ھەولێر-KDP.info- وەزارەتی ناوخۆ ڕاگەیەنراوێک لەبارەی ئەو ھاووڵاتییانە بڵاو دەکاتەوە کە لە دەرەوەی وڵات گیریان خواردووە یاخود دەیانەوێت بگەڕێنەوە ھەرێمی کوردستان، لەمبارەیەوە دەڵێت، "ڕەزامەندی وڵاتی تورکیا وەرگیراوە بۆ ماوەی ٥ ڕۆژ ڤیزای ترانزێتیان پێ بدرێت".
ئەمەی خوارەوە دەقی ڕاگەیەنراوەکەی وەزارەتی ناوخۆی حکوومەتی ھەرێمی کوردستانە:-
ھاونیشتمانی ئازیز، دوابەدوای دروستبوونی گرژی و ئاڵۆزی لە ناوچەکە و پەککەوتنی گەشتە ئاسمانییەکان، بەمەبەستی ئەنجامدانی کارئاسانی و بەھاناوەچوونی ئەو ھاونیشتمانیانەی کە لە دەرەوەی وڵات گیریان خواردووە و دەیانەوێت بگەڕێنەوە ھەرێمی کوردستان، ھەروەھا ئەو ھاونیشتمانیانەش کە لە ناوەوەی وڵات دەیانەویت بگەڕێنەوە شوێنی نێشتەجێبوونی خۆیان لە دەرەوەی وڵات، بۆ ئەو مەبەستە حکوومەتی ھەرێمی کوردستان ھەردوو وەزارەتی ناوخۆ و فەرمانگەی پەیوەندیەکانی دەرەوەی ڕاسپارد بۆ گرتنەبەری ڕێکاری پێویست بۆ ئەو بابەتە.
بۆ ئەو مەبەستە فەرمانگەی پەیوەندیەکانی دەرەوە توانی ڕەزامەندی وڵاتی تورکیا بەدەست بھێنێت بۆ وەرگرتنی ڤیزای ترانزێت بۆ ماوەی پێنج ڕۆژ بۆ ھاونیشتمانیان لە ھەر شوێنێک بن لە دەرەوەی وڵات تاوەکو بتوانن بەشێوەی ترانزێت بێنە وڵاتی تورکیا و دواتر بگەڕێنەوە ھەرێمی کوردستان.
بۆ سوود وەرگرتن لەو کارئاسانییە تکایە ئەو ڕێکارانەی خوارەوە پەیڕەو بکەن:-
• سەرەتا فۆڕمی ئۆنلاین پڕبکەوە بە مەبەستی ھاوکاریکردنت، لە کاتی بوونی ھەر پرسیارێک پەیوەندی بە ھێلە گەرمەکانەوە بکە کە ئاماژەیان پێدراوە:
https://forms.gle/E٣zcfaVPFzc١VKbx٩
ھێڵە گەرمەکان:
+٩٦٤٧٥٠٨٠٣٥٦٨٠
+٩٦٤٧٥٠٨٠٣٥٦٨١
پلاتفۆرمەکانی (وەتسئاپ، ڤایبەر و تێلیگرام) لەسەر ھێڵەکان بەردەستن.
• دوای ئاگادارکردنەوەت لەلایەن ھێڵە گەرمەکانەوە سەردانی نزیکترین نێردە دیبلۆماسییەکانی وڵاتی تورکیا (کۆنسوڵخانە یاخود باڵیۆزخانەی وڵاتی تورکیا) بکەن لەو وڵاتانەی کە تێدا گیرتان خواردووە، بەڕێزتان ڤیزەی ترانزێتی (٥) ڕۆژتان پێدەدرێت بۆ گەڕانەوە بۆ وڵاتی تورکیا، دواتر بە ڕێگەی وشکانی بۆ ھەرێمی کوردستان.
• بۆ سوود وەرگرتن لەو کارئاسانیە، پێویستە ئەو تیکتەی کە پێی دەگەڕێتەوە بۆ وڵاتی تورکیا لە ڕێگەی یەکێک لە ھێڵە ئاسمانییە تورکییەکان ببڕدرێت و جیاوازی ناکات بۆ ھەر فڕۆکەخانەیەکی وڵاتی تورکیا بێت.
ھاونیشتمانی ئازیز تکایە لەو خاڵانەی خوارەوە دڵنیا ببەوە:
• دڵنیا ببەوە لەوەی کە تیکتەکەت بڕیبێت بەر لە چوونت بۆ کۆنسوڵخانە بۆ وەرگرتنی ڤیزە، چونکە مەرجە تیکتەکەت لە ھێڵێکی تورکی بێت تاوەکو سوود لەو کارئاسانییە وەربگری.
• دڵنیاببەوە لە ڕەچاوکردنی ماوەی پێویست لەنێوان بڕینی تیکت و وەرگرتنی ڤیزە، چونکە ڤیزەکە تەنھا بۆ (٥) ڕۆژە.
• پێویستە ئەو کەسانەی کە داواکاری وەرگرتنی ڤیزەی وڵاتی تورکیا دەکەن، ناویان لە لیستی قەدەغەکراوانی ئەو وڵاتە نەبێت و ھیچ پێشینەیێکی نایاساییان لەو وڵاتە لەسەر نەبێت.
• ئەگەر ھاتوو پاسپۆرتەکەت، پاسپۆرتی دۆمۆنیکا یاخود ھەر پاسپۆرتێکی ترە، پێویستە پاسپۆرتە عێراقییەکەت لەگەڵ خۆت ببەی بۆ نێردە دیبلۆماسییەکان، تاوەکو سوودمەند بیت لەو کارئاسانییە، چونکە ئەو کارئاسانیە تەنھا بۆ ھەڵگرانی پاسپۆرتی عێراقییە.
بۆ زانینی بەڕێزتان ئەو کارئاسانییە کاتیە و تەنھا تاوەکو کردنەوەی ئاسمانی عێراق و ھەرێمی کوردستان بەردەوام دەبێت.
تکایە لە بوونی ھەر کێشەیەک ھێڵە گەرمەکانی ژووری ئۆپەراسیۆنی وەزارەتی ناوخۆ/ ناوەندی ھاوبەشی ھەماھەنگی قەیرانەکان و فەرمانگەی پەیوەندییەکانی دەرەوە بەکاربھێنە و لە کاتی گەیشتنتان بۆ خاڵی سنووری ئیبراھیم خەلیل، حکوومەتی ھەرێمی کوردستان لە ڕێی تیمە تایبەتەکانەوە کارئاسانی تەواوتان بۆ دەکات.
ئەو ھاووڵاتییانەش کە لەو ناوچانەن کە بە وەرگرتنی ڤیزەی وڵاتی تورکیا کێشەکانیان چارەسەر نابێت، دڵنیاتان دەکەینەوە کە ھەوڵەکانمان چڕتر دەکەینەوە و تاوەکو ھەر ھاونیشتمانیەک مابێت، ناوەستین و بەردەوام دەبین.