په‌رله‌مانتار:ژیان طاهر زێوه‌ی
گه‌له‌ك هێژایە کو مروڤ ده‌مێ خه‌له‌تیا دبینیت، ژ بۆ راستڤه‌كرنا وان هه‌ولێن دلسوزانه بده‌ت، دا كو لایه‌نێ خه‌تابار دووباره نه‌كه‌ڤیته د شاشیاندا. رەخنه‌گرتن ژ سالوخەتێن مروڤێن زانا، ژیر و بیرمەنده، یێن کو بەری هەر کەسی خو دویری خه‌له‌تیان دگرن و ئارمانجا وان ژ رەخنه‌گرتنێ باشترکرن و چاكسازیە و ژ بۆ به‌رژه‌وه‌ندیا گشتی و تاكێن جڤاکی ب دلسووژی و خێرخوازانه كار دكه‌ن؛ كه‌سانێن خودان سه‌ربۆر و كارزان كو دشێن هزر و كردارێن لایه‌نێ به‌رامبه‌ری خو بهه‌لسه‌نگینن و خالێن ئه‌رێنی و نه‌رێنی ژێك ڤاڤێرن. لێ یا گرنگه بزانین كو رەخنا ساخلەم و ئاڤاكه‌ر ل وی ده‌می دەستەبەر دبیت یێ كو رەخنه‌گر بەری هەرکەسەکی ببیته خودیكا خو و شیانێن ڤه‌دیتن و هه‌لسه‌نگاندن و دانپێدانێ ب كێماسیێن خو ل دەف هه‌بن و بزاڤێ ژ بۆ ڤه‌دیتنا چاره‌سه‌ره‌كێ بۆ وان بكه‌ت. ئانكو ژ سالوخه‌تێن رەخنەگرێ راسته‌قینه ئه‌وه كو بەردەوام هه‌لسه‌نگاندنا گوفتار و كردارێن خو دكه‌ت و بزاڤێن چاره‌سه‌ریا كێماسیێن خو ددەت.
گەلەک كه‌س هه‌نە كو ژ بۆ ڤه‌شارتن و په‌رده‌پوشكرنا خرابی و كریارێن خو یێن نه‌رێنی، بزاڤێ ژ بۆ بێبهاكرن و كێمكرنا لایه‌نێ به‌رامبه‌ری خو دكه‌ن. پێتڤیه مروڤ بهایێ رەخنه‌گرتنێ بزانیت و نابیت بو مه‌رامێن خراب و وێرانكه‌ر بكاربینیت. هه‌ر ده‌مێ ئارمانج ژ رەخنه‌گرتنێ بێبهاكرن و كێمكرنا لایه‌نێ به‌رامبه‌ر بیت، هینگێ ئه‌و رەخنه‌گرتن نابیت، به‌لكو تولڤه‌كرنه. كه‌سێ رەخنه‌گر پێتڤیه بشێت به‌رسڤا گوتن و كریارێن خو لهەمبەر جڤاکی بده‌ت و بتنێ ل وی ده‌می دێ وێ رەخنێ كاریگه‌ریا خو هه‌بیت و جهێ خو گریت. پێنووسێ مروڤێ رەوشتبه‌رز تنێ ژ بو نیشاندانا رێكا راست و دروست بكار دهێت. ئه‌و رێكا كو مروڤایه‌تیێ و رێزگرتنا به‌رامبه‌ر و ئازادیا راده‌ربرینێ و مافێ مروڤی تێدا ڕێنمانە.
