ھەولێر-KDP.info- نێچیرڤان بارزانى، سه‌رۆكى هه‌رێمى كوردستان، لە یادی چل ساڵەی دامەزراندنی حیزبی زەحمەتکێشانی کوردستاندا، بە گەرمی پیرۆزبایی له‌ سکرتێر و ئەندامانی مەکتەبی سیاسی و سەرکردایەتیی حیزبی زەحمەتکێشانی کوردستان ده‌كات و ده‌ڵێت، لەم یادەدا، بە ڕێزەوە لە خەبات و تێکۆشانتان دەڕوانین و جەخت لە گرنگیی تەبایی و یەکڕیزیی نێوان لایەنە سیاسییەکان دەکەینەوە.

ده‌قی په‌یامه‌كه‌ی سه‌رۆكى هه‌رێمى كوردستان:

بەڕێزان سکرتێر و ئەندامانی مەکتەبی سیاسی و سەرکردایەتیی حیزبی زەحمەتکێشانی کوردستان

یادی چل ساڵەی دامەزراندنی حیزبه‌ تێكۆشه‌ره‌كه‌تان، حیزبی زەحمەتکێشانی کوردستان، لە ئێوه‌ى به‌ڕێز و ته‌واوى ئەندامان و لایەنگرانتان بە گەرمی پیرۆز دەکەم. هیوای سەرکەوتن و پێشکەوتنی بەردەوامتان بۆ دەخوازم.

حیزبی زەحمەتکێشانى كوردستان لە ماوەی چوار دەیەی ڕابردوودا، چ لە قۆناغی خەباتی پێشمەرگایەتی و شۆڕشدا، چ لە قۆناغی ئازادی و حوكمڕانیدا، ئاماده‌یى و ڕۆڵی دیارى لە گۆڕەپانی سیاسیی کوردستاندا هەبووە و لەپێناو مافەکانی گەلی کوردستاندا، قوربانیى داوه‌.

لەم یادەدا، بە ڕێزەوە لە خەبات و تێکۆشانتان دەڕوانین و جەخت لە گرنگیی تەبایی و یەکڕیزیی نێوان لایەنە سیاسییەکان دەکەینەوە؛ بۆ پاراستنی ماف و دەستکەوتەکان و داهاتوویه‌كى باشتر بۆ گه‌لى كوردستان.

سڵاو بۆ گیانی پاکی شەهیدانی حیزبی زەحمەتکێشان و سەرجەم شەهیدانی کوردستان.

هەر سەرکەوتوو بن.

نێچیرڤان بارزانى

سه‌رۆكى هه‌رێمى كوردستان

2025/12/12