دھۆک-KDP.info-  هەر ساڵ دگەل بارینا ئێکەم بارانا پەیزێ، خەم و کوڤانێن ئاوەریان جارەکادی دبارن و مەلەفێ وان ژی دناڤ دەهان مەلەفێن دی یێن سیاسی دا دچیتە خانەیا پاشخستنێ، دهەڤپیڤینەک تایبەت دا دگەل پیر دەیان جەعفەر، رێڤەبەرێ کوچ و کوچبەران و بەرسڤدانا قەیرانان ل دهۆکێ دبێژیت: ساڵانە بەری وەرزێ زڤستانێ ب هەماهەنگی دگەل دەزگەهێ خێرخازی بارزانی کومبوونەکێ دکەین ژبۆ ئامادەکاریێن سەرما و بارانان و دەستپێکێ ب رێیا وەزارەتا کۆچ و کۆچبەران یا عێراقێ داخوازا ٢٠٠ لێترێن گازا سپی بۆ هەر سەرۆک خێزانەکێ دکەین، دیسان داخوازێ ژ پارێزگارێ دهۆکێ دکەین کو جادەیێن ناڤخۆیا کەمپان بهێنە سەخبیرکرن و خیڤەتێن تێکچووی یێن پێدڤی ب گهورینێ بهێنە گهورین.

و ب دەنگەکێ خەمگین دبێژیت: "لێ ئەگەر ئەڤ چەندە هاریکارییەک بچویک بیت ژبۆ برێڤەبرنا ژیاناوان، نابیتە جهێ ئارامی و دلخۆشییا وان چونکە..

ئاوارێن دهۆکێ گەلەک بێزاربووینە و ئەڤە چەند کابینەیێن حکومەتا عێراقێ هاتنە پێکئینان و کابینە لدویف کابینێ سوزان ددەنە وان کو دێ ڤەگەڕیننە جهـ و وارێن وان و وان قەرەبوو کەن، لێ ب مخابنی ڤە سوزێن خۆ ب جهـ نائینن، ڤێ گەرێ ژی حکومەتا بەرێز سەروکێ عیراقێ زەیدی سوز یا دای لێ تا نوکە ٦ بۆ ٧ وەزارەتان، وەزیر نەهاتینە دەستنیشانکرن، ژوان ژی وەزارەتا کوچ و کوچبەرێن عێراقێ یە، و هیڤیدارین ئەو وەزیرێ بهێتە دەستنیشانکرن ئێک ژکارێن وی یێن دەستپێکی قەرەبوکرنا ئاواران بیت و ڤەگەراندنا وان ب سەرفرازانە بۆ جه و وارێن وان دیسان دابینکرنا خزمەتگوزاریێن دەڤەرێن وان.

ل سنورێ پارێزگەها دهۆکێ و ئیدارا سەربەخۆیا زاخۆ ١٥ کەمپێن ئاواران هەنە، تێدا ٢٠ هزار و ٨٣٠ خێزان دژین، کو دبنە ١١٠ هزار کەس، و ل دەرڤەی کەمپان ژی، ٣٥ هزار خێزان هەنە کو دبنە ١٦٠ هزار کەس، ئانکو دناڤ کەمپان دا و ژدەرڤەی کەمپان دبنە ٢٧٠ هزار کەس کو ل پارێزگەها دهۆکێ مابن ئەو ژی ژ خەلکێ شنگالێ نە.

پیر دەیان دیاردکەت کو ل سەر ئەرگێ حکومەتا عێراقێ بوو سەبەتەکا خوارنێ بۆ هەر هەیڤەکێ بۆ هەر خێزانەکێ دابین بکەن دگەل تەوالێت و سەرشویان، لێ ب مخابنیڤە ئەڤسالە هەمیێ ب تنێ بۆ ئێک هەیڤ دابینکرییە، و پار ساڵ ژی ل شوینا ١٢ هەیڤان بتنێ بۆ ٧ هەیڤان ب تنێ دابینکرییە، دیسان بریاربوو ل ساڵا چووی بۆ هەر خێزانەکێ ٢٠٠ لترێن گازا سپێ دابین بکەن ل سەر دوو گەران،  لێ گەرەکێ ١٠٠ لتر رەوانەکرن و گەرا دووێ ژی هێشتا نە داینە.

"ل دهۆکێ ماوێ سێ ساڵایە رێکخراوێن خێرخوازی هەر پێنج سێکتەرێن خزمەتگوزاری دناڤا کەمپان دا راوەستاندینە، لێ حکومەتا هەرێما کوردستانێ ب ستویێ خۆڤە گرتییە، هەر ژ راکرنا گلێشی و سەخبێرکەنا ئاڤێ و کەرتێ پەروەردێ و کەرتێ ساخلەمیێ و کەرتێ کارەبێ، و ئەڤ چەندە دڤێ رەوشا دارایی یا هەرێمێ دا بارگرانیە لێ حکومەتا هەرێمێ ب ئەرگەکێ مرۆڤایەتی دبینیت خزمەتا وان بکەت تاکو بشێن ب سەرفرازانە ڤەگەرنە جهـ و وارێن خۆ"

ل دویماهیێ دبێژیت: هیڤیدارین ملیشیاتێن ل دەڤەرێ دگەل هێزێن دەولەتێ تێکەل ببن و یەپەشە و یەپەکە و پەکەکە ل دەڤەرێ نەمینن، هەروەسا ئیدارا شەرعی ژی ڤەگەریتە شنگالێ دا ملیشیاتێن نەشەرعی نە مینن و فروکێن تورکیا چ بەهانە ژبۆ  بوردومان کرنێ نەبن و خەلکێ سڤیل نەبیتە قوربانی، هەڤدەم ئەڤ چەندە دناڤ خالێن رێکەفتنا شنگالێ دابوون ئەوا ل ١٠/١٠/٢٠٢٠ دناڤبەرا حکومەتا عێراقێ و حکومەتا هەرێمێ هاتیە ئیمزاکرن و ب رێککەفتنا شنگالێ دهێتە ب ناڤکرن.

سەجا شێرزاد