هەولێر-KDP.info- دەزگای رۆشنبیری و راگەیاندنی پارتی، بە بۆنەی (١٠)یەمین ساڵڕۆژی دامەزراندنی ماڵپەڕی فەرمیی پارتی دیموكراتی كوردستان، پەیامێكی پیرۆزبایی ئاڕاستەی بەڕێوەبەر و نووسەر و كادیرانی ماڵپەری فەرمیی پارتی دیموكراتی كوردستان (KDP.info) كرد، ئەمەی خوارەوە دەقەكەیەتی:
بەڕێزان/ بەڕێوەبەر و نووسەر و كادیرانی ماڵپەری فەرمیی پارتی دیموكراتی كوردستان (KDP.info).
بە بۆنەی(١٠)یەمین ساڵیادی دامەزراندنی ماڵپەڕی فەرمیی پارتیمان (KDP.info) پیرۆزباییەكی گەرمتان لێ دەكەین و، دەستی هەوڵ و ماندووبونتان دەگوشین، هیوای بەرەوپێشچوونی بەردەوامتان بۆ دەخوازین.
دامەزراندنی ماڵپەڕی (KDP) لە ٢٨ـی شوباتی ٢٠١١ وەكو زمانحاڵ و كەناڵێكی دیكەی سەردەمیانە و پێویستی پارتیمان، بۆ خزمەتگەیاندن بە بواری راگەیاندن و رۆشنبیری و، بڵاوكردنەوەی هەواڵ و زانیاریی دروست و باوەڕپێكراو بوو، سەركەوتن و بەخشش و راستگۆیی ئەو كەناڵە لە ماوەی (١٠)ساڵەی تەمەنیدا مایەی خۆشحاڵی و سوپاس و ستایشە.
جارێكی دیكە بەو بۆنەیەوە پیرۆزباییتان لێ دەكەین و دووپاتی دەكەینەوە پشتیوانی كار و چالاكیەكانتانین بۆ زیاتر بەرەوپێشبردنی ماڵپەڕەكە. ھەر سەركەوتوو بن...
دەزگای رۆشنبیری و راگەیاندنی
پارتی دیموكراتی كوردستان
٢٧ـی شوباتی ٢٠٢١