ھەولێر-KDP.info- بە مەبەستی بەرزکردنەوەی ئاستی ئەدای ھێزەکانی ئاسایشی ناوخۆ و ڕێکخستنەوەیان بەپێی پێوەرە نێودەوڵەتییەکان، وەزارەتی ناوخۆی حکوومەتی ھەرێمی کوردستان جێبەجێکردنی پڕۆژەیەکی ستراتیژیی چوار ساڵەی بۆ چاکسازیی بنەڕەتی لە پێکھاتە و شێوازی کاری پۆلیسدا دەستپێکردووە، پڕۆژەیەک کە ئامانجی سەرەکیی گۆڕینی فۆرمی تەقلیدیی پۆلیسە بۆ ھێزێکی سەردەمییانە و لەخزمەت ھاووڵاتییاندا.
دکتۆر ھێمن میرانی، بەڕێوەبەری گشتیی دیوانی وەزارەتی ناوخۆی حکوومەتی ھەرێمی کوردستان، لە لێدوانێکی تایبەتدا بۆ ماڵپەڕی فەرمیی پارتی دیموکراتی کوردستان ڕایگەیاند، "پۆلیسی کوردستان ھەمیشە بە دڵسۆزییەوە ئەرکی پاراستنی سەروماڵ و ئاسایشی ھەرێمی گرتووەتە ئەستۆ، بەڵام ھاوتەریب لەگەڵ پێشکەوتنە تەکنەلۆژی و سەردەمییەکان، پێویست دەکات ھێزەکانی پۆلیس خۆیان نوێ بکەنەوە. لەسەر ڕاسپاردەی سەرۆکی حکوومەت و بڕیاری وەزیری ناوخۆ، ڕێکارەکانی ئەم پڕۆژە چوار ساڵەیەی چاکسازی دەستیپێکردووە."
بەڕێوەبەری گشتیی دیوان ئاماژەی بە ڕەوتی مێژوویی کارکردنی پۆلیس کرد و گوتی، "لە سەردەمی دروستبوونی دەوڵەتی عێراقەوە، پۆلیس وەک ئامرازێکی سەرکوتکاری دەسەڵات دژی خەڵک بەکارھێنراوە، بۆیە ئەرکی ئێمەیە لە دوای ساڵی ١٩٩٢وە فۆرمێک لە پۆلیس پێشکەش بکەین کە شایستەی حکومڕانیی کوردستان بێت و بە تەواوی ئاسەواری عەسکەرتاریەت لە دامودەزگاکانی پۆلیسدا بسڕێتەوە."
دکتۆر ھێمن میرانی جەختی لەسەر گرنگیی بەھێزکردنی متمانەی نێوان کۆمەڵگە و ھێزەکانی ئاسایش کردەوە و گوتیشی، "دەمانەوێت ھاووڵاتییان خۆیان بە ھاوبەشی سەرەکیی پاراستنی ئاسایش بزانن و وەک چاوی پۆلیس لە ڕێگریکردن و ئاگادارکردنەوە لە تاوانەکان ڕۆڵ بگێڕن. لە ئێستاشدا ئامادەکاری و ڕاھێنانی بەردەوام بۆ کارمەندان دەستپێکراوە تاوەکو کارەکانی پۆلیس بە تەواوی ببنە خاوەن ستانداردێکی بەرز و لە ئاستی داواکارییەکانی سەرجەم ھاووڵاتییاندا بن."
بڵند ئیبراھیم