زاخۆ-KDP. info- پێشنیوهڕۆى ئهمڕۆ پێنجشهممه 2026/5/14 بە ئامادەبوونی بەڕێز نێچیرڤان بارزانی، سەرۆکی هەرێمی کوردستان و فهرماندهى گشتیى هێزهكانى پێشمهرگه، ڕێوڕەسمی دەرچوونی خولی (سییەم)ی پێگەیاندن لە کۆلێژی سەربازیی دوو لە زاخۆ بەڕێوەچوو.
لەو ڕێوڕەسمەدا، كه بهڕێزان وهزیرى كاروبارى پێشمهرگه و ژمارهیهك له پلهدارانى پێشمهرگه ئامادهى بوون، (٣٥٩) ئەفسەری گەنجی هەرێمی کوردستان کە خاوەنی بڕوانامەی بەکالۆریۆسن، دوای بەکۆتاهێنانی (٩) مانگ خوێندنی سەربازی، ئەکادیمی و پراکتیکی، بڕوانامەی دەرچوونیان پێبەخشرا و چوونە ناو ڕێزەکانی وەزارەتی کاروباری پێشمەرگە.
لە کۆتایی ڕێوڕەسمەکەدا، سەرۆک نێچیرڤان بارزانی گوتارێکی پێشکەش کرد و تێیدا وێڕای پیرۆزبایی لە دەرچووان و خێزانەکانیان، تیشکی خستە سەر پێگەی یاسایی و نیشتمانیی پێشمەرگە و بارودۆخی سیاسیی عێراق و پێشهاتهكانى ناوچەکە. ئهمه دهقهكهیهتى:
دەرچوویێن هێژا،
پێشمەرگەیێن قەهرەمان،
ئامادەبوویێن خۆشتڤى،
ڕۆژ باش،
هوین ههمى گهلهك بخێر هاتن، سەرچاڤا، بۆ ڕێورەسمێن دەرچوونا خولا (سیهێ) یا پێگەهاندنێ ل کۆلێژا سهربازی یا دویێ ل زاخۆ. ئەڤ دیمەنە جهێ شانازییا مە و هەمی گەلێ کوردستانێیه.
گهلهك خۆشحالم كو ئەڤرۆ پێكڤه شاهدێن دەرچوونا (359) ئەفسەرێن گەنجێن ههرێما كوردستانێینه. وان پشتى (9) ههیڤا، خویندنا خۆ یا سهربازى، ئەکادیمی و پراکتیکی ب دوماهی ئینا و ئێدى دێ بنه بهشهك ژ هێزێن وهزارهتا كاروبارێن پێشمهرگهى.
جهێ سهربلندیێ و دەستخۆشیێیە، کو پشتی بدوماهی ئینانا خویندنا زانکۆیى و بهدهستڤهئینانا بهكهلۆیۆرسێ، هوین خۆبهخشانه، ب حەز و ڤیانا خۆ هاتنە ناڤ ڕێزێن خویندنا سهربازى؛ داکو ببنە ئەفسەر د ڕێزێن پێشمەرگاتیێدا.
ئەڤە نیشانهیێ دلسۆزی و وەفاداری و بهرههڤییا هەوەیە بۆ خزمەتکرن و پاراستنا کوردستانێ. ئەڤرۆ د ڤێ ئاهەنگێدا ئهم ههمى دگەل مالباتێن ههوە پشکدارین و ئهم ههمى ڤێكرا ب وە سهربلندین.
ژ دل، ئو ب گهرمى پیرۆزباهیێ ل هەوە و ل مالباتێن وە یێن هێژا دکەم. ل وان و ل هەوە و ل مه ههمیا پیرۆز بیت. هیڤیا سەرکەفتنێ ل ژیانێ بۆ هەوە دخوازم.
