ھەولێر-KDP.info- بە فەرمانی مەسروور بارزانی، سەرۆکی حکوومەتی هەرێمی کوردستان، گۆڕانکارییەکی بنەڕەتی لە ڕێنوێنییەکانی دابەشکردنی زەویدا کرا و بە فەرمی فەرمانبەرانی گرێبەست خرانە لیستی سوودمەندبووانەوە.
ئەمڕۆ چوارشەممە، ٤ـی شوباتی ٢٠٢٦، ڕێنوێنیی نوێی وەزارەتی شارەوانی و گەشتوگوزار لە ڕۆژنامەی فەرمیی (وەقایعی کوردستان) بڵاوکرایەوە. گرنگترین خاڵەکانی ڕێنوێنییەکە بریتین لە:
یەکسانی لە مافدا: فەرمانبەرانی گرێبەست هاوشێوەی فەرمانبەرانی هەمیشەیی (شارستانی و سەربازی) زەوییان پێ دەدرێت.
مەرجی خزمەت: هەر فەرمانبەرێکی گرێبەست کە ٨ ساڵ و زیاتر خزمەتی هەبێت و پێشتر سوودمەند نەبووبێت، مافی وەرگرتنی زەویی هەیە.
ڕووبەری زەوی: بڕی ٢٠٠ مەتر زەوی بۆ هەر فەرمانبەرێکی شایستە تەرخان دەکرێت.
ئەم هەنگاوە درێژەپێدەری بڕیاری ٢٧ـی ئاداری ٢٠٢٤ـی ئەنجوومەنی وەزیرانە کە بە فەرمانی سەرۆکوەزیران مەسروور بارزانی، مەبەست لێی باشترکردنی گوزەرانی فەرمانبەران و دابینکردنی مافی نیشتەجێبوونە بۆ ئەو چینەی کە ساڵانێکی درێژ خزمەتی کەرتی گشتییان کردووە.