ئه‌و كارڤه‌دان و كریارێن كو ل ڤان چه‌ند رۆژان سه‌باره‌ت دادگه‌هكرنا تاوانبارێن دهوكێ ژ هنده‌ك لایه‌ن و ئه‌وێن بناڤ خودان پێنوسێ ئازاد دهێته دیتن، درست ئه‌و مه‌سه‌له كو دبێژن ده‌رزێی د چاڤێ یێ به‌رامبه‌ردا دبینن، لێ شویژنان د چاڤێ خو دا نابینن. تاكه ئارمانجا ڤان كه‌سان ژ ئازراندنا ڤی بابه‌تی ب لارێدابرنا مله‌تی و ڤه‌شارتن و په‌رده‌پوشكرنا وان هه‌می راستیێن ته‌حلن یێن كو ژ مێژه‌یه خه‌لكێ سلێمانیێ ژێ دنالن. كوشتن و بێ سه‌روشوینكرنا خه‌لكێ بێ تاوان، تیروركرنا روژنامه‌ڤانان و راده‌ستكرنا په‌نابه‌ر و خه‌باتكارێن روژهه‌لاتی و ده‌هان كریارێن دی یێن نامروڤانه كو مخابن چه‌ندین ساله بووینه به‌شه‌ك ژ كلتوورێ هنده‌ك ژ دەستهلاتدارێن سلێمانیێ ژ هوڤانه‌ترین كریارانن و دژی هه‌ر ره‌وشت و تیتاله‌كێ مروڤایه‌تینه. ئه‌وێن بناڤ رەخنه‌گر و خودان پێنووسێ ئازاد و ئه‌وێن كو خه‌لكێ هه‌رێمێ وه‌سا تێدگه‌هینن كو ئارمانجا وان پاراستنا بهایێن مروڤایه‌تیێ یه، پێتڤی بوو به‌ری هه‌ر كه‌سه‌كی وه‌ك ئه‌ركه‌كێ نیشتمانی و ئه‌خلاقی ل ڤان بابه‌تان هاتبانه ده‌نگ و به‌ره‌ڤانی ژ مافێن وان كه‌سان ل سلێمانیێ كربا یێن كو بووینه قوربانیێن پێنوسێ ئازاد و ئازادیا راده‌ربرینێ. هه‌روه‌سا پێتڤی بوو وان زانیبا كو ده‌مێ كه‌سه‌ك ژ نه‌چاریا خو و ژ بو پاراستنا گیانێ خو دهێته ناڤ مالا مروڤی و هەوارا خو بۆ مروڤی دئینیت، ئەرکێ ئینسانی و نیشتیمانیێ مروڤی ئه‌وه كو ب هه‌می شیانێن خو هه‌ولێن پاراستنا وی بده‌ت. لێ راده‌ستكرنا وان بۆ ده‌سـتێ دوژمنان دیار کر كو هنده‌ك دەستهلاتدارێن سلێمانیێ ژ ڤی ره‌وشـتێ مروڤانە و نیشتمانی ددویرن.
تاوانبارێن دهوكێ دانپێدان ب تاوانێن خو كرینه و گەلەک بەلگە کو تاوانێن وان دسەلمینن کەتینە بەر دەستێ دەستهەلاتا دادوەریا هەرێما کوردستانێ. تاوانا وان بێ هیچ دوودلیه‌كێ دكه‌ڤیته د خانا خیانه‌تا نیشتمانیدا و هه‌می ولاتێن جیهانێ ب هه‌می ره‌نگێن سیستەمێن سیاسیڤه خیانه‌تا نیشتمانی ب مه‌زنترین تاوان دهژمێرن. ئه‌ڤا كو ل ڤان چه‌ند روژان هنده‌ك گروپ و لایه‌ن ب ناڤێ ده‌سته‌به‌ركرنا مافێ مروڤی و سه‌رخوبوونا ده‌ستهەلاتا دادوه‌ریێ دكه‌ن بتمامی ماییتێكرنه د كاروبارێن دەستهەلاتا دادوه‌ریێدا و سنوورداركرنا سه‌رخوبوونا كارێ وان و بكارئینانا هه‌ستێن تاكێن كوردستانی یه ژ بۆ مه‌رامێن سیاسی و حزبی. بێگومان ئارمانجا وان یا سه‌ره‌كی و دروشمێن وان دوو جه‌مسه‌رێن گەلەک ژێك جیاوازن و لێك ناخون. خه‌لكێ مه یێ ژیر و هشیاره و ده‌رفه‌تێ ناده‌ته ڤان كه‌سان كو ب هێجەتا رەخنه‌گرتنێ و پاراستنا مافێ مروڤی ببنه ئاخفتنكه‌ر و رێخوشكه‌رێن دوژمنێن گه‌لێ مه. د ڤان كاوداناندا پێتڤیه خه‌لكێ مه ب كارزانی هه‌لسه‌نگاندنا هه‌می بوویه‌ران بكه‌ن. چونكی به‌ره‌ڤانی و پاراستنا ئاسایشا نیشتمانی ئه‌وا كو ب خوینا هزاران خورت و لاوێن ڤی ولاتی بده‌ستڤه هاتی ئه‌ركه‌كێ ئه‌خلاقی یه لسه‌ر ملێت هه‌ر تاكه‌كێ كوردستانی.
بژیت ئازادیا راده‌ربرینێ، بژیت گه‌لێ مه، بژیت مروڤایه‌تیا راسته‌قینه، نه‌مری و سه‌ربه‌رزی بۆ پارێزه‌رێن راسته‌قینه‌یا وولاتی.