دەرچوویێن هێژا،
ژ ڕۆژا كو پێشمەرگە ههیه و هەتا ئەڤرۆ، پێشمەرگاتى جهێ شانازیێ و سەرفرازیێ و بەرپرسیاریەتییەکا مەزن بوویە. پێشمەرگاتى و پێشمهرگهبوون، ئەرکەکێ گەلەک پیرۆزە و پشکەکا گرنگ یا ناسناما نیشتمانی و نەتەوەیی یا کوردستانێیه. ئەڤە بەردەوامییا خەباتا دویر و درێژە بۆ پاراستنا گەلێ کوردستانێ ب ههمى پێكهاتێن خۆڤه.
لەوما دەرچوونا هەوە یا ئەڤرۆ و سەرکەفتنا هەوە د خویندنێدا، نە دویماهییا ڕێكێیە. نەخێر، دڤێت بزانن: ئەوا ئەڤرۆ هوین دەستپێ دکەن، دەستپێکا خزمەت و ئەرکێن هەوە یێن نوییە دگەل دهزگههێن حکوومەتى بۆ خزمەتكرنا کوردستانێ.
ئهڤرۆ باوەرناما هەوە بتنێ دەستکەفتەکێ ئەکادیمی نییه، بەلکى پەیمانەکا شەرەفێ و سیمبۆلا دلسۆزی و وەفادارییا ههوهیه بۆ كوردستانێ. ئەمانەتەکێ مەزنه بۆ خزمەتکرنا گەل و وەلاتێ خۆ، ههروهسا نیشانا ئامادهیى و بەرهەڤییا هەوەیە بۆ هەر قوربانییەکێ د ڕێكا سهرفرازییا وهلاتیدا.
پێشمەرگەی ب درێژاهییا دیرۆکا بزاڤا ڕزگاریخوازا گەلێ کوردستانێ، قوربانیێن گەلەک مەزن داینە. خوینا خۆ دایه و ب گیانێ بهرخودانێ، بەرەڤانی ل ئاخا کوردستانێ و گەلێ خۆ کریە. دیرۆکا پێشمەرگەی یا پڕە ژ قههرەمان و قوربانیێن مەزن بۆ ئازادیێ و بۆ سەرفرازییا کوردستانێ.
دەمێ کو (داعش) مەزنترین ڕێکخستنا تیرۆرستی ل جیهانێ؛ هێرش کریە سەر عێراقێ و کوردستانێ، پێشمەرگە بوون کو ب سهرۆكاتیا جهنابێ سهرۆك مهسعوود بارزانى، ب گیان و خوینا خۆ، داعش ل بەرۆكێن شەڕی تێکشکاند و نەهێلا کوردستان بکەڤیتە دەستێ وان تیرۆرستا.
ژبهر هندێ، هەتا کورد و کوردستانى بمینن، پێشمەرگە دێ ههر مینین ئیلهامبهخش بۆ گەلێ کوردستانێ و دێ ههر مینن پارێزەر و سیمبۆلێ بەرهڤانى و خۆڕاگریا مللهتێ مه.
د ڤێ هەلکەفتێدا، جارەکا دی سپاس و پێزانینا هەرێما کوردستانێ پێشكێشى هێزێن هەڤپەیمانییا نێڤدەولەتی ب سهرۆكاتییا ئهمهریكا دکەم کو د شەڕێ دژی داعشێدا؛ پشتەڤانییا پێشمەرگەی کرین.
هاریکاریا وان بۆ پێشمەرگهیان و بۆ سوپایێ عێراقێ، پشتەڤانییەکا ستراتیژی و ئێكلاكهر بوو. سپاس پێزانین بۆ هاریكارى و پشتەڤانییا وان یا بەردەوام بۆ پرۆسا چاکسازیێ ل وەزارەتا کاروبارێن پێشمەرگەى.
