هەولێر-KDP.info- بەڕێوەبەری گشتیی وەبەرهێنانی دهۆک ڕایدەگەیەنێت، لە ساڵی ۲۰۰٦ەوە تا ئێستا مۆڵەت بە ۳٦٥ پڕۆژەی وەبەرهێنان لە سنووری پارێزگاکەدا دراوە. ئاماژە بەوەش دەکات کە زیاتر لە ٪٤۰ی ئەو پڕۆژانە لە سەردەمی کابینەی نۆیەمی حکوومەتی هەرێمی کوردستاندا بووە و توانیویانە دەرفەتێکی زۆری کار بۆ هاووڵاتیان بڕەخسێنن.
د. هەڤاڵ سدیق، بەڕێوەبەری گشتیی وەبەرهێنانی دهۆک لە لێدوانێکدا بۆ ماڵپەڕی فەرمیی پارتی دیموکراتی کوردستان ڕایگەیاند، "لە سەرەتای دەرچوونی یاسای وەبەرهێنان لە ساڵی ۲۰۰٦ تا ئێستا، لە سنووری پارێزگای دهۆک مۆڵەت بە ۳٦٥ پڕۆژەی وەبەرهێنان دراوە. لەو ژمارەیەش تەنیا لە دوای دەستبەکاربوونی کابینەی نۆیەمی حکوومەتی هەرێمی کوردستان، ۱۵۹ پڕۆژە مۆڵەتیان پێدراوە."
بەڕێوەبەری گشتیی وەبەرهێنانی دهۆک ئەوەشی خستەڕوو کە پڕۆژەکانی وەبەرهێنان لە هەڵکشانداندایە و گوتی، "لە سەردەمی هاتنی ڤایرۆسی کۆڕۆنا لە ساڵی ۲۰۱۹دا، تەنیا دوو مۆڵەت بە پڕۆژەکان درابوو، بەڵام لە ساڵانی دواتردا ئاستی مۆڵەتپێدان بە شێوەیەکی بەرچاو زیادی کردووە و تا ئێستاش ڕەوتەکە بەردەوامە."
لە کۆتاییدا د. هەڤاڵ سدیق جەختی لەوە کردەوە کە هەمەجۆرکردنی سێکتەرەکان یەکێکە لە ستراتیژییە سەرەکییەکانی حکوومەتی هەرێمی کوردستان، لەبەر ئەوە ئەرکی ئەو پڕۆژانەی مۆڵەتیان پێدراوە لە بواری جیاواز و ستراتیژیدان. گەشەسەندنی کەرتی وەبەرهێنانیش کاریگەریی ڕاستەوخۆی لەسەر بەهێزکردنی ژێرخانی ئابووریی پارێزگاکە هەبووە و ژمارەیەکی بەرچاو لە هاووڵاتیانی ناوچەکە بوونەتە خاوەنی هەلی کاری بەردەوام.
قائید میرۆ