سۆران-KDP.info-پڕۆژەی شوققەكانی "بادلیان" لە سنووری قەزای سۆران لە قۆناغی كۆتاییدان و سەرپەرشتیاری ئیدارەی سۆرانیش دەڵێ، كۆتایی ئەمساڵ پڕۆژەكە تەواو دەبێت و لە سەرەتای ساڵی داھاتوودا شوققەكانی سۆران بەسەر ھاووڵاتیاندا دابەش دەكرێن.
ھەڵگورد نەجیب، سەرپەرشتیاری ئیدارەی سۆران، بە ماڵپەڕی فەرمیی پارتی دیموكراتی كوردستانی راگەیاند: "پڕۆژەی شوققەكانی سنووری سۆران لە ١٢ تەلار پێك ھاتووە و كۆی یەكەكانیش بریتین لە ١٤٤ شوققەی نیشتەجێبوون، پڕۆژەكە لە ساڵی ٢٠١٢ دەست بە جێبەجێكردنی كراوە، بەڵام بە ھۆی قەیرانی داراییەوە كاركردن تێیدا راگیرابوو".
سەرپەرشتیاری ئیدارەی سۆران دەشڵێت: "لە سەرەتای مانگی ئەیلوولی ئەمساڵدا دەست بە تەواوكردنی شوققەكانی سۆران كراوە و بڕیارە كۆتایی ئەمساڵ ھەموویان تەواو بكرێن، لە سەرەتای ساڵی داھاتووش شوققەكان دابەش بكرێن".
نەجیب روونیشی كردەوە: "پڕۆژەكە لەسەر بودجەی پەرەپێدانی وەزارەتی ئاوەدانكردنەوە و نیشتەجێكردن دروست دەكرێت و دوای دابەشكردنیان، مانگانە پارەیەكی رەمزی لەو ھاووڵاتیانە وەردەگیرێت، كە شوققەیان لە پرۆژەكە پێ دەدرێت، پارەكەش بۆ سندووقی نیشتەجێبوون دەگەڕێتەوە".
قائید میرۆ