سۆران-KDP.info- پسپۆڕێکی پەیوەندییە نێودەوڵەتییەکان جەخت لەوە دەکاتەوە کە هەرێمی کوردستان لە هاوکێشە ناوچەییەکاندا ڕۆڵی "چارەسەرکار" دەگێڕێت و سیاسەتی حەکیمانەی سەرۆک بارزانی وای کردووە هەولێر ببێتە ناوەندێکی بێ جێگرەوە بۆ دیالۆگی نێودەوڵەتی.

د. مەهدی ئەمین، توێژەر و ئەکادیمی لە پەیوەندییە نێودەوڵەتییەکاندا، لە لێدوانێکی تایبەتدا بۆ ماڵپەڕی فەرمیی پارتی دیموکراتی کوردستان ڕایگەیاند، "هەوڵە دیپلۆماسییەکانی کوردستان بە ڕابەرایەتی سەرۆک بارزانی، پڕۆسەیەکی ئاشتیخوازانەی بەردەوامە. ئێستا هەولێر وەک پایتەختی هەرێم، نەک تەنیا بۆ ناوخۆ، بەڵکو لەسەر ئاستی ڕۆژهەڵاتی ناوەڕاست لە تورکیا، سووریا و عێراقدا، ڕۆڵی سەرەکی دەبینێت لە پێشخستنی گفتوگۆی ئاشتیخوازانە."
ئەو ئەکادیمیستە ئاماژەی بە هێزی "پارا-دیپلۆماسی" هەرێم کرد و ڕایگەیاند، "پێشوازیی بەردەوامی سەرۆک بارزانی لە بەرپرسانی باڵای جیهانی (وەک نێردەی تایبەتی ئەمریکا بۆ کاروباری سووریا و شاندە باڵاکانی عێراق) بەڵگەی ئەو متمانە نێودەوڵەتییەیە.
د. مەهدی دەشڵێ، "هەولێر وەک ناوەندێکی ستراتیژی بۆ چارەسەری قەیرانە ئاڵۆزەکان، بەتایبەت پرسی کورد لە سووریا، دەبینرێت و ئەم دیپلۆماسییەتەش بەشێکە لە ستراتیژیەتی فراوانی پارتی بۆ چەسپاندنی سەقامگیری و پەرەپێدانی هاریکاریی نێودەوڵەتی.
د. مەهدی ئەمین تیشکی خستە سەر ئەوەی کە پارتی دیموکراتی کوردستان هەمیشە هەوڵی داوە کوردستان "سەرچاوەی ئارامی" بێت. گوتیشی، "پارتی هەرگیز لەسەر حیسابی مافی خەڵکی تر بەرژەوەندییەکانی نەپاراستووە، بەڵکو باوەڕی بە بنەمای ڕێزگرتنی بەرامبەر و چارەسەری ئاشتییانەی کێشەکان هەبووە. هەر ئەمەش وای کردووە وڵاتانی جیهان بۆ یەکلاکردنەوەی ناکۆکییەکان، هەولێر وەک ناوەندێکی جێگای متمانە و پشتپێبەستراو هەژمار بکەن."

سەلاح جەلال