هەروەسا پێویسته ئاماژێ بدهینه گرنگییا هەماهەنگی و هەڤکارییا ناڤبەرا پێشمەرگەى و هێزێن سوپایێ عێراقێ بۆ بهرهنگاربوونا تیرۆرێ. کارێ هەڤپشکێ هەردولا پێویستە بۆ پاراستنا ئاسایش و ئارامیێ بتایبەتی ل دەڤەرێن ماددێ (140)، چونكى ب باوهرییا مه داعش هێشتا مەترسی و گەفە ل سەر ئاسایش و تهناهییا عێراقێ و ڤێ دەڤەرێ.
د ڤێ ڕۆژێدا، د ڤێ ههلكهفتێدا، سەرێ ڕێزێ بۆ خوینا شەهیدێن خۆ دچەمینین، چ پێشمهرگه، چ یێن سوپایێ عێراقێ، چ حەشدا شەعبی، کو گیانێ خۆ کرینە قوربانی بۆ پاراستنا وهلاتى.
ئامادەبوویێن هێژا،
د ڤێ هەلکەفتێدا پێویسته بێژین كو: پرۆسا ئێکگرتنا هێزێن پێشمەرگەی وهكى پێویست بڕێڤە ناچیت و ئەو پێشکەفتنا کو پێویست بوو، ههتا نها نەبوویه.
گەلێ کوردستانێ ب سالایە لهیڤییا ئێکگرتنا پێشمەرگەیه. دۆستێن مەیێن هەڤپەیمانییا نێڤدەولەتی، پشتەڤانی و پلان و هاریکارییا پێشکێش دکەن، چاڤەڕێنه كو ئهم ئیرادەیهكا سیاسی یا دروست یا بهێز نیشان بدهین. بهلێ مخابن ههتا نۆكه نههاتیه كرن و ڤێ ئێكێ زیانهكا مهزن گههاندییه ناڤێ ههرێما كوردستانێ.
ژ هەمیێ گرنگتر، ئەڤ دەرچوویێن گەنج و دلسۆزێن ئەڤرۆ ئهم دبینین، هەژی وێ چەندێنە بچنە ناڤ هێزەکا نیشتمانى یا ئێکگرتی. ئهڤ ڕهوشه هیچ نه یا باشه و ئهم قهت ژێ ڕازى نینه.
دگەل هندێ ژی، دیسا دبێژم: ئێكگرتنا پێشمهرگهى پێویستییهكا چارهنڤیسسازه بۆ ههرێما كوردستانێ و پێدڤییه سهركهڤیت. ئەم ل سەرۆکاتیا هەرێما کوردستانێ و حكوومهتا ههرێمێ دێ بهردهوام بین، دێ ئهركێ خۆ بینین بۆ هندێ ئهڤ كاره بێته ئهنجامدان و ئهڤ پرۆسهیه سهركهڤیت. بۆ ڤێ چهندێ دگەل دۆستێن مە ل هەڤپەیمانییا نێڤدەولەتی دێ بەردەوام بین.
پێشمەرگە بهشهكه ژ سیستەمێ بەرهڤانیێ یێ عێراقێ. ئهڤ كۆلێژه بخۆژى ل زاخۆ وهكى كۆلێژهكا سهر ب وهزارهتا بهڕهڤانیێ یا عێراقێ، نیشانا ڤێ چهندێیه. ژبهر هندێ دڤێت عێراق هەمی ئهرك و پێگیرى یێن خۆیێن یاسایی و دهستوورى بەرامبەر پێشمەرگەی بجى بینیت و هاریکاری و پشتەڤانی و چەک و تەقەمەنییا بۆ پێشمەرگەی دابین بکەت.
پێشمەرگە نە مەترسییە، بەلکى پارێزەرێ وهلاتییه و بهرێ ژى ل شهڕێ ئازادییا عێراقێ، ل پاراستنا ئاسایشا بهغدا و ل شهڕێ دژى داعشێ، ئهڤه ب ڕۆنى پێشمهرگهى یا سهلماندى كو پارێزهرێ وهلاتییه.
