بڵند نەوڕەس
لە ماوەی زیاتر لە مانگێکی بانگەشەی ھەڵبژاردن بۆ ئەنجوومەنی نوێنەرانی عێراق، ھەر پارت و لایەنێکی سیاسی بە قەبارەی خۆی و بە ئەندازەی بیری سیاسی و تێڕوانینی بۆ ئایندە و پلانە خزمەتگوزارییەکانی بانگەشە دەکات.
لەسەر ئاستی عێراق بانگەشەی لایەنەکان ھەمەجۆرن، بەڵام ھیچکامیان خواستی شەقام و خەڵکیان تێرنەکردووە.
تاکە پارتی سیاسی کە لەسەر ئاستی ھەرێمی کوردستان و عێراقدا بە پاشخانێکی پڕەوە بانگەشە دەکات، تەنیا پارتی دیموکراتی کوردستانە، ئەمەش لایەنگیری نییە بۆ پارتی، ئەمە فاکتە و بەڵگەکانی بانگەشە لە میدیا و پلاتفۆڕمەکانی سۆشیال میدیا و کەرنەڤاڵە جەماوەرییەکانی پارت و لایەنە سیاسییەکاندا ھەن و ڕوونن بۆ ھەرکەسێک کە بیەوێت دڵنیاببێتەوە لەم ئارگۆمێنتە.
پارتی لە ڕێگەی سەرۆک بارزانی و ھەردوو فیگەری دیاری حکومڕانی کوردستانەوە کە بەڕێزان نێچیرڤان بارزانی و مەسروور بارزانی جێگرانی سەرۆکی پارتی، بانگەشە دەکەن.
ئەم بەڕێزانە بەڵگەی بەرجەستەکراو دەدا بە خەڵک و باس لە کارنامەیەک دەکەن کە بناغەیەکی پتەوی حکومڕانی باش و ڕاستیی لەخۆ گرتووە، ئەوان واقعبینانە و ڕاستگۆیانە لەگەڵ جەماوەر و خەڵکدا گفتوگۆ دەکەن و پەیامەکانییان یەکانگیربوو لەگەڵ ئەو زەمینەیەی کە خەڵک ھەستی پێدەکات و بە چاوی خۆی دەیبینێ.
پەیامی پارتی پەیامێکی ھێمن و ئایندەبەخش و ئارامکەرەوەیە بۆ خەڵکی کوردستان، بەڵێنی ئاوەدانی و خۆشگوزەرانی و خزمەتگوزاری بەخەڵک دەدە، لە ھەمان کاتدا ھەر ڕۆژێک و پڕۆژەیەکی نوێ و خزمەتگوزارییەکی تازە لەسەر ئەرزی واقع پێشکەش بە شار و شارۆچکەکانی کوردستان دەکەن، پەیامی پارتی گوزارشتە لە پێکەوەبوون و یەک دەستی و بەھێزبوونی کورد لە بەغدا، ئاماژەیە بۆ ئایندەیەکی بەھێزتر بۆ ھەرێمی کوردستان و داھاتوویەکی گەشتر بۆ نەوەکانی داھاتوو.
پارتی بە پلان کاردەکات، بۆیە بانگەشەکەشی ئامانجدارە، چالێنجی یەک ملیۆن دەنگیش لەخۆوە نییە و پشت ئەستوورە بەو ڕاپرسی و توێژینەوە و لێکۆڵینەوانەی کە لە ڕابردوودا ئەنجامدراون و بەرچاو ڕوونییانداوە بە پارتی بەرمەبنای دەستکەوتەکانی وەک کارەبای ٢٤ کاتژمێری و چارەسەرکردنی کێشەی ئاوی خواردنەوە و ژینگەپارێزی و دروستکردنی ژێرخانی ڕێگەوبان و پڕۆژەی ھەژماری من و دروستکردنی بەنداو و ھەناردەکردنی بەرھەمی کشتوکاڵی و بەدیجیتاڵکردنی بەشێکی زۆری دامەزراوە خزمەتگوزارییەکان و ھەناردەکردنەوەی نەوتی ھەرێمی کوردستان و لابردنی ئابڵوقەی سەر فڕۆکەخانەی سلێمانی و نێوەندگیری لە نێوان بەڕێز مەزڵوم عەبدی و حکوومەتی سوریادا و ھاوکاریکردنی سەرخستنی پرۆسەی ئاشتی لە تورکیا و زۆر بواری تری کەڵکدار کە خەڵک بە تیژبینییەوە وەریدەگرێت و ھەڵیدەسەنگێنیت.
ئەم شێوازە لە بانگەشەکردن زۆر نوێ یە بۆ عێراق و ھەرێمی کوردستان کە پارتێکی سیاسی تەنیا بەڵێن نەدات بە دەنگدەران، بەڵکو پرۆژەیان پێشکەش بکات و سەرپشکییان بکات لە نێوان ویستییان بۆ خزمەتی حازر بەدەست یان بەڵێنی بێ جەدوا!
پارتی بەم مۆدێلەی لە بانگەشەی ھەڵبژاردندا وادەکات کە پارت و لایەنە سیاسییەکانی تری عێراق و ھەرێمی کوردستان دووجار بیربکەنەوە بۆ داھاتوو و ناچاربن کە خزمەتی خەڵک بکەن بۆ ئەوەی متمانەیان بەدەست بھێنن، ئەم جۆرە لە بانگەشە دەبێتە نەریتێکی باو و خەڵک ھۆشیاردەکاتەوە لە ھەڵبژاردندا کە بەرنامەی پارتە سیاسییەکان بکەوێتە پێش بەرژەوەندییە حزبی و کەسییەکان، خەڵک چیتر فریونادرێت بەوەی پێیان بوترێت لە داھاتوودا ئەوەتان بۆ دەکەین، بەڵکو دەبێت پێیان بگوترێت ئەوەمان بۆ کردوون.
ئەم ستراتیژە زۆر دەڕوات و باش کاردەکات لە جوگرافیایەکدا کە سەرتاپای کێشە و ئاڵۆزی و ناکۆکییە، پارتی توانیویەتی قەیران بکات بە دەرفەت و سودی لێ ببینێت بۆ خۆڕێکخستنەوە و خۆ ئامادەکردنەوە و خۆسازدانەوە بۆ ئانیدەیەکی گەشتر و داھاتوویەکی شکۆدارتر بۆ خۆی و خەڵکی کوردستان.
ئەم داھێنانە لە بانگەشەدا سەر دەکێشێت بۆ دووبارە یەکەمبوونەوەی پارتی وەک پارتێکی سیاسی لەسەر ئاستی عێراقدا، بەڵام ئەم جارە بە دەنگی زیاتر و بە ژمارەی ملیۆنی و زیاتریش.