(٨)
خوشک و براکانم.
دەنگی ئێوە شۆڕش و سامانێک لە بۆچوون و بڕیارە، گوتم: سامان و شۆڕش.!
لەگەڵ ئێمە، دەنگتان شۆڕشێکە لەدژی ساڵانێکی دوورودرێژی چەواشەکاری و پەراوێزخستن و خزمخزمێنە.
دەنگی ئێوە، بۆ لێپرسینەوە دەبێتە ھێز لە تەرازووی یاسادا، ھەروەھا ھێزێکیش دەبێت بۆ پەرلەمان تا کەلێنەکانی فڕوفێڵ و چەواشەکاری و خۆدزینەوە لە یاسا، دابخات.
دەنگی ئێوە، ئەو گوێیانە دەیبیستنەوە، کە نایانەوێت گوێبیستی ھەڵەکانیان بن، ھەموو دامەزراوەکان بۆ خزمەتکردنی میللەتن، لەگەڵمان وەرن با پێکەوە کۆتایی بەم زەلیلییە بھێنین.
نابێت چیتر ڕێگە بدەین ترس بەسەر بڕیارەکانماندا زاڵ بێت، با متمانە بەخۆبوون بگەڕێنینەوە بۆ خۆمان و نەوە لە دوای نەوەی لەسەر پەروەردە بکەین.
قبوڵی مەکەن بەوەی ناچارتان بکەن واز لە مافی دەنگدانتان بھێنن، نە بە دەنگنەدان، نە بە پێدانی دەنگتان بەو کەسانەی کە:
• خۆیان دەوڵەمەند کرد و ئێوەیان ھەژار خست.
• خۆیان فێربوون و ئێوەیان لە نەزانیدا ھێشتەوە.
• خۆیان سەلامەت بوون و ئێوەیان بەکوشتندا.
ھەمیشە ئەم پرسیارانە بخەنە بەرچاوی خۆتان:
دوای ئەم ھەموو ساڵە، ئێمە چیمان لەدەستدا و ئەوان چییان دەستکەوت؟ ئایا دۆڕاندنمان ھەر لەبەر ئەوان نەبوو؟! ئایا بردنەوەی ئەوانیش ھەر بە حەرام و بەھۆی ترساندنی ئێمەوە نەبوو؟!
چیتر شەرعییەت مەدەن بە مانەوەی ئەم ستەمکارییە.
دەنگتان ئەم ھەورە ڕەشە لادەبات و وڵاتەکەمان دەخاتەوە سەر ڕێڕەوێکی دروست و ڕوونترین ئامانج.