ھەولێر-KDP.info- لە چل و حەوتەمین ساڵیادی کۆچی دوایی ( بارزانی نەمر )دا، لقی ٢٤ی سەفینی پارتی دیموکراتی کوردستان کۆڕێکی بۆ ڕێزدار فازڵ میرانی ساز کرد.
ئەمڕۆ دووشەممە بە ئامادەبوونی هیوا گەیلانی ئەندامی کۆمیتەی ناوەندی و بەرپرسی لقی ٢٤ سەفین و سەگڤان هالۆ ئەندامی کۆمیتەی ناوەندی و یاریدەدەری بەشی ڕێکخستن و هۆشیار سیوەیلی بەرپرسی مەکتەبی پەیوەندیەکانی دەرەوە و، قادر قادر بەرپرسی دەزگای باڵای ئەیلوول و، حاجی حاجی برایم و، عباس غەزالی و میقداد علی و، ژمارەیەک پەرلەمانتارانی عێراق و کوردستان و هەڤاڵانی لق و لیژنە ناوچەکان و بەرپرسانی حزبی و ئیداری و، کەسایەتی کۆمەڵایەتی و تێکۆشەرانی ئەیلوول و گوڵان و مامۆستایانی زانکۆ و، قوتابیان و لاوان و ئافرەتان و چین و توێژە جیاجیاکان و لە ژێر ناونیشانی (بارزانی نەمر چیرۆکی سەرفرازی و ... داستانی شکۆمەندی نەتەوە). کۆڕێک بۆ ڕێزدار فازڵ میرانی بەرپرسی دەستەی کارگێری مەکتەبی سیاسی ساز کرا.
تیایدا بەڕێز میرانی تیشکی خستەسەر مێژوو وێستگەکانی ژیان و خەباتی بارزانی نەمر لە شۆڕشەکانی بارزان و بەشداری و پشتیوانیان لە کۆماری کوردستان و ڕێرەوە مێژووییەکەیان بۆ یەکێتی سۆڤیەت و هەڵگیرساندنی شۆڕشی مەزنی ئەیلوول و دەسکەوت و سەرکەوتنەکانی شۆڕش و ڕێککەوتننامەی ئازارو، نسکۆی شۆڕش و، هەڵگیرساندنەوەی شۆڕشی گوڵان و بەردەوامی ئەم ڕێبازە لەسەر دەستی سەرۆک (مەسعود بارزانی) وەکو شا ڕێبازی ڕاستەقینەی کوردایەتی.
لە تەوەرێکی تری کۆڕەکەدا میرانی تیشکی خستەسەر هزری مرۆڤ دۆستی و شۆڕشگێڕی و ئازادیخوازی بارزانی نەمرو لە کۆڕەکەدا وتی، بارزانی نەمر ژەنەڕاڵی هزری ئازادی و ئازادیخوازی و کەسێتی ئەفسانەیی گەلی کوردستان و سیمبووڵی دۆزی ڕەوای گەلەکەیی و چەتری کۆکەرەوەی گەلی کوردستان بوو بە جیاوازی زمان و ئایین و ئایدیاو بیرو باوەڕی سیاسیانەوە.
دوا تەوەری کۆڕەکە بەرێز فازڵ میرانی باسی لە بارودۆخی ئێستای کوردستان و ئاستەنگەکانی بەردەم کۆبوونەوەی پەرلەمان و پێکنەهێنانی کابینەی نوێی حکوومەتی کوردستان و نەرمی نواندنی پارتیمان و نەهاتنە پێشەوەی برایانی یەکێتی بۆ گەیشتن بە ڕێککەوتن.
هەروەها باسی هەڵوێستە نەتەوەیی و نیشتیمانیەکان و سیاسەتی حەکیمانەی سەرۆک بارزانی بۆ گەیشتن بە ڕێککەوتن و یەکڕیزی ناوماڵی کوردو، پاراستن و گەشە پێدانی قەوارەی هەرێمی کوردستان کرد.
دەربارەی بارودۆخی هەرێمایەتی و ئەو شەڕەی لە ناوچەکە دا هەیە میرانی وتی خودا سەرۆک و میللەت و کوردستانمان بپارێزێت.