کەرکووک-KDP.info- شاخەوان عەبدوڵڵا، سەرۆکی لیستی پارتی دیموکراتی کوردستان بۆ هەڵبژاردنی خولی شەشەمی پەرلەمانی عێراق لە کەرکووک، دەستپێکردنی بانگەشەی هەڵبژاردن بۆ لیستی 275ی پارتی دیموکراتی کوردستانی ڕاگەیاند و گوتی، چاومان لەوەیە پارتی دیموکراتی کوردستان ببێتە هێزی یەکەم لە کەرکووک.

شاخەوان عەبدوڵڵا بەرەبەیانی ئەمڕۆ 3ـی تشرینی یەکەم، لە کۆنفڕانسێکی ڕۆژنامەوانیدا رایگەیاند، پارتی دیموکراتی کوردستان بۆ هەڵبژاردنی خولی شەشەمی پەرلەمانی عێراق 24 کچ و کوڕی کەرکووکی وەک بەربژێر دەستنیشان کردووە کە هەموویان کەسی بەتوانان و سەرکردایەتیی سەرخستنی لیستی پارتی دیموکراتی کوردستان لە کەرکووک دەکەن.

بە گوتەی شاخەوان عەبدوڵڵا، "خەڵکی کوردستان و خەڵکی کەرکووک بە تایبەتی چاویان لەوەیە، بەربژێرانی پارتی دیموکراتی کوردستان سەر بخەن بۆ پەرلەمانی عێراق، چونکە پارتی دیموکراتی کوردستان ڕۆڵێکی یەکجار گەورەی بینیوە لەوەی بتوانێ پارێزگاری لە مافە دەستوورییەکانی خەڵکی کوردستان بکات."

سەرۆکی لیستی پارتی دیموکراتی کوردستان لە کەرکووک، گوتیشی، "چاومان لەوەیە پارتی دیموکراتی کوردستان ببێتە هێزی یەکەم لە کەرکووک، چونکە هەموو زەمینەکان لەبارن بۆ ئەوەی پارتی ببێتە هێزی یەکەم و ئەزموونەکانی رابردووش ئەمەی سەلماندووە کە پارتی تاکەهێزە بتوانێ دۆخی کەرکووک ئاسایی بکاتەوە و تاکە هێزە هەموو ئەو بەڵێنانەی لە هەڵبژاردنی پێشوو داویەتی جێبەجێی کردووە.

شاخەوان عەبدوڵڵا داوای لە خەڵکی کەرکووک و دانیشتووانی ناوچەکانی دەرەوەی ئیدارەی هەرێم کرد بە گرنگییەوە لە هەڵبژاردنی خولی شەشەم بڕوانن و لە هەر شوێنێکن لە ڕۆژی هەڵبژاردندا بگەڕێنەوە بۆ کەرکووک و بە هەمان نەفەسی کەرنەڤاڵی سەرژمێری لەم هەڵبژاردنەشدا بەشدار بن؛ لەبەر ئەوەی "هەمان نەفەسی شۆڤینی کە دوێنێ بە تیرۆر و تۆقاندن خەڵکی کوردی ئاوارە دەکرد، ئەمڕۆ دەیانەوێ لە ڕێگه‌ی سندووقی دەنگدانەوە خۆیان بسەپێنن و شکست بە زۆرینەی کوردی ئەم شارە بێنن."

سەرۆکی لیستی پارتی دیموکراتی کوردستان لە کەرکووک هەروەها داوای لە خەڵکی پارێزگاکە کرد بۆ تەواو کردنی ئەو پەیام و ئامانجەی پارتی دیموکراتی کوردستان لە پێناویدا گەڕاوەتەوە کەرکووک، دەنگ بە کاندیدانی پارتی دیموکراتی کوردستان و لیستی 275 بدەن لەبەر ئەوەی پارتی تاکە هێزە کە بتوانێ دۆخی کەرکووک ئاسایی بکاتەوە و لە بەغدا پارێزگاری لە مافە دەستوورییەکانی خەڵکی کوردستان بکات.

کاتژمێر 12ـی بەرەبەیانی ئەمڕۆ هەینی 3ـی تشرینی یەکەمی 2025، بانگەشەی هەڵبژاردنی پەرلەمانی عێراق بە فەرمی دەستی پێ کرد و لایەنە سیاسییەکان و بەربژێرەکان دەتوانن لە چوارچێوەی ڕێنماییەکانی کۆمیسیۆنی باڵای سەربەخۆی هەڵبژاردنەکانی عێراق و لێژنەی ئەمنیی پارێزگاکان، لە سەرجەم شار، شارۆچکە، ناوچەکانی عێراق و هەرێمی کوردستان، بە ئاشکرا بانگەشە بۆ لیست و ژمارەکانیان بکەن.