ھەولێر-KDP.info- بەڕێوەبەری گشتی تۆمارکردنی خانووبەرەی میری دەڵێ، پرۆسەی تاپۆکردنی زەوی فەرمانبەران بگاتە لامان تیمی تایبەت بە بەڕێوەبەرایەتی خۆمان ھەیە و یەکسەر دەست بە تاپۆکردنیان دەکرێت.
د. لوقمان عومەر، بەڕێوەبەری گشتی تۆمارکردنی خانووبەرە، تایبهت بە ماڵپەڕی فەرمیی پارتی دیموکراتی کوردستانی ڕاگەیاند، "ھێشتا پرۆسەی تاپۆکردنی زەوی فەرمانبەران نەگەیشتووتە بەڕێوەبەرایەتیەکەی ئێمە، چونکە ئەو زەویانەی دابەش دەکرێن بە چەند قۆناغێکدا تێدەپەڕن و دوای دابەشکردنیان وردبینیان بۆ دەکرێت، زەویەکانی پارچەی گەورەن دواتر ئیفراز دەکرێن و دەکرێنە پارچە پارچە ئینجا ڕەوانەی بەڕێوەبەرایەتی گشتی تۆمارکردنی خانووبەرە دەکرێن و پرۆسەی تاپۆکردنیان بەڕێوەدەچێت.
بەڕێوەبەری گشتی تۆمارکردنی خانووبەرە گوتیشی، "ھەرکاتێک ڕێکارەکان لە شارەوانی تەواو بوون و گەیشتە لای ئێمە ئەوە تیمی خۆمان ھەیە و یەکسەر دەست بە پرۆسەی تاپۆکردنیان دەکرێت لەلایەن بەڕێوەبەرایەتیمانەوە.
پەیوەست بەو پارەیەی لەکاتی تاپۆکردنی زەوی فەرمانبەران وەردەگیرێت د. لوقمان عومەر گوتی، "ئەو زەویانەی بە فەرمانی سەرۆکی حکوومەتی ھەرێمی کوردستان بەسەر فەرمانبەران دابەش دەکرێن نرخی تاپۆکردنیان دیاریکراوە لە سەنتەری پارێزگا چەندە و لە قەزا و ناحیەکانیش چەندە، بەڵام پارەیەکی زۆر نیە.
قائید میرۆ