ههولێر-KDP.info- بەرپرسی دەستەی کارگێڕیی مەکتەبی سیاسیی پارتی دیموکراتی کوردستان، فازڵ میرانی، لە پەنجا و شەشەمین ساڵیادی دامەزراندنی یەکێتیی زانایانی ئایینیی ئیسلامیی کوردستاندا پەیامێکی پیرۆزبایی بڵاوکردەوە و تێیدا جەختی لە ڕۆڵی مێژوویی و پیشەییی زانایانی ئایینی کردەوە.
دەقی پەیامەكەی بەرپرسی دەستەی کارگێری مەکتەبی سیاسی:
بەناوی خوای بەخشندەی میهرەبان
یادی ( ٥٦) ساڵەی دامەزراندنی یەكێتیی زانایانی ئایینی ئیسلامی كوردستان بە دەرفەت دەزانم، پیرۆزباییەكی گەرم لە ڕێزداران سەرۆک و ئەندامانی مەكتەبی تەنفیزی و ئەنجوومەنی ناوەندیی یەكێتیی زانایان و تێكڕای مامۆستایانی ئایینی پیرۆزی ئیسلام بكەم. ئەم ڕێكخراوە هەردەم ڕۆڵێكی كاریگەری لە ژیانی گەلەكەماندا گێڕاوە، چ لە ڕووی خەباتی نەتەوەیی و نیشتمانی و چ لە ڕووی زیاتر برەودان بە گیانی تەبایی و یەكڕێزی و لێبوردەیی و پێكەوەژیانی ئاشتیانەی نێوان پێكهاتەكانی كوردستان. یەكێتیی زانایان وەک ڕێكخراوێكی پیشەیی و سەرتاسەری، لە ٢١/٩/١٩٧٠ لە گەڵاڵەی باڵەكایەتی، لە لایەن دەستەیەک لە زانایانی دڵسۆز، بە پاڵپشتیی ڕاستەوخۆی جەنابی مەلا مستەفا بارزانی، بە ئامانجی خزمەتكردن بە ئایین و نەتەوە و نیشتمان دامەزرا. شكۆدار بێت ئەو یادە، گەشە و پێشكەوتنی بەردەوام بۆ یەكێتیی زانایانی ئایینی ئیسلام.
فازڵ میرانی
بەرپرسی دەستەی کارگێری مەکتەبی سیاسی
٢١ /٩ / ٢٠٢٦