ئامادەبوویێن هێژا،
دەڤەرا مە ئەڤرۆ د ڕهوشهكا گران و ئالۆزدا دەرباز دبیت. گرژیێن هەرێمی، کاریگەرییا خۆ لسەر هەمیا کریە. ئەم ل هەرێما کوردستانێ تهئكیدێ لسەر هەلویستێ خۆ یێ جێگیر دکەین کو ئەم دگەل چارەسەرى یێن ئاشتیانەینه بۆ هەمی کێشە و ناكۆكییا. مه نهڤێت عێراق و هەرێما کوردستانێ ب چ ڕەنگەکێ ببیته بهشهك ژ ڤان كێشه و ئالۆزیا.
د ڤێ چارچۆڤێدا، ئەم ب گەشبینی چاڤەڕێی کارکرنێینه دگەل حکوومەتا بهێت ل بەغدا و دگەل سەرۆکوەزیرێ دهستنیشانكرى ڕێزدار (عهلى زهیدى)، ب گیانێ ههڤپشكییا نیشتمانى یا ڕاستەقینە و لهسهر بنهمایێ دهستوورێ عێراقێ ئەم ئامادهینه پێکڤە کار بکەین بۆ خزمەتکرنا هەمی عێراقێ، ب شێوەیەکێ کو سیستهمێ فیدرالى و مافێن دەستووری یێن ههرێما كوردستانێ و یێن هەمیا، بهێنە پاراستن و تهناهى و گەشەپێدان و ئاڤەدانی، بۆ هەمی عێراقێ بێ جوداهى بێنه مسۆگهركرن.
هەرێما کوردستانێ یا فیدرالى پشکەکا گرنگا عێراقێیه. پاشەڕۆژا عێراقێ و یا ههرێما کوردستانێ پێکڤە گرێداییە. سەرکەفتنا مە ئێکە، تهحهددى و چارهنڤیسێ مە ژى، هەڤپشکن. بهێزییا بهغدا، ئانكو بهێزییا ههرێما كوردستانێ، بهێزییا ههرێما كوردستانێ، هێزهكه بۆ بهغدا.
ژبهر هندێ کارێ هەڤپشک یێ لسەر بنەمایێ دەستووری و ڕێزگرتنا دولایەنە و ههڤپشكییا نیشتمانى، بتنێ ڕێكە بۆ ئاڤاکرنا عێراقەکا بهێز و تهنا کو خزمەتا هەمی وەلاتیێن خۆ بکەت. ئەم د ئیرادەیا خۆدا جددینە بۆ چارەسەریا ههمى كێشه و ناكۆكییا لسهر بنهمایێ دهستوورى.
دەرچوویێن خۆشتڤى،
ژبیر نەکەن: کۆلێژا سهربازى پەروەردەکرن و پێگەهاندنا هەوە، گرتیە سهر ملێ خۆ، داکو وەک فەرماندەیێن خودان شیان، ئهرك و بهرپرسیاریهتییا خۆ بجى بینن. داكو دگهل پاراستنا کوردستانێ، بەرەڤانیێ ل دادپەروەریێ و مرۆڤایەتیێ بکەن. بنەما و بەهایێن بلندێن نیشتمانی و قوربانیدان و دیسپلین، بنەمایێن سەرەکینە؛ کو پێویستە هەردەم د هزر و دلێ هەوەدا بن.
هوین پێشمهرگه، سوپایێ ههمى كوردستانێنه ب ههمى پێكهاتێن خۆڤه. ڕۆلێ هەوە بتنێ د مەیدانێن شەڕیدا نییە. ڕۆلێ ههوه نه بتنێ فێربوونا هونهر و تهكنیكێن سهربازییه، بەلکى دڤێت ئەرکێ هەوە بەرفرەهتر بیت بۆ ئاڤاکرنا جڤاکێ تهنا و ئارام. بۆ ڕهتكرنا تونڕهویێ، دهمارگیریێ و تیرۆرێ.
