هەولێر-KDP.info- مەکتەبی سیاسی پارتی دیموکراتی کوردستان، بەبۆنەی (٣١)ـەمین ساڵیادی دامەزراندنی پارتی ڕەنجدەرانی کوردستان، پەیامێکی پیرۆزبایی ئاراستەی سکرتێر و سەرکردایەتی و ئەندامانی ئەو پارتە کرد.
مەکتەبی سیاسی پارتی لە پەیامەکەیدا، وێڕای دەربڕینی گەرمترین پیرۆزبایی، هیوای سەرکەوتنی بۆ خەباتی پارتی ڕەنجدەران خواست لەپێناو دەستبەرکردنی مافەکانی گەلی کورد و پاراستنی سەقامگیری هەرێمی کوردستان.
دەقی پەیامەکەی مەکتەبی سیاسی پارتی دیموکراتی کوردستان:
بەڕێز/ کاک باپیر کامەلا سکرتێری گشتی پارتی ڕەنجدەرانی کوردستان
بەڕێزان/ ئەندامانی مەکتەبی سیاسی و سەرکردایەتی پارتی ڕەنجدەرانی کوردستان.
لە سی و یەکەمین ساڵوەگەڕی دامەزراندنی پارتی ڕەنجدەرانی کوردستان، گەرمترین پیرۆزبایی لە ئێوەی بەڕێز و ئەندام و لایەنگرانی پارتە تێکۆشەرەکەتان دەکەین و، هیوادارین لە خەباتی ڕەواتاندا بەردەوامبن بۆ دەستبەرکردنی مافەکانی گەلەکەمان و سەقامگیریی هەرێمی کوردستان.
لەو دەرفەتەدا، وێڕای بەرزنرخاندنی هەڵوێست و ڕۆڵی ئەرێنی نەتەوەیی و نیشتمانیانەی پارتەکەتان، دووبارە جەخت دەکەینەوە سەر هەماهەنگی و هاریکاریی بەردەوامی نێوانمان و سەرجەم پارت و هێز و لایەنە سیاسییەکان بۆ پتەوکردنی بنەماکانی دیموکراسی و پێکەوەژیان و، بەرقەراربوونی ئاشتەوایی و پاراستنی دەستکەوتەکانمان.
مەکتەبی سیاسیی پارتی دیموکراتی کوردستان
١ی شوباتی ۲۰۲٦