ھەولێر-KDP.info- بەڕێوەبەری گشتیی وەزارەتی پیشەسازی و بازرگانیی حکوومەتی ھەرێمی کوردستان گوتی، حکوومەتی عێراق بە ھەموو شێوەیەک کێشە بۆ ھەرێمی کوردستان دروست دەکات و ئێستا بڕیارێکی نوێیان دەرکردووە دژی ھەرێمی کوردستان، ئەمەش وای کردووە کە کێشە بۆ ئەو کارگانە دروست بێت، کە کەلوپەل و بەرھەمەکانیان بۆ عێراق دەگوازنەوە، مەبەست لەوکارەش سیاسییە.
حکوومەتی عێراق بەردەوامە لە سزادان و ئابلۆقەخستنە سەر ھەرێمی کوردستان و ھەر ڕۆژە و بڕیارێک دژی ھەرێمی کوردستان دەردەکات و ئێستاش بڕیارێکی لەبارەی ئەو کارگانە داوە، کە کەلوپەل و بەرھەمەکانیان ڕەوانەی عێراق دەکەن.
بەڕێوەبەری گشتیی وەزارەتی پیشەسازی و بازرگانیی حکوومەتی ھەرێمی کوردستان، (عەبدوڵڕەزاق ناوەندی) بە ماڵپەڕی فەرمیی پارتی دیموکراتی کوردستانی ڕاگەیاند: "ئەو کارگانەی لە ھەرێمی کوردستان کەلوپەلی خۆیان دەبەنە بەغدا و بەسرا و پارێزگاکانی دیکەی باشووری عێراق ئاسانکارییان بۆ دەکرا لە گومرگەکان لە ڕێگەی وەزارەتی پیشەسازیی عێراقەوە، کە ئێمە نووسراومان بۆیان دەکرد، ئێستا باس لەوە دەکەن مادام بە پێی یاسای ٢٢ی ساڵی ١٩٩٨ مۆڵەتیان وەرنەگرتووە و بە پێی یاسای ٢٥ی ساڵی ١٩٩٢ مۆڵەتیان وەرگرتووە، ئەمەش وای کردووە کە کێشە بۆ ئەو کارگانە دروست بێت، کە کەلوپەلەکانیان دەگوازنەوە بۆ عێراق."
(عەبدوڵڕەزاق ناوەندی) گوتیشی: بە ھۆی ئەو بڕیارە نوێیەی وەزارەتی پیشەسازیی عێراقەوە کێشە بۆ ئەو کارگانە لە ناوچەی عوزێم و ئەو شوێنانەی گومرگیان لێ دانراوە، دروست دەبێت."
بەرێوەبەری گشتیی وەزارەتی بازرگانی و پیشەسازیی حکوومەتی ھەرێمی کوردستان ڕوونیشی کردەوە: "ئێمە نووسراومان بۆ وەزارەتی پیشەسازی و ئەنجومەنی وەزیران کردووە، بەڵام لەبەر ئەوەی ئەو کارگانە سەر بە پارێزگای ھەولێرن، زیاتر کێشەیان بۆ دروست دەکەن و مەبەستەکەش زیاتر سیاسییە، جا ھەر کارگەیەک بەرھەمی خۆی بۆ عێراق ڕەوانە بکات، کێشەی بۆ دروست دەکەن، کە ژمارەی کارگەکانیش زۆرە، بەڵام ئامارێکی ورد لەبەردەست نییە."
بڵند ئیبراھیم