مووسڵ -KDP.info- پەرلەمانتارێکی پارتی دیموکراتی کوردستان گوتی: لە ھەموو پارێزگاکان پاس دابین کراون بۆ ھاتووچۆی خەڵک، بۆیە ئێمەش لەڕێگەی ھەوڵەکانی خۆمان ٢٠٠ پاسمان دابین کردووە بۆ ئەوەی ھاتوچۆ بە خەڵک بکات، ئێستا تەنیا ماوە شوفێر بۆ پاسەکان دابین بکرێن.

کاڤین شێخ سەعید، ئەندامی پەرلەمانی عێراق لە فراکسیۆنی پارتی دیموکراتی کوردستان، بە ماڵپەڕی فەرمیی پارتی دیموکراتی کوردستانی ڕاگەیاند  "لە پارێزگای نەینەوا پاس بۆ ھاتوچۆی خەڵک نەبوو، ئەمەش گرفتی بۆ خەڵکی ھەژار دروست کردبوو بۆ هاوچۆ، ئێمەش وەکو فراکسیۆنی پارتی دیموکراتی کوردستان هەوڵمان دا و توانرا ٢٠٠ پاس بۆ ٢٢ ناحیە و ٩ قەزای سەر بە پارێزگای نەینەوا دابین بکرێت، ئێستا تەنیا ماوە شوفێر بۆ ئەو پاسانە دابین بکرێت، ئەو پاسانە بەسەر ناوچە کوردستانیییەکانی سەر بە پارێزگای نەینەوا دابەش دەکرێن."
کاڤین شێخ سەعید گوتیشی "داوامان لە پارێزگای نەینەوا کردووە ٢٠٠ شوفێر دامەزرێنن بۆ ئەوەی بەو کارە ھەڵسن، کرێی ھاتوچۆش لە ناوخۆی پارێزگا و دەوروبەری تەنیا ٥٠٠ دینار بێت، بۆ دەرەوەی پارێزگاش 10 ھەزار دینار دەبێت، بۆ نموونە لە مووسڵ بۆ بەغدا، ئەو پاسانەش بەردەوام ھاتوچۆ بە خەڵک دەکەن، لیژنەیەکیش لە بەغدا ھاتبوو، چاوەڕێ دەکرێت تا ھەفتەی داھاتوو پاسەکان بگەنە مووسڵ و خەڵک سودیان لێ وەربگرن."

بڵند ئیبراھیم