ھەولێر -KDP.info- ڕاوێژکاری سەربازیی سەرۆکی ھەرێمی کوردستان گوتی "یەکخستنی ھێزی پێشمەرگە لە قۆناغی کۆتایییە و ھێزی پێشمەرگە لە چوارچێوەی دوو دەڤەر و ١١ فیرقە کۆدەکرێنەوە."
ڕاوێژکاری سەربازیی سەرۆکی ھەرێمی کوردستان، بابەکر زێباری، بە ماڵپەڕی فەرمیی پارتی دیموکراتی کوردستانی ڕاگەیاند "لە چوارچێوەی یەکخستنی ھێزی پێشمەرگە و ھەبوونی یەکھێزی پێشمەرگە لەژێر چەتری وەزارەتی پێشمەرگەی حکوومەتی ھەرێمی کوردستان یەکەی ٧٠ و ٨٠ نامێنێت و دەبنە دەڤەری یەک و دەڤەری دوو، بەجۆرێک بەپێی بەرنامەیەک، یەکەی ٧٠ و ٨٠ و فەرماندەیی و میحوەر نامێنێت، دەبنە فیرقە و دەڤەر، بۆیە دەڤەری یەک لە ھەولێر و دھۆک دەبێت، سلێمانی و گەرمیانیش دەبێتە دەڤەری دوو."
بابەکر زێباری گوتیشی "ئەمە ھەنگاوێکی زۆر باشە، لە ھەرێمی کوردستان یەک ھێزی پێشمەرگە دەبێت و تا کۆتایی ئەمساڵ ھەمووی تەواو دەکرێت، دەڤەری یەک تەواو بووە، دەڤەری دووش لە کۆتایی کارکردن دایە، ١٠ فیرقەش تەواوبووە و کار لە فیرقەی ١١ھەمین دەکرێت، ئەویش خەریکە تەواو بێت، بە جۆرێک دەڤەری یەک ٦ فیرقە دەبێت، دەڤەری دوو ٥ فیرقە دەبێت، ئەمە ھەنگاوێکی زۆر مەزنە و کارێکی زۆر باشە، ھەرێمی کوردستان یەک ھێزی پێشمەرگەی ھەبێت کە ماوەیەکی زۆرە بەپێی پلان و بەرنامەیەکی تۆکمە کاری بۆ دەکرێت، ئێستە ئەنجامەکەی دیارە و گەیشتووەتە قۆناغی کۆتایی."
بڵند ئیبراھیم