ھەولێر-KDP.info- فازڵ میرانى بەرپرسى دەستەى کارگێڕی مەکتەبى سیاسى لە پیرمام پێشوازى لە (فیونا بۆیتەرز) یاریدەدەرى کونسوڵى گشتى بەریتانیا لە هەولێر و شاندى یاوەرى کرد.
لە دانیشتنێکدا فازڵ میرانى بەگەرمى بەخێرهاتنی کردن و پیرۆزبایى لە خاتوو (فیونا) کرد بەبۆنەى دەستبەکاربوونى لە ئەرکە نوێیەکەی و هیواى سەرکەوتنى بۆ خواست.
فازڵ میرانى پوختەیەک لە مێژووى پارتى دیموکراتى کوردستان و بزوتنەوەى ڕزگاریخوازى گەلى کوردستانى پێشکەش کرد.
لە تەوەرێکى دیکەدا میرانى سەبارەت بە ڕەوشى ئەمڕۆى کوردستان، عێراق و ناوچەکە ئاماژەى بەوەدا کە ناوچەکە بە قۆناغێکى هەستیاردا تێدەپەڕێت و بەرەو گۆڕانکارى دەڕوات.
سەبارەت بە هەوڵەکانى لایەنە سیاسیەکانى عێراق و کوردستان بۆ پێکهێنانى حکوومەتى عێراقى فیدراڵ و حکوومەتى هەرێمى کوردستان، میرانى دووپاتى کردەوە هەوڵەکان بەردەوامن و هیوامان وایە لەم نزیکانە حکوومەتى عێراقى فیدراڵ و حکوومەتى هەرێمى کوردستان پێکبهێنرێن.
(فیونا بۆیتەرز) یاریدەدەرى کونسوڵى گشتى بەریتانیاش لە هەولێر، سوپاسى مەکتەبى سیاسى پارتى کرد بۆ ڕەخساندنى ئەم دیدارە و خۆشحاڵى خۆى دەربڕى بۆ دەسپێکردنى ڕاپەڕاندنى ئەرکە نوێیەکەى لە هەولێر، هیواى خواست هەرێم و گەلى کوردستان هەر لە پێشکەوتندا بێت.