زریان فاتیح

شۆڕشی مەزنی ئەیلوول لە ساڵی ١٩٦١ بە ڕابەرایەتیی بارزانیی نەمر، تەنیا ڕووداوێکی سەربازی یان ڕووبەڕووبوونەوەیەکی چەکداری نەبوو، بەڵکو وەچەرخانێکی مێژوویی، شۆڕشێکی ڕۆشنبیری و خەباتێکی گشتگیری جەماوەری بوو کە سەرجەم توێژەکانی کۆمەڵگەی کوردستانی لە دەوری ئامانجە نەتەوەییەکان کۆ کردەوە، لەم نەبەردییە مێژوویییەشدا، ئافرەتانی کوردستان هاوشانی پیاوان ڕۆڵێکی بنەڕەتی، فیداکارانە و کاریگەریان گێڕا.

لە سەردەمی شۆڕشدا، ئافرەتان لەگەڵ بارگرانیی جەنگ، تاڵاویی ئاوارەیی و سەختییەکانی ژیان، بەرپرسیارێتییەکی مێژوویییان کەوتە ئەستۆ. لە کاتێکدا پیاوان و گەنجان لە سەنگەرەکانی پێشەوەی بەرگریدا بوون، ئافرەتان بە ورەیەکی بەرزەوە ئەرکی پاراستنی شیرازەی خێزان، پەروەردەکردنی منداڵان، دابینکردنی خواردن و پێداویستییە لوجستییەکان بۆ سەنگەرەکان و چاودێریکردنی بریندارەکانیان لە ئەستۆ گرت. ئەم پشتیوانییە کۆمەڵایەتی و تەندروستییە بێوەچانە، بڕبڕەی پشتی بەردەوامیی شۆڕش و ڕاوەستان بوو لە بەرامبەر زوڵم و داگیرکاریدا.

لە ڕووی سیاسی، فکری و هۆشیارییەوە، ئەگەرچیش دەرفەتە فەرمییەکان بۆ ئافرەتان لەو سەردەمەدا بەرامبەر بە ئاستی کۆمەڵایەتی سنووردار بوون، بەڵام خانمان ببوونە قوتابخانەی ڕاستەقینەی پەروەردەکردنی هەستی نەتەوەیی و گواستنەوەی چەمکی ڕزگاریخوازی و خۆڕاگری بۆ نەوەکانی دواتر. ئەزموونی قورسی شۆڕش بووە هەوێنی بەهێزبوونی ئیرادەی ئافرەتان و سەلماندنی تواناکانیان لە بەڕێوەبردنی قەیرانە قورسەکاندا، کە ئەمەش بنەمایەکی بەهێز و قایمی بۆ داھاتووی بەشداریی سیاسی، بڕیارە جەوهەرییەکان و ژیانی کۆمەڵایەتیی ئافرەتانی کوردستان داڕشت.

لە کۆتاییدا، سەرەڕای هەموو ئاستەنگ و سەختییەکان، شۆڕشی مەزنی ئەیلوول بووە زەمینەساز و ڕەخسێنەری دەرفەت بۆ ئەوەی ئافرەتانی کوردستان ڕۆڵی شایستەی خۆیان لە خەباتی رزگاریخوازیدا بگێڕن و ئافرەتانی کورد بە ئیرادە و خۆڕاگرییان لەو سەردەمە سەختەدا، سەلماندیان کە بڕبڕەی پشتی کۆمەڵگە و شۆڕشن، ڕۆڵ و فیداکاریی ئەوانیش بۆ هەمیشە وەک سەروەرییەکی درەوشاوە و شانازییەکی نەمر لە مێژووی نەتەوەکەماندا بە زیندویی دەمێنێتەوە.

بەرپرسی ناوەندی ڕاپەڕین یەکێتی ئافرەتانی کوردستان