Stenbol-KDP.info: Bi amadebûna berpirsê Beşa Rewşenbîrî û Ragihandinê ya Partiyê û zêdetirî 100 kesayetiyên diyar, (Şeva Wefadariyê ji bo Îsmaîl Beşikçî) li bajarê Stenbolê birêve çû, û  mizgîniya terxankirina erd ji bo Akademiya Beşikçî li Hewlêrê hat ragihandin.

Roja Înê 15.05.2026, bi amadebûna Dr. Salar Osman, berpirsê Beşa Rewşenbîrî û Ragihandinê ya Partiya Demokrat a Kurdistanê û hejmareke zêde ji rewşenbîr, hunermend û sermayedaran, merasîma Şeva Wefadariyê ji bo bîrmendê mezin û dostê dêrîn ê gelê Kurd (Îsmaîl Beşikçî) hat lidarxistin.

Di dema merasîmê de, akademîsyen û nivîskar Îsmaîl Beşikçî bi rêya vîdyoyê bi awayekî zindî beşdar bû û gotarek pêşkêş kir. Beşikçî bi girîngî behsa rola dîrokî ya Serok Barzanî kir û ji ber helwestên wî yên neteweyî, spasî û pêzanînên xwe yên taybet pêşkêşî wî kir.

Di vê merasîmê de, peyama Mesrûr Barzanî, Serokê Hikûmeta Herêma Kurdistanê hat xwendin, ku tê de amaje bi girîngiya beşdarî û xebata akademîk a Îsmaîl Beşikçî di têgihîştina rastiyên dîrokî û civakî yên gelê Kurd de kiribû.

Piştre Îbrahîm Gurbuz, serpereştiyarê merasîmê (ku ji aliyê Dezgeha Îsmaîl Beşikçî û Dezgeha Guneştekîn ve hatibû organîzekirin), peyva bi xêrhatinê pêşkêş kir û tevî bilindnirxandina rola Beşikçî, eşkere kir ku ji aliyê Mesrûr Barzanî, Serokwezîrê Herêma Kurdistanê ve, parçeyek erd bi rûberê 10 doniman li Hewlêrê ji bo dezgehê hatiye terxankirin. Gurbuz got jî ku kar berdewam in ji bo avakirina navendeke mezin a perwerdehî û çandî li ser wî erdî bi navê (Akademiya Kurdolojiyê ya Îsmaîl Beşikçî).

Di dawiya şevê de, bi armanca rêzlêgirtina li karên zanistî û helwestên wijdanî yên vî bîrmendî, hunermend Rewşan û Delîl Dîlanar konsereke muzîka klasîk û resen pêşkêş kirin.