هەولێرـKDP.infoـ وەزارەتی پەروەردە ساڵانە لەم وەرزی پشووی هاوینەیدا، پلانی ساڵانەی خوێندن بڵاو دەکاتەوە، وەزیری پەروەردەش دەڵێت، ئێستا وەزارەتی پەروەردە ئامادەسازی بۆ پلانی خوێندنی ساڵی ئایندەی دەست پێ کردووە و خەریکی چاپکردنی شازدە ملیۆن پەرتووکین.

پەیوەست بە پلانی ئامادەسازی وەزارەتی پەروەردە، تایبەت بە چاپی پەرتووکی خوێندنی ٢٠٢٢-٢٠٢٣، ئالان حەمە سەعید، وەزیری پەروەردە و فێرکردنی حکوومەتی هەرێمی کوردستان بە ماڵپەڕی فەرمیی پارتی دیموکراتی کوردستانی ڕاگەیاند: ''پلانی ئامادەسازیی وەزارەتی پەروەردەی حکوومەتی هەرێمی کوردستان بۆ ساڵی نوێی خوێندنی ٢٠٢٢-٢٠٢٣ بە هەوڵی بەرپرسانی پەروەردەیی و سەرپەرشتیاران و بەرێوەبەر و یاریدەدەر و مامۆستایان بەباشی جێبەجێ دەکرێت، نزیکەی ١٦ ملیۆن کتێبی نوێ چاپ دەکەین، بۆ ئەم مەبەستەش نیوەی کتێبەکانی خوێندن تاوەکوو ئێستا چاپ کراون.''

وەزیری پەروەردە گوتیشی: “پێش دەستپێکی ساڵی نوێی خوێندن سەرجەم کتێبەکان دابەش دەکرێن بەسەر ناوەندەکانی خوێندندا و، وەزارەتی پەروەردە تا خوێندنی ساڵی نوێ دەست پێ دەکات بەردەوام لە ڕێگەی پەیج و گرووپە فەرمییەکانی وەزارەتی پەروەردە و فێرکردنەوە، پلانەکانی ساڵانە بڵاو دەکاتەوە.''

فایزە کۆیی