ھەولێر-KDP.info- لیژنه‌ى هاوبه‌شى دانوستانكارى
پارتى دیموكراتى كوردستان و یه‌كێتیى نیشتمانیى كوردستان راگەیاندراوێکی بڵاوکردەوە کە ئەمە دەقەکەیەتی:
ئه‌مڕۆ 4ى شوباتى 2025 له هه‌ولێر، لیژنه‌ى هاوبه‌شى دانوستانكارى یه‌كێتیى نیشتمانیى كوردستان و پارتى دیموكراتى كوردستان، دواهه‌مین كۆبوونه‌وه‌ى خۆى ئه‌نجامدا، ئه‌وه‌ش دواى چه‌ندین دانیشتنی چڕوپڕ و گفتوگۆى بنیاتنه‌رانه به‌مه‌به‌ستى كارى هاوبه‌ش له قۆناغى داهاتووى حوكمڕانیدا، به شێوه‌یه‌ك كه له ئاستى قۆناغی هه‌ستیاری ئێستا و چاوه‌ڕوانیى هاووڵاتییانى هه‌رێمى كوردستاندا بێت.
له میانى كۆبوونه‌وه‌كاندا، لێكگه‌یشتنى هاوبه‌ش و ڕێككه‌وتنى سه‌ره‌تایى له‌سه‌ر زۆربه‌ى ته‌وه‌ره‌كان هاتووه‌ته ئاراوه و ئه‌نجامى كۆبوونه‌وه‌كان ده‌خرێته به‌رده‌ستى لیژنه‌ى باڵاى دانوستانكارى هه‌ردوولا، بۆ یه‌كلاكردنه‌وه‌ى.