بەرپرسیاریەتییا پاراستنا بەهایێن ئازادى، ئاشتى، دیموکراسی، مافێن مرۆڤی و جڤاكا مهدهنى یا ڤهكرى، پێكڤهژیانێ و قهبوولكرنا ئێكودو، لسەر ملێن هەوەیە. ببنە سهركرده و ببنه نموونە، بۆ پاراستنا دادپەروەریێ و بەرەڤانیکرنێ ل مافێن هەمی وەلاتیێن هەرێما کوردستانێ و عێراقێ.
باوهرییا مه ههمیا ب هەوە دهێت کو هوین دێ شێن بەرەنگاری تهحهدییا ببن و د ئەرکێن خۆدا سەرکەڤن، داکو ب باشترین شێوە خزمەتا وهلاتێ خۆ بکەن. ببنە هێزا نیشتمانی یا کوردستانێ د چارچۆڤێ وەزارەتا کاروبارێن پێشمەرگەیدا. چ جارا نەبنە بهشهك و لایەنەکێ کێشە و ململانێ یێن سیاسی.
ل دوماهیێ،
ب گهرمى سپاسى و دهستخۆشیێ پێشكێشى ڕێزداران ڕاگر و مامۆستا و بەرپرس و ڕێڤەبەرێن کۆلێژا سهربازى یا زاخۆ دکەم. کار و خزمەت و دلسۆزییا وان؛ جهێ پێزانینەکا مەزنە.
ئەرکێ وان؛ یێ پیرۆز و ڕۆڵێ وان گەلەکێ گرنگە بۆ باشترکرن و پێشڤهبرنا ئەرکێن پێشمەرگەی و پێگەهاندنا نڤشهكێ نوى ژ پارێزەرێن وهلاتى، کو لسەر زانستێن سهربازى و ڤیانا نیشتمانى پەروەردە بووینە. سپاسیا ههوه ههمیا دكهم، دهستخۆشیێ ل ههوه ههمیا دكهم، ل ڕاگرێ كۆڵێژێ و ههمى ئهفسهرێن وه.
سلاڤ و ڕێز بۆ گیانێ پاقژێ هەمی شەهیدێن كوردستانێ، یێن كو خەبات کرین و گیانێ خۆ بۆ کوردستانێ كریه قوربان دا ئهم ئهڤرۆ پێكڤه ڤێ ئاههنگێ بگێڕین. سلاڤ بۆ شەهیدێن زیندی، بۆ هەمی وا قههرەمانێن کو د ئەرکێ پاراستنا کوردستانێدا، بریندار بووین. ژ ڤێرێ، سلاڤ و ڕێزێن من قهبوول بكهن، دهسێ وان ماچى دكهم. هیڤییا ساخبوونێ ب ئانههییا خودێ بۆ وان ههمیا دخوازم.
جارەکا دی ب گەرمی و ژ دل پیرۆزباهیێ ل هەوە ههمیا دکەم دهرچوویێن هێژا. هیڤیا سەرکەفتن و سهرفرازیێ بۆ هەوە ههمیا دخوازم. هیڤى دكهم خودێ هاریكارێ ههوه بیت دڤێ ژیانا وه دهستپێ كرى. ب ئانههییا خودێ ههوه ببینم ب خۆشى و سهلامهتى و سهركهفتن.
دڤێت سپاسییا ئیدارا سهربخۆ یا زاخۆ ژى بكهین كو هاریكاریا كۆلێژێ كریه و ئهم وان پێشكهفتنان ژى دبینین یێن كو ل باژێرێ زاخۆ ئهنجام داى. هیڤیا ئهمه ئهوه ههمى لا بهردهوام و سهرفراز و سهركهفتى بن. كوردستان ههر ئاڤهدان بیت و هوین ژى پارێزهرێن كوردستانێ سهرفراز و سهركهفتى بن.
زۆر سپاس.