دهۆك –KDP.info- ب هه‌لكه‌فتا رۆژا جیهانیا په‌نجه‌شێرێ ئه‌ڤرۆ رۆژا شه‌مبى 4/2/2023 كۆنفرانسه‌ك ب ئاماده‌بوونا د.سامان به‌رزنجى، وه‌زیرێ ساخله‌میێ ل  هه‌رێما كوردستانێ و جێگرێ پارێزگارێ دهۆكێ و رێڤه‌به‌رێن گشتى یێن ساخله‌میێ ل هه‌رێمێ و نۆشدارێن تایبه‌تمه‌ند ل دهۆكێ هاته‌ ئه‌نجامدان و د هه‌مان ده‌م دا ئامارێن سالا 2022 یێن توشبوویێن په‌نجه‌شێرێ ل هه‌رێما كوردستانێ هاتنه‌ راگه‌هاندن.

د. ئه‌فراسیاب موسا، رێڤه‌به‌رێ گشتى یێ ساخله‌میێ ل پارێزگه‌ها دهۆكێ دیار كر كو كابینا نه‌هێ یا حكومه‌تا هه‌رێما كوردستانێ كێمته‌رخه‌مى د دابینكرنا ده‌رمانێن پێدڤى دا بۆ نه‌خۆشێن په‌نجه‌شێرێ نه‌كریه‌ و هه‌مى ده‌مان پارێ پێدڤى بۆ دابینكرنا ده‌رمانان مه‌زاخیته‌ و د پلان دایه‌ نه‌خۆشخانه‌كا 100 ته‌ختى یا تایبه‌ت ب په‌نجه‌شێرێ ڤه‌ ل پارێزگه‌ه دهۆكێ بكه‌ڤیته‌ د بوارێ بجهئینانێ دا، به‌لێ سه‌ره‌رایى ڤێ چه‌ندێ ل سالا بورى ده‌ست بجهئینانا پرۆژێ سه‌نته‌رێ په‌نجه‌شێرێ یێ زارۆیان ل نه‌خۆشخانا هیڤیى یا زارۆیان ل دهۆكێ ب پشته‌ڤانیا رێكخراوه‌كێ هاتیه‌كرن و ژڤانه‌ ئه‌ڤ ساله‌ ب دووماهى بهێت و بكه‌ڤیته‌ د خزمه‌تا نه‌خۆشان دا.

هه‌ژى گۆتنێ یه‌ كو د سالا بورى دا چار هزار و 304 توشبوویێن په‌نجه‌شێرێ ل هه‌ولێرا پایته‌خت و سێ هزار و 323 توشبوو ل پارێزگه‌ها سلێمانیێ و هزار و 434 توشبوو ژى ل پارێزگه‌ها دهۆكێ هاتینه‌ تۆماركرن، ئانكو ب شێوه‌یه‌كێ گشتى ل سالا بورى نه‌هــ هزار و 61 كه‌س ل هه‌رێما كوردستانێ توشى نه‌خۆشیا په‌نجه‌شێرێ بووینه‌.

رێوار محه‌مه‌د ره‌شید