لەیلا عەبدولجەبار
د دەمەکێ هەستیار دا، ل سەر دەستێ ڕێبەرێ نەتەوەیی بارزانیێ نەمر، پارتی دیموکراتی کوردستان وەک پێدڤیەکا مێژوویی و نەتەوەیی هاتە دامەزراندن، دا ببێتە سەنگەرێ بەرسینگگرتنا بێهێڤیبوونێ و ئەندازیارێ ڕێکخستنا ئیرادا ڕزگاریخوازانەیا گەلەکێ زۆلملێکری.
دامەزراندنا پارتی تەنێ ڕاگەهاندنا حزبەکا سیاسی نەبوو، بەڵکو دەستپێکا هۆشیارییا نەتەوەیی و ڕێکخستنا ناڤ مالا کوردی بوو. پارتی شیا گیانێ کوردبوونێ و باوەربوونا ب ئازادیێ د ناڤ دل و مێشکێ هەر تاکەکێ کوردستانێ دا بکەتە ئیرادەیەکا بەرجەستەکری. د درێژاهیا ٨٠ سالێن خەبات و بەرخوەدانێ دا، پارتی هەڵگرێ هەمی ڕەهەندێن نیشتمانی بوویە و سەلماندییە کو سەودا و سازشێ ل سەر مافێ چارهنڤیسێ و پڕنسپێن نەتەوەیی ناکەت.
د ئەدەبیات و فەلسەفا سیاسییا سەردەم دا، پارتی تەنێ ڕێکخراوەکا حزبی نینە، بەڵکو ستوونا سەرەکیا ئاسایشا نەتەوەیی و گەرەنتیا پاراستنا قەوارەیێ دەستوورییێ هەرێما کوردستانێ یە. نهێنیا ڕاوەستاوی و بەردەوامبوونا پارتی د وەفادارییا وێ دا یە بۆ ڕێبازا بارزانیێ نەمر و ژیریا سەرۆک مەسعود بارزانی، کو شیاییە ب دانایی ل ناڤبەرا پابەندبوون ب بەهایێن ڕەسەنێن نەتەوەیی و خۆگونجاندن دگەڵ وەرچەرخانێن خێرا کۆمەڵگەها نێودەوڵەتی دا هاوسەنگییەکا ستراتیژی بپارێزت.
پارتی ژبەر کو خۆدان مەعریفە و جەماوەرەکێ دڵسۆز و هۆشیارە، قۆناغ بۆ قۆناغ نوو دەبێتەڤە، ب بەشداریکرنا کارایا گەنجان، بکارئینانا تەکنەلۆژیا بەڕێوەبرنێ، و نۆژەنکرنا پەیاما خۆ یا سیاسی، خوە وەک حزبەکا زیندی و ئایندهساز نیشان ددت.
د هەشتێ سالیا دامەزراندنا وێ دا، ئاشکرا دیارە کو پارتی نەک تەنێ خۆدان دیرۆکەکا پڕ ژ سەروەرییا یە، بەڵکو بڕبڕەیا پشتا ئاوەدانی، سەقامگیری و بەیەکڤەژیانا ئاشتییانەیا هەمیا یە. لەورا، وەک چەوا دۆهی هێز بوو، ئەڤڕۆ ژی پارتی هێزە و ب ئیرادا جەماوەرێ خۆ دێ بەرەڤ داهاتوو ب هێزتر ژی بیت.