دکتۆر خەسرۆ ئاژگەیی
مرۆڤە بەرز و ڕابەرە مەزنە نەتەوەییەکان هەموو کاتێك بە تۆماری ژیان و خەباتیان و بە دیرۆکی هەڵوێست و تێکۆشانیان دەبنە چیرۆك و داستانی هەردەم زیندووی مێژووی گەلەکەیان. ئەوان دەبنە ئەو کەسایەتی و سەرکردە ناودارانەی کە پاشناوی نەمری هەڵدەگرن.
بە گەواهی دۆست و دوژمنانیش، مستەفا بارزانی لەو هاوکێشەیەی سەرەوەدایە. چونکە ئەو مرۆڤە مەزنە، توانیویەتی لە ئەنجامی خەبات بۆ پاراستن و سەرفیرازی گەلەکەی، ببێتە سومبولێکی درەوشاوەی ئازادیخوازی لە مێژووی نەتەوەکەی و بگرە لە جیهانیشدا. ئەو ڕابەرێکی نەتەوەیی بوو کە مێژووی گەلی کورد و کوردستان بە بێ ناو و خەباتی ئەو هیچ مانایەكیان نامێنێت. پڕۆفیسۆری ڕوسی مێدڤیدکا دەڵێت: "بارزانی زادەی سەدەیە، سەدەی بیستەم، چونکە لەگەڵ دەسپێکی ئەو سەدەیەدا لەدایکبووە. ئەو مرۆڤێکی بێ وێنە وکەسایەتییەکە هەموو ژیانی پێشكەشی سەدە کرد.“ بارزانی نەمر یەکێكە لە ڕێبەرە ناودار و قارەمانەکانی کورد وکوردستان . خەباتێک کە بارزانی بە درێژایی زیاتر لە نیو سەدەدا لە پێناو ئازادی و سەربەستی ئەنجامیدا ڕۆڵێکی وەرچەرخێنەری لە مێژوودا تۆمارکرد.
هەڵۆی بەرزەفڕی شاخەکان، بارزانی نەمر، چەندین زەمەن دەگۆڕێت و بەرەو پێش دەڕوات. رێبازی ئەو سەرکردەیە لە وێستگە و قۆناغە جیاجیاکانی مێژووی کورد و ئاکام و ئاراستەکانی ئەو مێژووەدا، ڕەنگدانەوەی خۆی ھەیە بەسەر واقیع و قۆناغە تازەکانی ئەوڕۆیدا، ئەمەش گرینگی شێواز و ڕەوتی تێکۆشانی بارزانی نەمرە وەك ڕابەڕێکی مێژوویی. ئێستا دەبینین لە دوای تێپەڕوبوونی نزیکەی سەدەیەك، ناو و فیکر و ئامانجە نیشتیمانی و نەتەوەییەکانی بارزانی نەمر، لە ژیانی سیاسی و کۆمەڵایەتی و نەتەوەیی کورددا ھەروا زیندووە و بۆتە رێنیشاندەرێك بۆ داکۆکیکردن لە ناسنامەی نەتەوایەتی و چارەسەرکردنی کێشەی ڕەوای ئەو گەلە. ڕۆڵ و کاریگەری بیر و خەباتی بارزانی نەمر لە کوردستان و لەنێو هاوکێشەکان و لەسەر شانۆی سیاسی ناوچەکە و جیهاندا حاشای لێ ناکرێ کە چۆن هەوڵی ناساندن و پاراستنی دۆز و مافە ڕەواکانی گەلەکەی داوە و بەرانبەر بە هەموو فشار و پەلامار و ململانێیەکانی زلهێزان و ووڵاتانی دژ بە کورد ڕاوەستاوە.
ئەم ڕابەرە مەزنە دوای خۆی نەك تەنها ئەزمونێکی پاك و بەهێزی سەرکردایەتی کردن و کلتوورێکی تەندروستی بۆ خزمەتکردنی گەل و خاکی کوردستان بەجێهێشتووە، بەڵکو بارزانی نەمر توانیویەتی ببێتە ئاوێنەی بوون و مانەوەی گەل و نیشتیمانەکەی و ئەو سمبولە مەزنەی کە مێژوو بە شوناس و ڕۆشەنکەرەوەی ئاسۆی سەرفیرازی نەتەوەیەك گوزارشتی لێبکات.
هەروەك نووسەری هۆڵەندی بەناوبانگ دکتۆر ماڕتن ڤان بڕاونسن دەڵێ: (نەوەکانی داهاتووش دەبێت بارزانی بکەن بە ئاوێنەیەك بۆ دروستکردنی دواڕۆژ)، بارزانی، کاروانی سەرکەوتنی نەتەوەیەکی خستە ڕێ و ئاسۆی چارەنووسی نیشاندا. بۆیەشە کەسایەتی بارزانی نەمردووە و ناشمرێ. بارزانی نە کۆچی بووە مەرگ و نە لەدایکبوونیشی بۆ تەمەنێکی دیاریکراوبوو. بارزانی هەبوونێکی ئەبەدی و مێژوویەکی بێ کۆتاییە. تا وادەی بە جەستە کۆچکردنی سەرکردە و ڕێبەرێك بوو، بەڵام ئێستا ڕێبازێکە و ڕێگەی ئازادی و سەربەخۆیی کوردستانی ڕۆشەن کردۆتەوە..
ئەی سەرکردەو و ڕابەر، لە زیندوو ڕاگرتنی ڕێبازی تۆدایە نەتەوەیەك ناکەوێت و زەمانەتی پێشکەوتنی وەردەگرێت. لێرەشەوە لەگەڵ هەژار دەیڵێینەوە:
بارزانی هەر هەی وەكو بووی
هەر دەشمێنی و نەمردووی