رێباز حەملان
سەرۆکی حکوومەتی ھەرێم، کاک مەسروور بارزانی لە دھۆکی قەشەنگ و ئارام دوای ململانێ و ھەڵمەتی ھەڵبژاردن، توانی تەواوی بۆچوون و ڕکابەرە جیاوازەکان لە شەشەمین کۆربەندی ئاشتی و ئاسایشی ڕۆژھەڵاتی ناوەڕاست لە ‘’MEPS‘’ کۆبکاتەوە.
ڕۆژی یەکەم:
مێپس بووە وێستگەی کۆبوونەوەی گەورەترین کوتلە براوەو سەرکردە سیاسییە کاریگەرەکانی عێراق کە یەکەمجارە بەم شێوەیە ھەمووان پێکەوە ئامادەبوونیان ھەبێت لە ھەرێمی کوردستان، ھەموو لایەنە جیاوازەکان بە شیعەو سوننە و گەورەترین دوو دەسەڵاتی حوکمڕانی عێراق، سەرۆکی وەزیران و سەرۆکی ئەنجوومەنی باڵای دادوەری ئامادەبوون، بەشێکی زۆری وەزیرو پلە باڵاکان و جێگرانی سەرۆکی ئەنجوومەنی نوێنەرانی عێراق، دھۆک و ھەرێمی کوردستان بوونەوە دەستپێکی بونیادنانی حوکمڕانی و سەردەمێکی نوێ بۆ ئایندەی عێراق و ھەرێمی کوردستان لە دوای ھەڵبژاردنی ٢٠٢٥/١١/١١.
لە MEPS عەرەب (شیعەو سوننە)، کوردو تورک و فارس، مەسیحی و ئێزدی و موسڵمان کلدو ئاشوری و تورکمان، ھەمووان بە پێوە وەستان بۆ سروودی نیشتمانی ئەی رەقیب.
پێیان وترا ستەم و زوڵم بۆ ھیچ ڕژێم و سیستەمێک سەری نەگرتووە، جێبەجێکردنی دەستوور، ھاوبەشی، ھاوسەنگی، سازان دەبنە بنەمای پێکەوەژیان بە دادپەروەرانە.
ھەر لە پەراوێزی کۆربەندی MEPS دیدارە گرنگەکانی جەنابی سەرۆک بارزانی و جەنابی سەرۆکی ھەرێمی کوردستان و جەنابی سەرۆکی حکوومەتی ھەرێمی کوردستان لەگەڵ سەرکردە باڵاکانی عێراق و رۆژھەڵاتی ناوەڕاست بەرێوەچوو.
ڕۆژی دووەم:
مێپس بووە ڕووگەی کۆکەرەوەی سەرکردەی پارچەکانی دیکەی کوردستان ئەوەی خەڵکی خەونیان پێوە دەبینی کە ئەو کارەکتەرە سیاسیە کوردییانە کۆبکاتەوە لە مێپس کرا.
بارزانی و کۆبانی و بایدەمیر سێکوچکەی کوردایەتی لەیەک شوێندا کۆبووونەوە.
پشتگیری دووپاتکرایەوە کە ھەرێمی کوردستان و حکوومەتی ھەرێمی کوردستان پێداگیرە کە پرۆسەی ئاشتی لە تورکیا کە دەست پێکراوە دەبێت لەسەر ھەنگاوەکانی بەردەوام بێت بۆ سەقامگیری و خۆشگوزەرانی گەلانی تورکیاو بەتایبەت گەلی کورد لە باکووری کوردستان.
کاک مەسروور بارزانی لە مێپس ھەسەدەو ئەنەکەسەی پێکەوە دانیشان و خۆشحاڵ بوو لە مێپس بیروڕا و خاڵە ھاوبەشەکانیان باس بکەن، حکوومەتی ھەرێم پشتیوانە لەو ھەنگاو و ڕێکەوتن و لێک تێگەیشتنانەی نێوان حکوومەتی دیمەشق و کوردانی ڕۆژاڤا کە کراوە تا بگەنە ڕێکەوتن لەپێناو سەقامگیری و پێکەوەژیانی گەلانی سووریا و دەستەبەرکردنی مافەکانی گەلی کورد لە ڕۆژاڤا بە شێوەیەکی ئاشتیانە.
ھەردوو سەرکردە جەنەڕاڵ مەزڵوم عەبدی و عوسمان بایدەمیر لە وتارەکانیان ئەم ڕاستیانەیان سەلماند و سوپاس گوزاربوون بۆ ئەم کۆربەندە گرنگەی کە ھەموو لایەنە ناکۆک و ھەموو جەمسەرەکانی کۆکردەوە لە ڕۆژھەڵاتی ناوەڕاست.