزایەدەیەك بیر لەوە بكرێتەوە كە ئایا هەرێمی كوردستان بەرگەی ئەو هەموو گوشار و ناسەقامگیرییە دەگرێت؟ بۆ چی دەبێ كارێك بكرێ كە ژیانی خەڵكی هەرێم بكەوێتە ژێر هەڕەشەی شەڕ و ئابڵۆقە و داگیركاری.

دوای دەیان ساڵ خەبات و قوربانیدان هەێمی كوردستان وەك كیانێكە بۆ ژیان و ئاسوودەیی گەلی كوردستان، هەروەها گۆڕەپانێكیشە بۆ چالاكیی سیاسیی و مەدەنی حزبەكانی پارچەكانی تر، بەڵام ئەوانەی بیانەوێ شەڕ بكەن، لە ڕاستیدا دەبنە هۆی ئەوەی هەرێم بكەوێتە ژێر مەترسییەكی جددی و هەموو لایەكیش تێیدا زەرەرمەند دەبن. بۆیە پێویستە هەموو لایەك بەرژەوەندییەكانی هەرێم و ئاساییشی خەڵكیان لەبەرچاو بێ و بیپارێزێن.




دوایین هەواڵەکان

لایەكی شەقامی 100 مەتریی هەولێر نۆژەن كرایەوە

TUESDAY, 19 MARCH 2019 11:03:16

ھەولێر-KDP.info- بە گوژمەی ٥٥٢ ملیۆن دینار و لەسەر ئەركی شارەوانیی ھەولێر، قیرتاوكردنی شەقامی ١٠٠ مەتریی شاری ھەولێر دەستی پێكرد، نۆژەنكردنەوەی شەقامەكەش بە سێ قۆناغ دەبێت و قۆناغی یەكەم لە شەقامی سەرەكیی شەقڵاوە تاوەكو شەقامی سەرەكیی كۆیە دەبێت.

 
چاوی بازرگانانی جیھان لەسەر ھەرێمی كوردستانە

TUESDAY, 19 MARCH 2019 11:03:00

ھەولێر-KDP.info- بەرپرسی راگەیاندنی ژووری بازرگانی گوتی، ئێستا دۆخی بازرگانی لە كوردستان گەیشتووەتە ئاستێكی زۆر بەرز و تەنیا لە ماوەی چوار مانگی ڕابردوودا ١٣ شاندی بیانی سەردانی ھەرێمی كوردستانیان كردووە و چەندین شاندی دیكەی بازرگانییش بەنیازن بێنە ھەرێمی كوردستان.

 
هەولێر ھەموو ئامادەكاریەكی كردووە بۆ جه‌ژنی نه‌ورۆز

TUESDAY, 19 MARCH 2019 10:03:27

ھەولێر-KDP.info- بەرپرسی راگەیاندنی پارێزگای ھەولێر دەڵێ، بڕیارە سبەی لە ھەولێر لە دوو شوێن ئاگری نەورۆز بكرێتەوە و بەرپرسانی حیزبی و حكوومی و نوێنەرانی وڵاتانیش، بۆ مەراسیمی ئاگركردنەوەكە بانگھێشت كراون.

 
ماڵپه‌ڕی KDP ئەو لیژنانەی سەرۆكایەتییەكەیان بەر پارتی دەكەوێت ئاشكرا دەكات

TUESDAY, 19 MARCH 2019 10:03:42

هەولێر-KDP.info- گوتەبێژی فراكسیۆنی پارتی لە پەرلەمانی كوردستان، ناوی ئەو لیژنانەی سەرۆكایەتییەكەیان بەر فراكسیۆنی پارتی دەكەوێت، بۆ ماڵپەری فەرمیی پارتی دیموكراتی كوردستان ئاشكرا دەكات و ڕایدەگەیەنێت، ئەمڕۆ دەستەی سەرۆكایەتیی سەرجەم لیژنەكان یەكلا دەكرێنەوە و رێككەوتنیشیان لەبارەوە كراوە.

 
شوانی بۆ KDP: هەرێم و بەغدا لەسەر بابەتی نەوت و دارایی كۆ ده‌بنەوە

TUESDAY, 19 MARCH 2019 10:03:24

هەولێر-KDP.info- سكرتێری ئەنجوومەنی باڵای ئابووری لە ئەنجوومەنی وەزیرانی هەرێم دەڵێ، ئابووریی هەرێم بەرەو باشتر دەچێ و تۆكمەتر دەبێت، بەم زووانەش شاندی هەرێم و بەغدا لەسەر بابەتی نەوت و دارایی كۆ دەبنەوە و گفتوگۆ لەگەڵ وەزارەتی نەوتی عێراق دەكرێت بۆ گەیشتن بە ڕێككەوتنێكی تازە.

 


 
© 2018 Kurdistan Democratic Party, KDP