Kurdistan Democratic Party

Renewal  .  Justice  .  Coexistence


 

ئاریان ئەحمەد: پڕۆژەی گەشانەوە پاڵپشتییەکی باشە بۆ پڕۆژە بچووک و مامناوەندەکان

حکوومەتی ھەرێمی کوردستان پڕۆژەی گەشانەوەی ڕاگەیاند و گوتەبێژی وەزارەتی کاروباری کۆمەڵایەتیش دەڵێ: پڕۆژەکە پاڵپشتییەکی باشە بۆ ئەو کەسانەی پڕۆژەی بچووک و مامناوەند ئەنجامی دەدەن.

ئاریان ئەحمەد، گوتەبێژی وەزارەتی کاروباری کۆمەڵایەتی بە ماڵپەڕی فەرمیی پارتی دیموکراتی کوردستانی راگەیاند: حکوومەتی ھەرێمی کوردستان لەڕێگەی پڕۆژەی گەشانەوە دەیەوێ دەستی ئەو کەسانە بگرێت پڕۆژە و کارگەی بچووک و مامناوەندییان ھەیە و بەھۆی نەبوونی توانای دارایی ناتوانن کار بکەن، پڕۆژەکە ڕاستەوخۆ لەلایەن سەرۆکایەتی ئەنجوومەنی وەزیرانەوە سەرپەرشتی دەکرێت لەگەڵ ڕێکخراوێک و بانکی جیھان پڕۆژەکە بەڕێوە دەبرێت.

گوتەبێژی وەزارەتی کاروباری کۆمەڵایەتی گوتی: ئەو قەرزە بە ھاووڵاتی نادرێت وەک کەس، بەڵکو ئەو ھاووڵاتییانەی پڕۆژەیان ھەیە سوودمەند دەبن، بۆ نموونە کەسێک کارگەیەکی ھەیە یان پێشتر ھەبووە و بەھۆی نەبوونی پارەوە لەکارکردن وەستاوە دەتوانێت سوودمەندبێت و لەو پڕۆژەیە، هاوکات چەند کەسیش سوودمەند دەبن لەو کارگەیە یان کۆمپانیا بچووک و مامناوەندە.

ئاریان ئەحمەد ڕوونی کردەوە: چەندین کارگە و پڕۆژەی بچووک و مامناوەند لە ھەرێمی کوردستان ھەبوون بەھۆی قەیرانی دارایی و ھاتنی ڤایرۆسی کۆرۆنا لەکارکردن وەستاون، پڕۆژەی گەشانەوە دەستگیرۆ و پاڵپشتییەکی زۆر باشە بۆ ئەو کەسانەی پڕۆژەیان ھەیە، قەرزەکەش  تا ١٥٠ ملیۆن دیناری عێراقییە.

قائید میرۆ