ھەولێر-KDP.info- لە چوارچێوەی یەکخستن و ڕێکخستنەوەی هێزەکانی سەر بە وەزارەتی پێشمەرگە، بە ڕاسیاردەی سەرۆكی حكوومەتی هەرێمی كوردستان دوو فەرماندەی هێزی پێشمەرگە بەناوی فەرماندەی دەڤەری یەک و دەڤەری دوو دروست دەكرێن. بۆ ئەو مەبەستەش لیژنەیەكی باڵا پێک هێنراوە و كار لەسەر دیاریكردنی دەسەڵاتە كارگێڕی و دارایی و یاساییەكانی ئەو دوو فەرماندەیەی هێزی پێشمەرگە دەكات. 

ئەمڕۆ یەكشەممە 1ـی 2ـی 2026، ئومێد سەباح، سەرۆكی دیوانی ئەنجوومەنی وەزیرانی كوردستان ڕایگەیاند، دوای ئەوەی بە ڕاسپاردەی مەسروور بارزانی، سەرۆکی حکوومەتی هەرێمی کوردستان لیژنەیەكی باڵا بۆ رێکخستنەوەی هێزەکانی پێشمەرگە پێک هات، ئەمڕۆ کۆبوونەوەی لیژنەی باڵا بۆ تاوتوێكردن و دیاریکردنی دەسەڵاتەکانی کارگێری و دارایی و یاسایی فەرماندەی دەڤەرەکانی یەک و دوو  بەڕێوە چوو.

لە كۆبوونەوەكەدا، وێڕای گۆڕینەوەی بیروڕا، بڕیار دراوە ئەو لیژنەیە لە داهاتوویەکی نزیکدا کارەکانی کۆتایی پێ بهێنێت و دەسەڵاتە کارگێری و دارایی و یاساییەکانی دەڤەرەکان پەسەند بکەن.