دهۆك-KDP.info-به‌رپرسێ راگه‌هاندنێ ل رێڤه‌به‌ریا گشتى یا گه‌شتوگۆزارا ئیدارا سه‌ربه‌خۆ یا زاخۆ دیار كر كو كاركرن د بجهئینانا پرۆژێن نوى یێن گه‌شتیارى دا ل سنوورێ ئیدرا سه‌ربه‌خۆ یا زاخۆ یا به‌رده‌وامه‌ و پرۆژێ كورنیشێ پرا ده‌لال ژى ئێك ژوان پرۆژایه‌ یێ كو هه‌تا نوكه‌ نێزیكى 90% كار د بجهئینانا وى دا هاتیه‌ ئه‌نجامدان.

بێوار سندى، به‌رپرسێ راگه‌هاندنێ ل رێڤه‌به‌ریا گشتى یا گه‌شتوگۆزارا ئیدارا سه‌ربه‌خۆ یا زاخۆ بۆ ماڵپه‌رێ فه‌رمیێ پارتى دیموكراتى كوردستان دیار كر كو ب مه‌ره‌ما په‌یداكرنا سمایه‌كێ جوانتر ل باژێرێ زاخۆ و د به‌رده‌وامیا بجهئینانا وان پرۆژێن گه‌شتیارى دا یێن كو ل سه‌رده‌مێ كابینا نه‌هێ یا حكومه‌تا هه‌رێما كوردستانێ ل سنوورێ ئیدارا سه‌ربه‌خۆ یا زاخۆ دهێنه‌ بجهئینان، نوكه‌ كاركرن د بجهئینانا پرۆژێ كورنیشێ پرا ده‌لال دا یێ به‌رده‌وامه‌ و رێژا بجهئینانا كارى گه‌هشتیه‌ نێزیكى 90% و ل ده‌مه‌كێ نێزیك ئه‌ڤ پرۆژه‌ و چه‌ندین پرۆژێن دى یێن گه‌شتیارى دێ ب دووماهى هێن و كه‌ڤنه‌ د خزمه‌تا وه‌لاتى و گه‌شتیاران دا.

ناڤهاتى ئاماژه‌ دا وێ چه‌ندێ كو پرۆژێ كورنیشێ پرا ده‌لال ل باژێرێ زاخۆ ب پشته‌ڤانیا كابینا نه‌هێ یا حكومه‌تا هه‌رێما كوردستانێ ژ لایێ كۆمپانیه‌كا ناڤخۆ ڤه‌ ب سه‌رپه‌رشتیا ئه‌ندازیارێن رێڤه‌به‌ریا گشتى یا گه‌شتوگۆزارا ئیدارا سه‌ربه‌خۆ یا زاخۆ ڤه‌ دهێته‌ بجهئینان و گۆت: "د ڤى پرۆژه‌ى دا گرنگیه‌كا باش ب چاندنا داران و فریزه‌ى و بلندكرنا رێژا كه‌سكاتیێ هاتیه‌كرن، ژ به‌ر كو 70% ژ رووبه‌رێ پرۆژه‌یى بۆ كه‌سكاتیێ هاتیه‌ ته‌رخانكرن".

رێوار محه‌مه‌د ره‌شید