هەولێر-KDP.info- وەزارەتی ناوخۆی ھەرێمی کوردستان ڕایگەیاند کە پاش ڕێککەوتنی ئاگربەستی نێوان ئەمەریکا و ئێران، ئەمڕۆ بۆ جاری دووەم و لە ڕێگەی چوار درۆنی بۆمبڕێژکراوەوە ھێرش کراوەتە سەر ھەرێمی کوردستان، ھاوکات جەخت دەکاتەوە کە ھەرێم بەشێک نییە لە ھیچ ململانێیەک و نابێت سەقامگیرییەکەی بکرێتە ئامانج.
دەقی ڕاگەیەندراوەکەی وەزارەتی ناوخۆی ھەرێمی کوردستان.
لە دوای ڕاگەیاندنی ئاگربەست لە نێوان ئەمەریکا و ئێران، ئەمە بۆ جاری دووەمە بە درۆنی بۆمبڕێژکراو ھێرش دەکرێتە سەر ھەرێمی کوردستان و ئەمڕۆ سێشەممە، ڕێکەوتی ١٤ی نیسانی ٢٠٢٦، لە چەند کاتێکی جیاوازدا، بە چوار درۆنی بۆمبڕێژکراو ھێرش کرایەوە سەر ھەرێمی کوردستان.
ئێمە لێرەوە جەخت لە ھەڵوێستی نەگۆڕی ھەرێمی کوردستان دەکەینەوە کە ھەرگیز بەشێک نەبووە لە ھیچ شەڕ و ململانێیەک، داواش دەکەین چیتر سەقامگیریی ھەرێم و ئارامیی ھاووڵاتییان نەکرێنە ئامانج.
وەزارەتی ناوخۆی حکوومەتی ھەرێمی کوردستان
١٤ی نیسانی ٢٠٢٦