هەولێر-KDP.info- مەکتەبی ڕێکخستنی پارێزگای هەولێری پارتی دیموکراتی کوردستان، بەبۆنەی یادی ٣٥ ساڵەی ڕاپەڕینی شکۆداری دەڤەرەکانی (سۆران، پیرمام، تەقتەق، باسرمە، ڕواندز، چۆمان و مێرگەسۆر)، ڕاگەیاندراوێکی بڵاوکردەوە و تێیدا جەخت لە پاراستنی قەوارەی هەرێم و وەفاداری بۆ خوێنی شەهیدان دەکاتەوە.

دەقی ڕاگەیاندراوەکەی مەکتەبی ڕێکخستنی پارێزگای هەولێر:

٣٥ ساڵ بەسەر ڕاپەڕینی شکۆداری (سۆران، پیرمام، تەقتەق، باسرمە، ڕواندز، چۆمان و مێرگەسۆر) تێپەڕ دەبێت.

کەسوکاری سەربەرزی شەهیدان..

خەڵکی نیشتمانپەروەری ئەم ناوچانە..

بەبۆنەی یادی ٣٥ ساڵەی ڕاپەڕینی مەزنی شار و شارۆچکەکانی (سۆران، پیرمام، تەقتەق، باسرمە، ڕواندز، چۆمان، مێرگەسۆر و دەوروبەریان)، گەرمترین پیرۆزبایی ئاراستەی ئێوەی تێکۆشەر و دڵسۆز دەکەین. لەم یادە پڕ لە سەروەرییەدا، بە ڕێز و شکۆوە ڕۆڵی مێژوویی و سەرکردایەتیی حەکیمانەی جەنابی سەرۆک مەسعود بارزانی بەرز دەنرخێنین؛ کە وەک ئەندازیاری ڕاپەڕین و داڕێژەری نەخشەی ئازادی، بە پلان و سەرپەرشتیی ڕاستەوخۆی جەنابیان، ئیرادەی گەل و پێشمەرگەی یەکخست و لە ١٠ی ئاداری ١٩٩١دا، داستانی سەرکەوتنی گەورەی لەم ناوچە ستراتیژییانەدا خوڵقاند.

ئەو ڕاپەڕینە شکۆدارە، وەرچەرخانێکی مێژوویی بوو کە تێیدا ئیرادەی پۆڵایینی جەماوەری قارەمان بەسەر زەبروزەنگی داگیرکەراندا سەرکەوت. ئەمڕۆ کە یادی ئەو ڕۆژە مەزنە دەکەینەوە، وەک مەکتەبی ڕێکخستنی پارێزگای هەولێر دووپاتی دەکەینەوە کە وەفاداری بۆ خوێنی شەهیدان و خزمەتکردنی ئەم ناوچە تێکۆشەرانە، هەوێنی کار و خەباتمان دەبێت بۆ پاراستنی قەوارەی هەرێمی کوردستان.

دووبارە یادی ١٠ی ئادار لە جەماوەری خۆڕاگری پیرمام، تەقتەق، باسرمە، ڕواندز، سۆران، چۆمان و مێرگەسۆر پیرۆز بێت.

دروود بۆ گیانی پاکی شەهیدانی ڕاپەڕین و سەرجەم شەهیدانی ڕێگەی ڕزگاریخوازی کوردستان.

پارتی دیموکراتی کوردستان

مەکتەبی ڕێکخستنی پارێزگای هەولێر

١٠ی ئاداری ٢٠٢٦