ایڤۆن پترۆز ئۆھان
ھەندێک خەڵات بە نرخ و شێوەی میدالیاکەیان گرنگ نابن، بەڵکو بەو پەیامەی کە لە پشتیانەوەیە. ڕێزلێنانی قەداسەتی پاپای ڤاتیکان لە سەرۆک مەسعود بارزانی، لەو جۆرە پەیامانەیە، پەیامێک کە دەڵێت لە ناوچەیەکی پڕ لە شەڕ، ئاوارەیی و ھەوڵی سڕینەوەی ناسنامەکاندا، پاراستنی مرۆڤ و ڕێزگرتن لە جیاوازییەکان بەھایەکی گەورەیە.
بۆ من وەک ئەرمەنییەک، ئەم مانایە زۆر نزیکە. مێژووی ئێمە فێری کردووین کاتێک ناسنامەی نەتەوەیەک، ئایینێک یان زمانێک بێ پارێزەر بمێنێتەوە، زیانەکە تەنھا بەو پێکھاتەیە ناگات، بەڵکو کۆمەڵگە بە تەواوی ھەژارتر دەبێت. بۆیە ھەر سیاسەت و ھەڵوێستێک شوێن بۆ مانەوەی پێکھاتەکان بکاتەوە، شایستەی ھەڵسەنگاندنە.
لە کوردستاندا گرنگ ئەوە نییە تەنھا بڵێین پێکھاتەکان ھەن، بەڵکو گرنگ ئەوەیە بتوانن بە ناوی خۆیانەوە بمێننەوە، زمانی خۆیان بپارێزن، ئایینی خۆیان بە ئازادی بپەرستن و بە ناسنامەی خۆیانەوە بەشداری لە ژیانی گشتیدا بکەن. بۆ ئەرمەنییەکان ئەمە مانایەکی تایبەتی ھەیە، چونکە بوون و بەردەوامیی ھەر کۆمەڵگەیەک بە پاراستنی یادەوەری، کلتوور و دامەزراوەکانییەوە پەیوەستە.
لەبەر ئەوە، من میدالیاکە تەنھا وەک ڕێزلێنان لە ڕابردوو نابینم، بەڵکو وەک داواکارییەکیش بۆ داھاتوو دەیبینم. ئەگەر کوردستان لە دەرەوە وەک شوێنێکی فرەڕەنگ و پێکەوەژیان دەناسرێت، ئەوا ئەم وێنەیە پێویستی بە پاراستن و بەردەوامی ھەیە، چونکە ھیچ دەستکەوتێک لەم بوارەدا بە یەکجار تەواو نابێت.
ڕۆڵی سەرۆک بارزانی لەم نێوەندەدا لەوەدایە کە لە قۆناغە جیاوازەکاندا پێکھاتەکانی وەک بەشێکی سەرەکی لە کوردستان بینیوە، نەک وەک میوان یان کۆمەڵەیەکی لاوەکی. ئەم جیاوازییە لە تێڕوانیندا زۆر گرنگە، چونکە مافی پێکھاتەکان کاتێک بەھێز دەبێت کە لە بنەڕەتدا بە ھاوبەشی خاک و داھاتوو ئەژمار بکرێن.
لە کۆتاییدا، بەھای ئەم میدالیایە لەلای من لەوەدایە کە ناوی کوردستان بە بیرۆکەی پاراستنی فرەڕەنگییەوە دەبەستێتەوە. ئەمە بۆ ئێمەی ئەرمەنی و بۆ ھەموو پێکھاتەکان گرنگە، چونکە ئاشتیی ڕاستەقینە تەنھا نەبوونی شەڕ نییە، بەڵکو دڵنیابوونە لەوەی ھیچ کەسێک ناچار ناکرێت بۆ مانەوە، دەست لە ناسنامەی خۆی ھەڵبگرێت.
سەرۆکی هاوبەندی ئەرمەنی