دهۆک-KDP.info-لە هەنگاوێکی مرۆیی و نەتەوەییدا کە تێیدا مێژوو و نەوەی نوێ یەکتریان گرتەوە، شاری دهۆک یادی لەدایکبوونی بارزانیی نەمر و ساڵڕۆژی ڕاپەڕینە شکۆدارەکەی بە کۆمەڵێک چالاکیی جیاواز بەرز ڕاگرت، کە تێیدا دەستپێشخەرییەکی تایبەت بۆ خەڵاتکردنی ئەو منداڵانە ئەنجامدرا کە لەم ڕۆژە مێژووییەدا لەدایکبوون.
ئەمڕۆ شەممە ١٤-٣-٢٠٢٦، لە کەشێکی پڕ لە شکۆ و سەرفرازیدا، شاری دهۆک یادی دوو بۆنەی مەزن و مێژوویی کردەوە، ساڵڕۆژی لەدایکبوونی ڕابەری ڕوحیی نەتەوەی کورد، بارزانیی نەمر، و ساڵڕۆژی ڕاپەڕینە شکۆدارەکەی شاری دهۆک.
بەم بۆنەیەوە خانمە کارگێڕی لقی یەک، شارێ نەزیر بە یاوەری شاندێکی ناوەندی دهۆکی یەکێتیی ئافرەتانی کوردستان، سەردانی نەخۆشخانەی ئافرەتان و لەدایکبوونیان لە شاری دهۆک کرد.
لە دەستپێشخەرییەکی وەفادارانەدا، شاندی لقی یەک و ئافرەتان پیرۆزباییەکی گەرمیان ئاراستەی ئەو دایکانە کرد کە لەم ڕۆژە پیرۆزەدا کۆرپەکانیان چاویان بە دنیا هەڵێناوە. لەم چوارچێوەیەدا، خەڵات و دیاریی تایبەت پێشکەش بە سەرجەم ئەو کۆرپانە کرا کە هاوکاتی یادی بارزانیی نەمر و ڕاپەڕینی دهۆک لەدایکبوون.
جێگای باسە ئەم چالاکییە نیشانەی پەیوەندییەکی توندوتۆڵی نێوان یادە نەتەوەییەکان و ژیانی کۆمەڵایەتیی خەڵکە، کە تێیدا نەوەی نوێ بە خۆشی و بەهای بەرزی نەتەوایەتییەوە پێشوازییان لێدەکرێت.