د. شیرین حوسنی
١٦ی تەباخێ د مێژوویا گەلێ کورددا، تنێ ڕۆژەکا مێژوویی نینە، بەلکو ئاماژەیا دەستپێکرنا قۆناغەکێ یە کو خواستا نەتەوەیی، ڕێکخستنا سیاسی و باوەریا ب مافێن ڕەوا یێن گەلێ کورد، د ناڤ چوارچۆڤەیەکێ دامەزراوەیی و ستراتیژی یێ درێژخایەندا کۆم بووین. ئەڤ ڕۆژە بیرئینانا دامەزراندنا پارتی دیموکراتی کوردستانێ یە، ئەو ڕێکخستنا کو د تەمەنێ خوە یێ هەشتێ سالی دا، بوویە ئێک ژ گرنگترین پایەیێن بزاڤا نەتەوەیی، پاراستنا ناسنامەیا کوردایەتیێ و بەرگریکرن ژ دەستکەفتێن سیاسی یێن گەلێ کوردستانێ.
هەروەسا، ١٦ی تەباخێ یادا ژدایکبوونا بەرێز سەرۆک مەسعود بارزانییە، ئەو کەسایەتیێ ناڤێ وی ب خەباتا نەتەوەیی، پێشمەرگایەتیێ، پاراستنا دەستکەفتێن کوردستانێ و بهێزکرنا دامەزراوەیێن هەرێمێ ڤە ھاتیە گرێدان. د قۆناغێن هەستیاردا، سەرۆک بارزانی ب هەڵویست و دووربینیا خوە یا سیاسی، ڕۆلەکێ کارا و گرنگ د پاراستنا ئێکڕیزیا ناڤخۆیی، بەرگریکرن ژ مافێن دەستووری و پاراستنا ئارامی و سەقامگیریا هەرێمێ دا گێڕایە، و بوویە هێمایەک بۆ خۆڕاگری و باوەری ب مافێن ڕەوا یێن گەلێ کوردستانێ.
مێژوویا پارتی دیموکراتی کوردستانێ، مێژوویا خەباتەکا درێژە، کو هیچ جاران ئارمانجا وێ تنێ دەستەبەرکرنا دەسەڵاتێ نەبوویە، بەلکو هەمی گاڤان خەبات بۆ پاراستنا ھەبوونا نەتەوەیی، ئاڤاکرنا دامەزراوەیێن دەستووری، بهێزکرنا سەروەریا یاسایێ و دابینکرنا ژیانەکا شایستە بۆ هاووڵاتیان خەبات کریە. ژ چیایێن خەباتێ هەتا دامەزراوەیێن حکومڕانیێ، ئەڤ ڕێبازە ب خوێنا شەهیدان، بەرخودانا پێشمەرگەی و دڵسۆزیا کادران هاتیە پاراستن و بەردەوامی پێ هاتیە دان.
ئەڤرۆ، د ناڤ قۆناغەکا هەستیار و ئاڵۆزدا، نویکرنا پەیمانا ئێکڕیزیێ، بەرپرسیاریێ و خزمەتا نیشتمانی، گرنگترە ژ هەر دەمەکێ دی. ١٦ی تەباخێ پەیامەکا ڕوون دگەھینیت، کو هێزا هەر نەتەوەیەکێ، د ئێکڕیزی، دامەزراوەیێن بهێز، خەباتا بەردەوام و بەرپرسێاری و ڕێبەریەکا ژیر دایە.
د ڤێ یادا پیرۆزدا، ب هەمی ڕێز و شانازیڤە، بەژنا خۆ بۆ گیانێ پاکێ شەهیدان دچەمینین، شانازیێ ب پێشمەرگەیێن قەهرەمان و کادرێن دڵسۆز دکەین، هەروەسا ڕێز و پیرۆزباهیان ئاراستەی لێڤەگەڕێ گەلێ مە جەنابێ سەرۆک مەسعود بارزانی دکەین، و دووپاتیێ ل پەیمانا خوە دکەین کو بس هەمان ڕۆحیەتا شۆڕشێ خەباتێ بۆ ئێکڕیزیێ و بەرپرسیاریێ، خزمەتا گەل و پاراستنا بەرژەوەندیا بلندا کوردستانێ بەردەوامبین.