Kurdistan Democratic Party

Renewal  .  Justice  .  Coexistence


 

سەرۆک بارزانی پێشوازی لە شاندێکی سەربازیی بەریتانیا دەکات

ھەولێر-KDP.info-  رۆژی پێنجشەممە 31ـی تەممووزی 2025 لە سەلاحەددین سەرۆک مسعود بارزانی پێشوازی لە شاندێکی سەربازیی بەریتانیا بە سەرۆکایەتیی بەڕێز ئیدوارد ئاڵگرن، ڕاوێژکاری باڵای بەرگری بەریتانی بۆ کاروباری ڕۆژهەڵاتی ناوەڕاست و باکووری ئەفریقا کرد.

لەو دیدارەدا کە بەڕێز ئەندرو بیزلی، کونسوڵی گشتیی بەریتانیا لە هەرێمی کوردستان ئامادەی بوو، دوایین گۆڕانکاری و بارودۆخی سیاسی و ئەمنی عێراق و ناوچەکە بە گشتی خرانە بەرباس و گفتوگۆ. هەروەها شاندی میوان ئیدانەی ئەو هێرشە درۆنیانەیان کرد کە دەکرێنە سەر هەرێمی کوردستان و پاڵپشتیی خۆیان بۆ پاراستنی ئاسایش و سەقامگیری هەرێمی کوردستان دووپات کردەوە و داوایانکرد هەرچی زووە ئەو هێرشانە بوەستێندرێن و ئەنجامدەرانیان ئاشکرابکرێن و رووبەڕووی یاسا بکرێنەوە.

هەر لەو دیدارەدا جەخت لە پتەوکردنی هاوکاری و هەماهەنگیی سەربازی و ئەمنی نێوان حکومەتی هەرێمی کوردستان و بەریتانیا کرایەوە.

پەیوەندییەکانی نێوان حکومەتی هەرێمی کوردستان و حکومەتی عێراقی فیدڕاڵ و بارودۆخی سیاسیی ناوخۆی هەرێمی کوردستان تەوەرێکی دیکەی ئەم دیدار بوون.